An mga Pagirumdom daw ni Jehova Nakapupukaw sa Sato sa Espirituwal?
1 Si Jehova inomaw kan salmista, na sinasabi: “An saimong mga pagirumdom sakong pinaghohorophorop.” (Sal. 119:99) An Hebreong termino para sa “mga pagirumdom” nagpapasabot kan ideya na ibinabalik ni Jehova sa satong isip an sinasabi sa saiyang mga togon. Kun kita maghimate, pupukawon kita kaiyan sa espirituwal asin gigibohon kitang maogma.—Sal. 119:2.
2 Bilang banwaan ni Jehova, regular kitang nag-aako nin hatol. Kadaklan kaiyan nadangog na niato kaidto. Minsan ngani inaapresyar niato an hatol na ini, may inklinasyon kitang malingaw. (Sant. 1:25) Si Jehova mapasensiang nagtatagama nin mamomoton na mga pagirumdom. Si apostol Pedro nagrekord nin nagkapirang pagirumdom tanganing ‘pukawon an satong malinaw na pag-isip.’—2 Ped. 3:1.
3 Kita paorootrong pinagigirumdom manongod sa halaga nin personal na pag-adal asin pag-atender sa mga pagtiripon. Ginigibo ini huli ta an mga aktibidad na ini kaipuhan na marhay sa satong espirituwal na ikararahay.—1 Tim. 4:15; Heb. 10:24, 25.
4 An pinakadakulang angat sa nagkapira iyo an pag-otob sa Kristianong kasugoan na maghulit. Nangangaipo iyan nin pagmamaigot asin determinasyon. Pero, tinatabangan kitang ‘manindogan nin marigon’ sa paagi na an satong “bitis nasasapinan kan kasangkapan kan maogmang bareta.”—Efe. 6:14, 15.
5 Pinagigirumdom kita ni apostol Pablo na an puso nagtatao kan motibasyon na kaipuhan niato sa ‘pagpapahayag sa publiko para sa kaligtasan.’ (Roma 10:10) Kun satong ikikiling an satong puso sa mga pagirumdom ni Jehova, kita mapipiritan na magtaram sa pag-omaw sa saiyang ngaran.—Sal. 119:36; Mat. 12:34.
6 Kun kita maigot sa paggibo nin marahay, tama sanang maglaom kita na ini madara sato nin kagayagayahan. (Ecl. 2:10) Ipinamidbid ni Pablo an kagayagayahan bilang bunga kan espiritu ni Jehova. (Gal. 5:22) Idinagdag ni Pedro na an “odok na paghihingoa” babalosan nin mabungang ministeryo, na nagbubunga nin kagayagayahan.—2 Ped. 1:5-8.
7 Kun kita napaaatubang sa sarong angat, dapat na girumdomon niato an marigon na paninindogan kan mga apostol mantang ipinahahayag ninda, “dai kami puedeng mag-ontok sa pagtaram dapit sa mga bagay na samong naheling asin nadangog.” (Gibo 4:20) Kita napakokosog na magpadagos kun satong ginigirumdom na ‘sa paggibo niato kaini ililigtas niato an sato man sana asin idtong naghihinanyog sa sato.’—1 Tim. 4:16.
8 Dai kita nakamamate nin pagsentir huli ta dayaday kitang nag-aako nin mga pagirumdom. Imbes, odok niatong inaapresyar an daing kaagid na halaga kaiyan. (Sal. 119:129) Sa delikadong mga panahon na ini, nagpapasalamat kita na danay kitang pinaaabotan ni Jehova nin mga pagirumdom na mapukaw sato sa espirituwal asin mamotibar sato na magin maigot sa marahay na mga gibo!—2 Ped. 1:12, 13.