Magdanay na Nakapokus sa Paggibo nin mga Disipulo
1. Ano an kaipuhan na gibuhon para makaligtas an mga tawo?
1 Ipinapahiling kan taunan na report sa paglilingkod kan 2014 an kaigutan kan banwaan nin Diyos asin an determinasyon nindang ihulit an maugmang bareta kan Kahadian. (Mat. 24:14) Paagi sa pagharong-harong, espesyal na mga kampanya sa pagdistribwir nin mga tract asin imbitasyon, saka pagpapatotoo sa publiko, naipapaabot niyato sa mas dakul na tawo an mensahe kan Bibliya. Pero, para makaligtas an mga tawo, kaipuhan na tabangan ta sindang magin disipulo ni Jesus paagi sa pagtutukdo nin Bibliya.—1 Tim. 2:4.
2. Anong mga hapot an makakatabang sa sato na magin pirming andam na mag-alok nin pag-adal sa Bibliya?
2 Magin Pirming Andam na Mag-alok nin Pag-adal sa Bibliya: Kun may interesado, hinihinguwa mo daw na kuanon an numero kan saiyang telepono o cellphone dangan balikan siya tulos para makapuon nin pag-adal? Kasuarin ka huring nagpurbar na ipahiling kun paano ginigibo an pag-adal sa inot na pakikipag-ulay? Kasuarin ka huring nag-alok nin pag-adal sa ruta mo nin magasin? Naipahiling mo na daw an mga video na Ta’no ta Kaipuhan Mag-adal nin Bibliya? asin Paano Ginigibo an Pag-adal sa Bibliya? sa mga katrabaho, kaeskuwela, kataraid, paryente, asin iba pang kamidbid mo? Kun naggagamit nin displey nin mga literatura, hinihinguwa mo daw na ipaaram sa mga nagkukua nin publikasyon para sa pag-adal na nag-aalok kita nin libreng pag-adal sa Bibliya?
3. Ano an kaipuhan tanganing ikatukdo an katotoohan?
3 Tabang Hali ki Jehova Asin ki Jesus: Kan magbuot si Jesus na ‘gumibo kamo nin mga disipulo,’ pinunan niya iyan sa mga tataramon na “paduman kamo.” Ipinaparisa niya na kaipuhan tang maghinguwa asin magkaigwa nin inisyatiba. Pero, dai niya kita pinabayaan huling siya nanuga na makakaibanan ta siya. (Mat. 28:19, 20) Saro pa, itinao ni Jehova sa sato an saiyang banal na espiritu pati an mga kasangkapan asin pagsasanay na kaipuhan ta sa pagtutukdo kan katotoohan. (Zac. 4:6; 2 Cor. 4:7) Puwede tang ipamibi na magkaigwa kan “pagmawot sagkod kan puwersa” na makikabtang sa importanteng gibuhon na ini.—Fil. 2:13, NW.
4. Taano ta dapat kitang magdanay na nakapokus sa paggibo nin mga disipulo?
4 An paghuhulit kan maugmang bareta nagtatao sa sato nin dakulang kaugmahan. Pero, nadadagdagan an satong kaugmahan kun may tinutukduan kita kan katotoohan asin tinatabangan ta siya na umiba sa sato sa “dalan na pasiring sa buhay.” (Mat. 7:14; 1 Tes. 2:19, 20) An mas mahalaga, paagi sa pagdanay niyatong nakapokus sa paggibo nin mga disipulo, napapaugma ta si Jehova huling ‘dai niya mawot na an siisay man mapahamak kundi na an gabos makapagsulsol.’—2 Ped. 3:9.