Paano Kamo Masimbag?

1. Taano ta maninigo niatong isipon an halimbawa ni Jesus kun may maghapot sa sato?

¹ Sagkod sa panahon na ini, hinahangaan kan mga tawo an epektibong paagi nin pagsimbag ni Jesus sa mga hapot. Kun mapaatubang kita sa manlaenlaen na klase nin hapot mantang kita nasa ministeryo, marahay na arogon niato si Jesus sa bagay na ini.—1 Ped. 2:21.

2. Ano an puedeng makatabang sa sato tanganing epektibo niatong masimbag an sarong hapot?

² Maghinanyog Nguna: Inisip ni Jesus an punto de vista kan naghahapot. Kun minsan, kaipuhan niatong magpalataw nin mga hapot tanganing maaraman kun ano talaga an gustong maaraman kan naghahapot. An saro na naghahapot na, “Naniniwala kamo ki Jesus?” tibaad an talagang iniisip iyo na kun taano ta dai kamo nagseselebrar nin Pasko. Kun aram nindo an talagang iniisip kan naghahapot, makakapangatanosan kamo sa saiya nin mas epektibo.—Luc. 10:25-37.

3. Ano an yaon sa sato na makakatabang sa paghanap nin nakakakontentong mga simbag na sono sa Kasuratan?

³ Magsimbag na Ginagamit an Tataramon nin Dios: Sa parate, an pinakamarahay iyo na ipaheling kun ano an simbag kan Biblia sa hapot. (2 Tim. 3:16, 17; Heb. 4:12) An librong Reasoning asin an “Bible Topics for Discussion” sa New World Translation of the Holy Scriptures nakakatabang sa pagtao kan tama nanggad na simbag. Minsan ngani dai inaako kan naghahapot an Biblia bilang autoridad, tibaad puede nindong mataktikang sabihon kun ano an itinotokdo kan Kasuratan. Dagkahon sia na seryosong pag-isipan an probado na sa halawig na panahon na kadonongan na makukua sa Biblia. Paagi sa pag-arog nindo ki Jesus, an saindong mga simbag magigin “siring sa mga mansanas na bulawan sa mga inukit na plata”—may dignidad, magayon, asin mapapakinabangan na marhay.—Tal. 25:11.

4. Sa anong mga kamugtakan pinakamarahay na dai hingoahon na simbagon an gabos na hapot?

⁴ Maninigo daw Niatong Simbagon an Gabos na Hapot? Kun dai nindo aram an simbag sa sarong hapot, dai masupog na magsabi: “Dai ko aram an simbag, alagad puede akong magsiyasat dapit sa hapot mo asin mabalik ako tanganing ipaheling sa saimo an nasiyasat ko.” An siring na kababaan nin boot asin personal na interes puedeng magpahiro sa kagharong na pabalikon kamo. Kun marisa nindo na an naghahapot sarong nagtutumang na tibaad gustong magpoon nin argumento, arogon si Jesus paagi sa paglimitar sa simbag nindo. (Luc. 20:1-8) Kaagid kaiyan, kun hingoahon nin sarong tawo, na dai man talaga interesado sa katotoohan, na makipagdebate sa saindo, magalang na taposon an pag-oolay asin gamiton an saindong panahon sa paghanap sa mga sinsero.—Mat. 7:6.

5. Anong arogan an itinao ni Jesus sa pagsimbag sa mga hapot?

⁵ Aram ni Jesus na an pagsarig ki Jehova mahalagang marhay sa pag-otob nia kan saiyang asignasyon na “magpatotoo sa katotoohan,” na kaiba an pagsimbag sa sinserong mga hapot. (Juan 18:37) Sarong pribilehio nanggad niato na arogon si Jesus sa pagsimbag sa mga “may tamang inklinasyon sa buhay na daing katapusan”!—Gibo 13:48.