Pirmeng Magin Andam na Mag-alok nin Pag-adal sa Biblia
1. Ano an kalabot sa pag-otob kan sugo ni Jesus sa Mateo 28:19, 20?
1 Isinugo kita ni Jesus na ‘gumibo nin mga disipulo . . . , na tokdoan sinda.’ (Mat. 28:19, 20) Kun siring, boot niatong magin andam na mag-alok nin pag-adal sa Biblia sa gabos na panahon, bako sana sa aldaw sa katapusan kan semana na espesyalmenteng itinagama sa pag-alok nin mga pag-adal sa Biblia. An minasunod na mga suhestion puedeng makatabang.
2. Sairisay an puede niatong alokan nin pag-adal sa Biblia?
2 Ialok Iyan: Kun mas parate kitang nag-aalok nin pag-adal sa Biblia, mas dakol kitang oportunidad na magkaigwa nin inaadalan sa Biblia. (Ecl. 11:6) Prinobaran na daw nindo an direktang pagdolok? Sarong kongregasyon sa Estados Unidos an nagmaigot na gibohon ini sa bilog na sarong bulan. Ikinaogma nindang marhay na makapoon nin 42 na bagong pag-adal sa Biblia! Dai paghonaon na aram kan mga interesadong dinadalaw nindo na nagkokondukta kamo nin mga pag-adal sa Biblia. Sa sunod na pagdalaw nindo, taano ta dai mag-alok nin pag-adal? Mayo man problema kun magsayuma sinda. Puede nindong padagos na pataluboon an interes ninda. Nahapot na daw nindo an saindong mga kataed, paryente, katrabaho, asin kaeskuela kun gusto nindang makipag-adal sa saindo sa Biblia? Puede man nindong hapoton an mga inaadalan nindo sa Biblia kun igwa sindang mga kaamigo o paryente na maoogmang makipag-adal sa Biblia.
3. Igwa kita nin anong mahalagang pantabang sa pagpoon nin mga pag-adal sa Biblia, asin noarin niato iyan puedeng gamiton?
3 Mahalagang Pantabang: An sarong mahalagang pantabang sa pagpoon nin mga pag-adal sa Biblia iyo an pulyetong Gusto daw Nindong Maaraman an Katotoohan? Puede nindong itao iyan sa mga kagharong mag-ako man sinda o dai nin ibang literatura. Puede iyan na gamiton kun naghuhulit sa komersial na teritoryo, kun naghuhulit sa tinampo, kun nagpapadara nin mga surat, asin kun nagdadalaw liwat. Puede man iyan na iwalat sa mga harong na mayong tawo. Taano ta dai magdara kaiyan kun kamo naglulunad sa pampublikong mga sasakyan, namamakal, o nasa trabaho? An likod na pahina kaiyan may halipot na paliwanag dapit sa satong areglo na pag-adal sa Biblia asin iiniintrodusir an librong Itinotokdo kan Biblia.
4. Paano niato puedeng gamiton an pulyetong Maaraman an Katotoohan tanganing makapoon nin pag-adal sa Biblia?
4 Pagkatao kan pulyeto, puede nindong itokdo an mga hapot sa enot na pahina asin maghapot, “Arin sa mga hapot na ini an pinakainteresante para sa saimo?” Dangan pag-olayan an simbag na nasa pulyeto, asin basahon o sumaryohon an nasa likod na pahina, na nagpapaliwanag kan areglo niatong pag-adal sa Biblia. Dangan puede nindong ipaheling sa saiya kun saen makukua sa librong Itinotokdo kan Biblia an dagdag na impormasyon dapit sa temang iyan, ialok an libro, asin gumibo nin areglo na bumalik tanganing ipagpadagos an pag-oolay.
5. Taano ta maninigo kitang magin pirmeng andam na mag-alok nin pag-adal sa Biblia?
5 May mga tawo pa sa teritoryo niato na nagmamawot na makanood kun ano man nanggad an itinotokdo kan Biblia. Paagi sa pagigin pirmeng andam na mag-alok nin pag-adal sa Biblia, madudugangan an mga oportunidad niato na magin magayagaya huli sa pagtabang sa iba pasiring sa dalan nin buhay.—Mat. 7:13, 14.