“An Kadonongan Napapatunayan na Matanos Paagi sa mga Gibo Kaiyan”
1. Paano minamansay nin nagkapira an satong gibohon?
1 Kun beses, kita napapaatubang sa negatibong reaksion nin mga kagharong na namimisinterpretar kita o natawan nin salang impormasyon manongod sa Mga Saksi ni Jehova. Tibaad an saindang pagmansay naimpluwensiahan na nin may kinakampihan na mga bareta sa media. Sa nagkapirang lugar, kita inaapod pa nganing “sarong peligrosong sekta.” Ano an maninigong magin reaksion niato kun napapaatubang sa siring na pagkritika?
2. Ano an makakatabang sa sato na malikayan an pagkadesganar kun napapaatubang sa pagkritika?
2 Papagdanayon an Positibong Saboot: Si Jesus asin an iba pang mga lingkod ni Jehova kan enot na siglo parateng namimisinterpretar asin pinapakaraot. (Gibo 28:22) Pero, dai ninda tinogotan an pagkritika na magin dahelan na ikasupog ninda an saindang ministeryo. Sinabi ni Jesus: “An kadonongan napapatunayan na matanos paagi sa mga gibo kaiyan.” (Mat. 11:18, 19) Padagos niang ginibo na may kaigotan an kabotan kan saiyang Ama, na may kompiansa na an halaga kan maogmang bareta magigin malinaw sa mga naghahanap kan katotoohan. Puede niatong malikayan an pagkadesganar paagi sa paggirumdom na an Aki mismo nin Dios nakaeksperyensia nin kaagid na pagtratar.
3. Taano ta dai kita maninigong magngalas sa negatibong mga bareta asin pagtumang?
3 Sinabi ni Jesus na an kinaban maoongis sa saiyang mga parasunod kun paanong iyan naongis sa saiya. (Juan 15:18-20) Kun siring, dai kita maninigong magngalas sa negatibong mga bareta asin pagtumang ngonyan. Sa katunayan, maninigo niatong asahan na magigin mas parate an siring na mga bagay mantang patapos na an huring mga aldaw asin mantang lalong nag-oorog an kaanggotan ni Satanas. (Kap. 12:12) Puede kitang maggayagaya huling ipinaparisa kaini na paubos na an oras kan kinaban ni Satanas.
4. Kun napapaatubang kita sa negatibong reaksion sa maogmang bareta, paano kita maninigong sumimbag?
4 Sumimbag na May Kabootan: Kun kita napapaatubang sa negatibong reaksion, maninigo na kita pirmeng sumimbag na may kabootan asin kahoyoan. (Tal. 15:1; Col. 4:5, 6) Kun itinotogot kan situwasyon, puedeng ikapaliwanag niato sa sinserong kagharong na dakol an salang impormasyon manongod sa Mga Saksi ni Jehova o makapaghapot kita sa saiya kun taano ta arog kaiyan an saboot nia. An satong mahoyong simbag tibaad magpangyari sa saiya na siyasaton an nadangog nia manongod sa Mga Saksi ni Jehova asin maghinanyog kun may Saksing dumalaw sa saiya sa ibang panahon. Minsan siring, kun an kagharong anggot na gayo, tibaad pinakamarahay na magalang na humale. Makakasierto kita na ano man an pagmansay sa sato nin iba, pinapahalagahan ni Jehova an satong ministeryo.—Isa. 52:7.