Igo Na daw an Ginigibo Ko?

1. Ano an tibaad ikinakahadit nin sarong maimbod na Kristiano?

¹ Ihinapot na daw nindo iyan sa saindong sadiri? Tibaad nainaan na an saindong pakikikabtang sa ministeryo huli sa paggurang, problema sa salud, o nadugangan na mga responsabilidad sa pamilya, na ikinakadesganar nindo. Sarong tugang na babae na may tolong aki an nagsurat na kun beses nakokonsensia sia huling an panahon asin kosog na kaipuhan sa pag-asikaso sa saiyang pamilya nakakalimitar sa nagigibo nia sa ministeryo. Ano an makakatabang sa sato na mansayon nin timbang an mga bagay-bagay?

2. Ano an inaasahan sa sato ni Jehova?

² Kun Ano an Inaasahan sa Sato ni Jehova: Daing duda, kita gabos gustong gumibo nin orog pa sa ministeryo. Alagad sa parate igwa nin dakulang pagkakalaen an gusto niatong gibohon asin an realistiko na kaya niatong gibohon. An bagay na gusto niatong gumibo nin orog pa nagpapaheling na kita bakong kampante. Maninigo niatong girumdomon na aram na marhay ni Jehova an satong mga limitasyon asin dai sia naghahagad nin labi pa sa rasonable na kaya niatong gibohon. (Sal. 103:13, 14) Ano an inaasahan nia sa sato? Gusto nia na maglingkod kita sa saiya nin bilog na kalag, na itao sa saiya an satong pinakamakakaya.—Col. 3:23.

3. Paano niato puedeng turotimbangon an ginigibo niatong paghihingoa sa ministeryo?

³ Ano an makakatabang sa sato na madeterminaran kun ano an realistiko para sa sato? Puede kitang makiolay ki Jehova na tabangan kita na makatanosan na mansayon an satong situwasyon. (Sal. 26:2) Puede man na makatabang an sarong pinagtitiwalaan, maygurang na Kristianong katood na nakakamidbid na marhay sa sato asin dai natatakot na sabihon sa sato kun kita may dapat na paoswagon. (Tal. 27:9) Girumdomon man na mantang nagbabago an mga kamugtakan, kapakipakinabang na regular na turotimbangon an satong situwasyon.—Efe. 5:10.

4. Paano niato maninigong mansayon an mga pagirumdom na basado sa Biblia mapadapit sa ministeryo?

⁴ Kun Paano Mamansayon an mga Pagirumdom: Sa sarong paorumbasan, an mga nagheheling sa parate nagkukurahaw nin pampakosog nin boot. An katuyohan iyo na tabangan an mga paradalagan na makaabot sa pasohan ninda, bakong paluyahon an saindang boot. Kaagid kaiyan, an pamparigon sa boot asin mga pagirumdom na basado sa Biblia—na itinatao sa satong mga pagtiripon saka publikasyon—na ‘ihulit an tataramon na may pagkaapurado,’ para sa kapakinabangan niato asin dai nagpaparisa na an satong paghihingoa garo baga kulang. (2 Tim. 4:2) Makakapagtiwala kita na sagkod na padagos kitang naghihingoang gibohon an satong pinakamakakaya, may pag-oyon na gigirumdomon ni Jehova an satong ‘pagkamoot asin mga gibo.’—Heb. 6:10.