Atubangon an Kadepisilan sa Pagpapatotoo sa mga Lalaki
1. Ano an kaipuhan na marhay ngonyan sa pag-asikaso sa intereses kan Kahadean?
1 Mantang padagos na nag-ooswag an gibohon na pang-Kahadean sa huring mga aldaw na ini, kaipuhan na marhay ngonyan an mga lalaki na may espirituwal na kualipikasyon tanganing mangenot. (Mar. 4:30-32; Gibo 20:28; 1 Tim. 3:1-13) Pero, sa nagkapirang lugar mas dikit na lalaki kisa sa babae an nag-aako kan mensahe kan Kahadean. Sa nagkapirang kultura, ipinapabaya nin mga lalaki sa saindang agom an dapit sa espirituwal na mga bagay asin pagtotokdo nin relihion sa mga aki. Paano niato madadagka an mas dakol na lalaki na makamate kan saindang espirituwal na pangangaipo asin mag-iba sa sato sa tunay na pagsamba?
2. Paano nagbunga nin marahay an mga paghihingoa ni Pablo asin Pedro na magpatotoo sa mga lalaki?
2 Paghanap sa mga Lalaki: Kun akoon nin sarong payo nin pamilya an katotoohan, sa parate naiimpluwensiahan nia an mga kapamilya na mag-iba sa saiya sa dalisay na pagsamba. Halimbawa, mantang nakabilanggo si Pablo asin Silas huli sa paghuhulit ninda, nagpatotoo sinda sa bantay sa bilanggoan. Nabautismohan an lalaki asin an gabos na kairiba nia sa harong. (Gibo 16:25-34) Bilang resulta kan paghuhulit ni Pablo sa Corinto, “si Crispo na nangengenot na opisyal sa sinagoga nagtubod sa Kagurangnan, asin iyo man an gabos niang kasararo sa harong.” (Gibo 18:8) Ginamit ni Jehova si Pedro tanganing magpatotoo ki Cornelio, sarong opisyal kan hukbo na ilinadawan bilang “tawong deboto asin saro na natatakot sa Dios.” Nabautismohan si Cornelio, kaiba kan saiyang mga paryente asin dayupot na mga katood.—Gibo 10:1-48.
3. Bilang pag-arog ki Felipe, siisay na “nasa halangkaw na katongdan” an puede nindong patotoohan?
3 An pagpapatotoo sa mga lalaking “nasa halangkaw na katongdan” puedeng magkaigwa nin mahiwas na epekto. (1 Tim. 2:1, 2) Halimbawa, sinabihan kan anghel ni Jehova si Felipe na kaolayon an “sarong lalaking nasa kapangyarihan” na namamahala sa gabos na kayamanan kan reyna kan mga taga Etiopia. Nadangog ni Felipe an lalaki “na binabasa nin makosog an libro ni Isaias na propeta” asin ipinaliwanag nia sa saiya an maogmang bareta manongod ki Jesus. An Etiopeng ini nagin disipulo asin posibleng marhay na nagbalangibog kan maogmang bareta mantang nagbibiahe pasiring sa dagang tinuboan nia. Posibleng nagpatotoo man sia sa reyna asin sa mga nasa palasyo nia, mga tawong limitado kutana an oportunidad na makadangog kan maogmang bareta.—Gibo 8:26-39.
4. Paano niato matatawan nin mas dakol na oportunidad an mga lalaki na madangog an maogmang bareta?
4 Hulitan an Mas Dakol na Lalaki: Huling an mga lalaki parateng nasa saindang trabaho kun aldaw, puede daw nindong iareglo an saindong iskedyul tanganing maggamit nin mas dakol na oras sa ministeryo kun banggi, sa mga katapusan kan semana, o kun piesta opisyal? An paghuhulit nin regular sa komersial na teritoryo makakatao sa saindo nin dagdag na mga oportunidad na magpatotoo sa mga lalaki na bihirang nasa harong. Puede man na gumibo nin espesyal na paghihingoa an mga tugang tanganing impormal na magpatotoo sa saindang mga katrabahong lalaki. Sa ministeryo sa harong-harong, nangorogna sa teritoryong pirmeng nagigibo, kun minsan an payo kan pamilya an puedeng hanapon kan mga tugang tanganing kaolayon.
5. Ano an maninigong gibohon nin sarong tugang na babae kun may nanompongan siang lalaki na naghimate sa mensahe kan Kahadean?
5 Dai maninigo na solong magdalaw liwat an sarong tugang na babae na may nakaolay na lalaki na naghimate sa katotoohan. Puede niang iiba an saiyang agom o saro pang parahayag. Mantang nag-ooswag an interesadong tawo, sa pangkagabsan pinakamarahay na itao sia sa kualipikadong tugang na lalaki tanganing iyo an magdalaw sa saiya.
6. Paano niato puedeng arogon si apostol Pablo tanganing ‘madara an pinakadakol’?
6 Pumili nin mga Tema na Interesante sa mga Lalaki: Inisip ni apostol Pablo an mga nagdadangog sa saiya asin ibinagay nia sa sainda an saiyang pakikipag-olay tanganing ‘madara nia an pinakadakol.’ (1 Cor. 9:19-23) Siring man, maninigo niatong pag-isipan kun anong mga tema an posibleng marhay na magigin interesante sa mga lalaking tibaad manuparan niato asin pag-andaman niato iyan. Halimbawa, an mga lalaki sa parate interesado manongod sa mga kadepisilan sa ekonomiya, marahay na gobyerno, asin pag-asikaso sa kaligtasan saka seguridad kan saindang pamilya. Tibaad interesado man sinda sa katuyohan nin buhay, sa mangyayari sa daga, asin kun taano ta itinotogot nin Dios an pagsakit. Mas aakoon an satong presentasyon kan mensahe kan Kahadean kun nagpapaheling kita nin siring na pakarorop sa satong pakikipag-olay.—Tal. 16:23.
7. Paanong an gabos sa kongregasyon puedeng magkaigwa nin positibong epekto sa daing pagtubod na mga agom na lalaki na nag-atender sa pagtiripon?
7 Hingoahon na Tabangan an Daing Pagtubod na mga Agom na Lalaki: Minsan ngani sa parate an marahay na paggawe kan satong Kristianang mga tugang an may pinakadakulang impluwensia sa saindang daing pagtubod na agom, an mga miembro kan kongregasyon puede man na magkaigwa nin positibong epekto. (1 Ped. 3:1-4) Kun iniibanan kan daing pagtubod na agom na lalaki an saiyang agom sa sarong pagtiripon, an maogmang pag-ako sa saiya kan kongregasyon magigin mapuersang patotoo. An saiyang presensia posibleng marhay na nagpaparisa na medyo may interes sia sa katotoohan, asin tibaad gusto niang mag-ako nin pag-adal sa Biblia.
8. Paano puedeng hingoahon nin mga tugang na lalaki na tabangan an daing pagtubod na mga agom na lalaki na nagpaheling nin kadikit na interes sa katotoohan?
8 Sa ibong na lado, may mga agom na lalaki na sa primero daing gayo interesado sa espirituwal alagad tibaad pag-abot nin panahon gusto nang makipag-olay dapit sa Biblia sa tugang na lalaki na komportable sinda. An mga tugang na lalaki sa sarong kongregasyon nagpaheling nin espesyal na paghihingoa kan dinadalaw ninda kun minsan an sarong pamilya na bakong Saksi an ibang miembro tanganing makipag-estoryahan sa daing pagtubod na agom na lalaki manongod sa mga bagay na aram nindang interesado sia. Sa kahurihurihi, ini nagresulta sa espirituwal na mga pag-oolay, asin ngonyan bautisado na sia. Sa saro pang pangyayari, tinabangan nin sarong tugang na lalaki an sarong makikatood na daing pagtubod na agom na lalaki na maglaag nin kudal sa palibot kan harong nia. Huli sa pagpaheling nin personal na interes sa paaging ini, naponan an sarong pag-adal sa Biblia. (Gal. 6:10; Fil. 2:4) Kun ika sarong Kristianong lalaki, taano ta dai hingoahon na tabangan an saro o labi pa sa daing pagtubod na mga agom na lalaking ini?
9. Ano an puedeng magin resulta kan pagsasanay sa Kristianong mga lalaki?
9 Sanayon Para sa Ngapit: An mga lalaki na naghimate sa mensahe kan Kahadean asin naghihingoang maabot an mga pribilehio nin paglingkod ki Jehova puedeng makabilang sa “balaog na mga lalaki,” an Kristianong kamagurangan na ginagamit an saindang mga kakayahan asin kosog para sa mga kongregasyon kan banwaan ni Jehova. (Efe. 4:8; Sal. 68:18) An siring na mga lalaki gikan sa boot asin may kaigotan na nagpapastor sa kongregasyon. (1 Ped. 5:2, 3) Sinda bendisyon nanggad sa bilog na kasararoan nin mga tugang!
10. Paano nakinabang an dakol sa mga paghihingoa ni Ananias na tabangan si Pablo?
10 Halimbawa, si Saulo nagin “apostol sa mga nasyon,” minsan ngani sia dating parapersegir sa mga Kristiano. (Roma 11:13) Kan primero, an disipulong si Ananias nag-alangan na maghulit ki Saulo huli sa dahelan na ini. Minsan siring, sinunod ni Ananias an instruksion kan Kagurangnan asin kinaolay nia an lalaki na nagin si apostol Pablo. Sa pag-agi nin mga taon, an ministeryo ni Pablo nagtao nin pakinabang sa rinibong nakadangog sa saiyang paghuhulit saka sa minilyon na padagos na nakikinabang sa ipinasabong na mga surat nia na nakasurat sa Tataramon nin Dios.—Gibo 9:3-19; 2 Tim. 3:16, 17.
11. Taano ta maninigo niatong gibohon an ano man na kinakaipuhan na pagliliwat tanganing magpatotoo sa mga lalaki?
11 Kun siring, gibohon logod niato an ano man na kinakaipuhan na pagliliwat tanganing atubangon an kadepisilan sa pagpapatotoo sa mga lalaki. Mantang pinagmamaigotan niato na magibo an pasohan na ini, nakakasierto kita na bebendisyonan ni Jehova an satong maigot na paghihingoa na gibohon an saiyang kabotan asin asikasohon na marhay an intereses kan Kahadean.