An Paghuhulit Nangangaipo nin Pakatagal
1. Taano ta si apostol Pablo marahay na halimbawa nin pakatagal sa ministeryo?
1 Sa laog nin labing 30 taon, ikinaogma ni apostol Pablo an nakakakontentong karera bilang ebanghelisador. Napaatubang sia sa nagkapirang kadepisilan sa saiyang paghuhulit. (2 Cor. 11:23-29) Pero, dai nagsuko si Pablo. (2 Cor. 4:1) Nasabotan nia na an kosog tanganing makatagal magikan ki Jehova. (Fil. 4:13) Huli sa saiyang halimbawa, masasabi ni Pablo: “Magin kamong mga paraarog sa sako, siring na ako paraarog ki Cristo.”—1 Cor. 11:1.
2. Anong mga pagbalo sa aroaldaw an napapaatubang sa dakol ngonyan, asin paano sinda puedeng tabangan na makatagal?
2 Pagtagal sa mga Pagbalo Ngonyan: Kada aldaw, dakol sa satong mga tugang an napapaatubang sa pag-olog-olog, pagkontra, o kadaihan nin interes nin mga kapamilya, katrabaho, o kaeskuela. (Mat. 10:35; Juan 15:20) Tibaad totoo man iyan sa saindo. Sa ibong na lado, tibaad napapaatubang kamo sa sarong problema sa salud, o tibaad sa aroaldaw may inaatubang kamong mga disturbo asin linalabanan na mga sugot. Puede kitang magkaigwa nin kosog paagi sa paghorophorop sa mga halimbawa kan mga kapwa Kristiano ngonyan na napapaatubang asin nakakapanggana sa mga kadepisilan.—1 Ped. 5:9.
3. Anong mga probisyon an ginibo ni Jehova tanganing tabangan kita na magdanay na marigon?
3 Puede kitang magkaigwa nin kosog na magdanay na marigon sa satong ministeryo paagi sa pagsulog kan “bilog na pangalasag hale sa Dios.” (Efe. 6:10-13, 15) Mahalagang marhay man na mamibi na makatagal. (2 Cor. 6:4-7) Tanganing makapanggana sa satong espirituwal na pakikilaban, dapat niatong himateon an mga pagirumdom nin Dios na pakosogon giraray an satong boot. (Sal. 119:24, 85-88) Kun paanong tibaad paorootrong basahon nin sarong aki an personal na surat hale sa saiyang mamomoton na ama, an satong aroaldaw na pagbasa sa Biblia nagpapakosog man sa satong relasyon ki Jehova. Nagkakamit kita nin kadonongan na makaya an mga pagbalo paagi sa regular na personal na pag-adal, sa siring tinotogotan an kaisipan nin Dios na makaimpluwensia sa satong mga desisyon asin magpakosog sa satong integridad.—Tal. 2:10, 11.
4. Anong mga bendisyon an ibinubunga kan maimbod na pagtagal sa satong ministeryo?
4 An Pakatagal Nagbubunga nin mga Bendisyon: Kun paanong totoo iyan ki Pablo, an maimbod na pagtagal niato mantang inootob an satong ministeryo nagpapagayagaya sa puso ni Jehova asin nagbubunga nin mga bendisyon sa sato asin sa iba. (Tal. 27:11) Magin determinado logod kita na magmaigot sa ministeryo, na paagi kaiyan pinapatunayan na an satong pagtubod nagdadanay asin “na may orog nanggad na halaga kisa bulawan na napapara minsan ngani iyan napatunayan sa kalayo.”—1 Ped. 1:6, 7.