Bako daw na Nadangog na Niato Iyan Kaidto?
1 Siempre iyo! Dakol an inootro ni Jehova sa saiyang Tataramon para sa kapakinabangan kan saiyang banwaan. Parateng inotro ni Jesus an saiyang mga katokdoan manongod sa manlaenlaen na aspekto kan Kahadean. Padagos na rinepaso kan saiyang mga apostol an espirituwal na mga bagay duman sa mga tawo na marigon na napapasikad sa katotoohan.—Roma 15:15; 2 Ped. 1:12, 13; 3:1, 2.
2 Sa satong panahon iinareglo kan organisasyon ni Jehova na an importanteng mga tema paorootrong repasohon sa mga pagtiripon kan kongregasyon. May nagkapirang publikasyon na paorootro nang pinag-adalan. Iyo, importante na madangog an mga bagay na nadangog na niato kaidto!
3 Napaninigoan nin Pag-otro an Sarong Mahalagang Marhay na Pangangaipo: An mga pagirumdom ni Jehova nagpapararom kan satong pakasabot, nagpapahiwas kan satong punto de vista, asin nagpapakosog kan satong determinasyon na magdanay sa tamang direksion sa espirituwal na paagi. (Sal. 119:129) An pagrepaso sa mga pamantayan asin prinsipyo nin Dios nakakaagid sa pagheling sa salming. Iyan nakatatabang sa sato na pakasiyasaton an satong sadiri asin kinokontra an tendensia na magin “malilingawon na paradangog.”—Sant. 1:22-25.
4 Kun dai niato padagos na ipagigirumdom sa satong sadiri an katotoohan, maiimpluwensiahan nin ibang bagay an satong puso. Pinakokosog kita kan mga pagirumdom nin Dios na labanan an nakararaot na mga impluwensia kan kinaban ni Satanas. (Sal. 119:2, 3, 99, 133; Fil. 3:1) An regular na mga pagirumdom na inaako niato mapadapit sa kaotoban kan mga katuyohan nin Dios pinahihiro kita na ‘magdanay na mapagbantay.’ (Mar. 13:32-37) An pag-otro sa Makakasuratan na mga katotoohan nakatatabang sa sato na magdanay sa dalan pasiring sa buhay na daing katapusan.—Sal. 119:144.
5 Kun Paano Personal na Makikinabang: Dapat niatong ‘ikiling an satong puso sa mga pagirumdom nin Dios.’ (Sal. 119:36) Kun kokonsideraron an sarong pamilyar na tema sa pagtiripon kan kongregasyon, maninigo na kita mag-andam nin patienot, hanapon an sitadong mga teksto, asin horophoropon kun paano niato ikaaaplikar an impormasyon. Dai niato paglaktawan an nasusurat na repaso sa Teokratikong Paadalan sa Pagmiministro, na iniisip na dai iyan kaipuhan. (Luc. 8:18) Nungka na bobooton niatong dai mag-atento huli ta parateng inootro an pundamental na mga katotoohan sa satong mga pagtiripon.—Heb. 5:11.
6 Logod na magin kapareho niato an aktitud kan salmista: “Paagi sa saimong mga pagirumdom ako naggayagaya nin labi-labi, siring sa gabos na iba pang mahalagang bagay.” (Sal. 119:14) Iyo, nadangog na niato an mahalagang mga bagay na ini kaidto, asin posibleng madadangog niato giraray iyan. Taano? Huli ta aram ni Jehova na kaipuhan niatong madangog iyan!