Puede Mo daw na Amigohon an Bakong Kapagtubod na Agom?
1. Taano ta bako sanang an mga Kristiano na an pamilya bakong gabos Saksi an interesado sa pagtabang sa saindang bakong kapagtubod na agom na akoon an katotoohan?
1 An nagkapirang parahayag daw sa saindong kongregasyon bakong kapagtubod an agom? Kun iyo, daing duda na an mga parahayag na ini nagmamawot na makaibanan ninda sa tunay na pagsamba an saindang agom. Alagad bako sana sinda an nagmamawot kaiyan. An bilog na kongregasyon nagpapabanaag kan pagmawot nin Dios na “an gabos na klase nin tawo makaligtas asin makaabot sa tamang kaaraman dapit sa katotoohan.” (1 Tim. 2:4) Paano kita makakapaghingoa na amigohon an mga bakong kapagtubod na agom kan mga parahayag sa satong kongregasyon?
2. Sa pagtabang sa bakong kapagtubod na agom, paano makakatabang sa sato an pagkaigwa nin pakarorop?
2 Enot, maninigo tang mansayon an mga bagay-bagay sa punto de vista kan bakong kapagtubod. An dakol na bakong kapagtubod na agom namomotan an saindang pamilya asin naghihingoang magin marahay na agom saka magurang. Tibaad sinsero sindang nagtutubod sa relihiosong mga paniniwala na laen kan sa sato. Tibaad an aram sana ninda manongod sa Mga Saksi ni Jehova iyo an sinabi sa sainda kan daing pakaaram asin may kinakampihan na mga kaibaiba ninda. An nagkapira naaanggot huling an oras na dating ginagamit kan saindang agom kaiba kan pamilya ginagamit na ngonyan sa pagsamba. An pakarorop makakatabang sa sato na trataron nin maboot saka magalang an sarong bakong kapagtubod asin na daing gayo nerbioson kun kaibanan niato sia.—Tal. 16:20-23.
3. Ano an tibaad pinakamarahay na paagi tanganing madara sa katotoohan an sarong bakong kapagtubod?
3 Personal na Interes: Tibaad an pinakamarahay na paagi na madara sa katotoohan an bakong kapagtubod na agom iyo an pagpaheling nguna nin marahay na gawe-gawe bago an pakikipag-olay manongod sa Biblia. (1 Ped. 3:1, 2) Mahalaga digdi an pagpaheling nin personal na interes. Puedeng magpaheling nin interes an mga tugang na babae sa bakong kapagtubod na agom na babae, asin an mga tugang na lalaki sa bakong kapagtubod na agom na lalaki. Paano?
4. Paano niato puedeng ipaheling an personal na interes?
4 Kun dai pa nindo nakamidbid an agom, tibaad puede nindong gibohon iyan pagkatapos na ipakipag-olay iyan sa Kristianong agom. Dai madesganar kun sa enot medyo bakong marahay an reaksion kan bakong kapagtubod. Tibaad huli sa satong pakikikatood asin personal na interes magin mas paborable an pagmansay nia sa Mga Saksi ni Jehova. (Roma 12:20) Iniimbitaran nin nagkapirang maygurang na Kristiano na makaibanan sa pagkakan an sarong bakong kapagtubod asin an pamilya kaini, tanganing orog na magkamiridbidan asin mahale an ano man na salang saboot. Pinag-oolayan ninda an pinagkakainteresan nia, imbes na ipirit na darahon an orolay sa espirituwal na mga tema. Paghaloyhaloy, kun mas pamugtak na an boot kan bakong kapagtubod, tibaad puede nang isingit an tema na sono sa Kasuratan. O tibaad akoon na nia an imbitasyon na umatender sa saro sa satong mga pagtiripon tanganing aramon kun ano an pinag-aadalan kan saiyang agom, nangorogna huling bistado na nia an nagkapira sa kongregasyon. Dawa dai pa sia andam na magsiyasat kan katotoohan, puede nanggad siang komendaran huli sa suporta nia sa saiyang agom na Saksi.
5. Paano an kamagurangan makakapaghingoa na amigohon an bakong kapagtubod?
5 An kamagurangan an nangorognang maninigong maghingoa na amigohon an bakong kapagtubod na mga agom asin magin alisto sa mga oportunidad na magpatotoo. An sarong bakong kapagtubod na habong makipag-olay manongod sa Biblia tibaad magdangog sa pagparigon sa boot na sono sa Kasuratan kun sia maospital o magkaigwa nin seryosong problema sa salud. Kun nag-aagi nin magabat na problema an sarong pamilya na bakong gabos Saksi, arog baga nin pagkagadan nin sarong kapamilya, an bakong kapagtubod puedeng agdahon kan mga magurang sa kongregasyon na magin presente kun rinaranga ninda an pamilya.
6. Ano an mga dahelan na maghingoa na amigohon an bakong kapagtubod na mga agom?
6 Imahinara an kaogmahan na mamamatean nin sarong Kristiano sa satong kongregasyon kun an saiyang agom maghimate asin mag-ako kan katotoohan! An siring na maogmang pangyayari magpapagayagaya man na marhay ki Jehova, sa mga anghel, asin sa iba pa sa kongregasyon. (Luc. 15:7, 10) Minsan siring, kun sa enot dai maghimate an bakong kapagtubod, makakapaggayagaya pa man giraray kita huling an padagos tang paghihingoa nakakapaogma ki Jehova, na ‘dai nagmamawot na an siisay man malaglag kundi nagmamawot na an gabos makapagsolsol.’—2 Ped. 3:9.
[Blurb sa pahina 6]
Tibaad an pinakamarahay na paagi na madara sa katotoohan an bakong kapagtubod na agom iyo an pagpaheling nguna nin marahay na gawe-gawe bago an pakikipag-olay manongod sa Biblia