Maghulit na May Pagkaapurado!
1. Anong sadol ni Pablo an nangangaipo nin atension sa panahon niato?
1 “Ihulit mo an tataramon, gibohon iyan na may pagkaapurado.” (2 Tim. 4:2) Taano ta an sadol ni Pablo importanteng marhay sa panahon niato? Ano an puedeng magin epekto kan mga tataramon na ini sa buhay niato asin nin iba?
2. Taano ta mahigos niatong hinahanap an mga dai pa nakadangog kan maogmang bareta?
2 Buhay an Kalabot: Minilyon na tawo sa bilog na kinaban an kaipuhan pang makadangog kan maogmang bareta na puedeng magresulta sa saindang kaligtasan. (Roma 10:13-15; 1 Tim. 4:16) Dakol na sadiosan an puso an nanonompongan sa teritoryo na parateng ginigibo. Kun kita madalaw sa ibang aldaw o sa ibang oras kan aldaw, tibaad manompongan niato an ibang tawo. An siring na mahigos na paghanap maresulta sa pagkaigwa niato nin malinig na konsensia asin pagigin daing kasalan sa dugo.—Gibo 20:26.
3. Paano niato madonong na magagamit an satong panahon sa ministeryo?
3 Sa ibong kan madahas na pagtumang, an mga Kristiano kan enot na siglo ‘linakopan an Jerusalem kan saindang katokdoan.’ (Gibo 5:28) Kita daw determinado man na “magtao nin lubos na patotoo”? (Gibo 10:42) Kun nasa ministeryo, madonong daw niatong ginagamit an panahon? Kun kita naghahalat mantang an iba nagdadalaw liwat, kita daw nagsasadiring boot na kaolayon an mga nag-aagi?
4. Paano an paghuhulit na may pagkaapurado nakakatabang sa sato na padagos na magbantay?
4 Dinadagdagan an Satong Pagigin Alisto: Huling harani na an katapusan kan sistemang ini nin mga bagay, dapat kitang magdanay na alisto, na padagos na nagbabantay. (1 Tes. 5:1-6) Kun kita regular na nagtataram manongod sa satong paglaom sa Kahadean, nalilikayan niato na mapagabatan kan sistemang ini nin mga bagay. (Luc. 21:34-36) Dangan, mantang pinapagdadanay niatong “harani sa isip” an aldaw ni Jehova, napapahiro kita na dugangan an satong pakikikabtang sa nagliligtas-buhay na paghuhulit.—2 Ped. 3:11, 12.
5. Paano an paggalang sa buhay nakakamotibar sa sato sa ministeryo?
5 Kun kita naghuhulit na may pagkaapurado, ipinapabanaag niato an pagmansay ni Jehova sa buhay: “Dai nia mawot na an siisay man malaglag kundi mawot nia na an gabos makapagsolsol.” (2 Ped. 3:9; Ezeq. 33:11) Logod na kita magin determinado na makaolay an pinakadakol na mapupuede sa satong teritoryo, gabos iyan para sa kaomawan ni Jehova!—Sal. 109:30.