Ano an Magigibo Manongod sa Panluluya kan Boot?

PAANO malalabanan nin saro an panluluya kan boot? Ini an ihinapot sa nagkapirang nagbibiaheng paraataman, na regular na nagsosongko sa mga kongregasyon kan Mga Saksi ni Jehova. An simbag ninda makatatabang sa sato na analisaron an mga dahelan nin panluluya kan boot asin an mga remedyo sa kamugtakan na ini na puedeng makaapektar sa siisay man na Kristiano.

Bako sanang pag-analisar an kaipuhan sa pag-atubang sa panluluya kan boot, alagad puedeng kaiba sa mga sintomas an kadaihan nin interes sa pamimibi o sa personal na pag-adal, pagpapabaya sa pag-atender sa mga pagtiripon, kawaran nin entusiasmo, asin medyo pagkaindiperente pa ngani sa Kristianong kairiba. Minsan siring, an saro sa pinakarisang senyales iyo an pagluya kan kaigotan sa pag-ebanghelyo. Siyasaton ta an mga sintomas asin estudyaran an nagkapirang remedyo.

Panluluya kan Boot sa Satong Pag-eebanghelyo

Aram ni Jesu-Cristo an mga problema na kalabot sa sugo na paggibo nin mga disipulo. (Mateo 28:19, 20) Isinugo nia an saiyang mga parasunod bilang “mga karnero sa tahaw nin mga lobo,” sa pakaaram na an saindang paghuhulit magbubunga nin paglamag sa sainda. (Mateo 10:16-23) Pero, bako ining rason na manluya an saindang boot. Sa katunayan, an mga lingkod nin Dios na mapagngayongayong nagsarig ki Jehova sa parate napakokosog kan paglamag.—Gibo 4:29-31; 5:41, 42.

Dawa kan an mga disipulo ni Cristo dai nag-aagi nin makuring paglamag, bako pirmeng marahay an pag-ako sa sainda. (Mateo 10:11-15) Kaagid kaiyan, an paghuhulit kan Mga Saksi ni Jehova bako pirmeng pasil gibohon ngonyan.a Para sa dakol, an paniniwala sa Dios nasa tawo na sana na habo nindang pag-olayan. An iba habong makilabot sa sarong organisasyon na relihioso na dian medyo may mga prehuwisyo sinda. Daing duda, an pagkaindiperente, kadaihan nin bunga, o laen-laen na iba pang problema puedeng magin masakit daogon na mga ginigikanan nin panluluya kan boot. Paano mapapangganahan an mga balakid na ini?

Pagkamit nin Mas Marahay na mga Resulta

An kagayagayahan na nakukua niato sa satong ministeryo sa sarong kabtang konektado sa mga bungang nakakamtan. Kun siring, paano kita magkakaigwa nin orog na mabungang ministeryo? Bueno, kita “mga parasira nin mga tawo.” (Marcos 1:16-18) An mga parasira sa suanoy na Israel naninira kun banggi na iyong panahon na pinakadakol an madadakop ninda. Kaipuhan man na analisaron niato an satong teritoryo tanganing kita “makapanira” kun an mayoriya kan mga tawo nasa harong asin mas andam na umako kan satong mensahe. Ini puedeng sa banggi, sa katapusan nin semana, o sa iba pang panahon. Segun sa sarong nagbibiaheng paraataman, praktikal ini sa mga lugar na an mga tawo nagtatrabaho sa bilog na aldaw. Sinabi nia na an pagpapatotoo sa banggi parateng marahayon an ibinubunga. An pagpatotoo paagi sa telepono o sa impormal nagpapangyari man sa sato na maabot an mas dakol na tawo.

An pagmamaigot sa ministeryo nagbubunga nin marahay na mga resulta. Sa Sirangan na Europa asin sa nagkapirang nasyon sa Aprika, maoswag na marhay an gibohon na paghuhulit kan Kahadean, asin nagbunga ini nin awad-awad na aumento. Kaagid kaiyan, dakol na kongregasyon an naorganisar sa mga lugar na kaidto sinasabing bakong mabunga o sa mga teritoryo pa ngani na parateng marhay na ginigibo. Minsan siring, paano kun an saindong teritoryo daing ibinubungang siring kaiyan na mga resulta?

Pagpadanay nin Marahay na Aktitud

An malinaw na pagsaisip kan mga pasohan na ibinugtak ni Jesus makatatabang sa sato na dai manluya an boot sa atubangan nin pagkaindiperente sa ministeryo. Boot ni Cristo na hanapon kan saiyang mga disipulo an mga maninigo, bakong gumibo nin lagdoan na pangongombertir. Nagkapirang beses na sinabi nia na an dakulang mayoriya dai maako kan maogmang bareta, kun paanong an kadaklan na Israelita dai naghinanyog sa mga propeta kan suanoy.—Ezequiel 9:4; Mateo 10:11-15; Marcos 4:14-20.

‘An maogmang bareta kan kahadean’ inaako na may pagpasalamat nin mga indibiduwal na “nakamamate kan saindang espirituwal na pangangaipo.” (Mateo 5:3; 24:14) Boot nindang paglingkodan an Dios sa paagi na sinasabi nia nin espesipiko. Huli kaini, an mga bunga kan satong aktibidad mas konektado sa kamugtakan nin puso kan mga tawo kisa satong natural na abilidad sa pag-atubang kan mensahe. Siempre, kaipuhan na gibohon niato an satong pinakamakakaya na gibohon na nakaaakit an maogmang bareta. Pero, an mga resulta nakadepende sa Dios, ta si Jesus nagsabi: “Dai nin nakadodolok sa sako kun dai sia dagkahon kan Ama na nagsugo sa sako.”—Juan 6:44.

Paagi sa satong pag-eebanghelyo ikinapamimidbid an ngaran ni Jehova. Maghinanyog man o dai an mga tawo, an satong paghuhulit nakakokontribwir sa pagsantipikar kan banal na ngaran ni Jehova. Apuera kaini, paagi sa satong pag-eebanghelyo, pinatutunayan ta na kita mga disipulo ni Cristo, asin yaon sa sato an pribilehio na pakikikabtang sa pinakamahalagang misyon na ginigibo sa satong kaaldawan.—Mateo 6:9; Juan 15:8.

Panluluya kan Boot Asin mga Relasyon

May mga relasyon nin tawo, magsalang sa pamilya o sa kongregasyon, na puedeng magin dahelan nin panluluya kan boot. Halimbawa, yaon an pagsaboot na kita dai nasasabotan. An mga pagkabakong sangkap nin mga kapagtubod tibaad ikapanluya man kan boot niato. Sa giraray, an Kasuratan makatatabang nin dakula sa sato.

An “bilog na kasararoan nin mga tugang” sa bilog na kinaban sarong dakulang espirituwal na pamilya. (1 Pedro 2:17) Alagad an pakamate nin dayupot na relasyon sa sarong nagkakasararong banwaan puedeng mawara kun may maglataw na mga problema dahelan sa pagkakalaen nin personalidad. Minalataw na an mga Kristiano kan enot na siglo bakong ligtas sa siring na mga problema, huling kinaipuhan ni apostol Pablo na paorootrong pagirumdomon sinda na mamuhay na nagkakasararo. Halimbawa, sinadol nia an duwang Kristiana—si Euodias asin Sintique—na husayon an saindang dai pagkasinabotan.—1 Corinto 1:10; Efeso 4:1-3; Filipos 4:2, 3.

Kun ini an problema, paano niato mapupukaw liwat an sinserong pagkamoot sa satong mga tugang na lalaki asin babae? Paagi sa pagpagirumdom kan satong sadiri na si Cristo nagadan para sa sainda asin na sinda, arog man niato, naggibo nin pagtubod sa saiyang pantubos na atang. Puede man niatong girumdomon na an dakol sa satong mga tugang andam na arogon si Jesu-Cristo paagi sa pagbugtak sa peligro kan saindang buhay para sa sato.

Kaidtong pirang taon na an nakaagi, sa Paris, Pransia, an sarong hoben na Saksi dai nagduwang isip na dalidaling kuanon an sarong maletang may laog na bomba na ilinaag sa luwas kan Kingdom Hall. Dinalagan nia pababa an nagkapirang hagyanan bago iyan ikinaapon sa sarong fountain, na duman iyan nagputok. Kan hapoton kun ano an nagmotibar sa saiya na isapeligro an saiyang buhay sa paaging ini, sia nagsimbag: “Narealisar ko na nasa peligro an samong buhay. Kaya inisip ko na mas marahay pang ako sana an magadan kisa kami gabos.”b Kanigoan na bendisyon na magkaigwa nin siring na kairiba na andam na sunodon na gayo an halimbawa ni Jesus!

Saro pa, puede niatong horophoropon an espiritu nin kooperasyon sa tahaw kan Mga Saksi ni Jehova na yaon kaidto sa mga kampo de konsentrasyon kan Guerra Mundial II.c Mas dai pa sana nahahaloy, an satong mga tugang na lalaki asin babae sa Malawi fiel man na nanindogan bilang tunay na mga Kristiano. Bako daw na an pag-isip na siring man kaiyan an gigibohon kan satong mga tugang sa lokal na kongregasyon sa irarom nin masakit na mga kamugtakan nagpapahiro sa sato na dai intindihon o kisuerra inaan an mga tension asin problema sa aroaldaw? Kun kukultibaron ta an kaisipan ni Cristo, an satong aroaldaw na relasyon sa mga kapwa parasamba magigin gikanan nin kaginhawahan, bakong panluluya kan boot.

Nakapanluluya sa Boot na Personal na mga Saboot

“An paghalat na naglalawig kasakitan sa puso, alagad an bagay na minamawot sarong kahoy nin buhay kun iyan minaabot.” (Talinhaga 13:12) Sa pagheling kan nagkapira sa mga lingkod ni Jehova, haloyon mag-abot an katapusan kan sistemang ini nin mga bagay. Para sa mga Kristiano an panahon na nabubuhayan niato ‘delikado asin masakit pakibagayan,’ kapareho kan pagheling kan dakol na daing pagtubod.—2 Timoteo 3:1-5.

Minsan siring, kabaliktaran sa mga daing pagtubod, an mga Kristiano maninigong maggayagaya na maheling sa masakit na mga kamugtakan na ini an “tanda” kan presensia ni Jesus, na nagpaparisa na an Kahadean nin Dios madali nang taposon an maraot na sistemang ini nin mga bagay. (Mateo 24:3-14) Dawa kun maggrabe an situwasyon—na siertong mangyayari durante kan “dakulang kahorasaan”—an mga pangyayaring ini nagtataong kagayagayahan sa sato huling ipinapaisi kaiyan an madatong na bagong kinaban nin Dios.—Mateo 24:21; 2 Pedro 3:13.

An pagdigson sa isip kan pag-interbenir kan Kahadean sa mga gibo-gibo sa presenteng aldaw puedeng magpangyari sa sarong Kristiano na paorog pang paorog na magdusay nin panahon sa materyal na mga pinag-aaabot. Kun totogotan nia an mga bagay na arog baga kan sekular na trabaho asin pag-aling-aling na uboson an gabos niang panahon asin kosog, masasakitan sia na otobon nin tama an saiyang Makakasuratan na mga paninimbagan. (Mateo 6:24, 33, 34) An siring na kaisipan nagbubunga nin pagkadiskontento asin sa siring nin panluluya kan boot. An sarong nagbibiaheng paraataman nagkomento: “Bakong realistiko an pagprobar na gumibo nin maluyang klaseng palsipikasyon kan bagong sistema sa sistemang ini nin mga bagay.”

Duwa sa Pinakamarahay na Remedyo

Oras na maaraman an problema, paano manonompongan nin saro an marahay na remedyo? An personal na pag-adal saro sa pinakamarahay na paaging magigibo. Taano? “Pinagigirumdom kita kaiyan kun taano ta kaipuhan niatong gibohon an ginigibo ta,” an sabi nin sarong nagbibiaheng paraataman. An saro pa nagpaliwanag: “An paghuhulit huli sana sa obligasyon nagigin magabat kun minsan.” Alagad tinatabangan kita kan marahay na personal na pag-adal na magkaigwa giraray nin klarong pagmansay sa satong kabtang mantang kita nagrarani sa katapusan. Sa kaparehong paagi, paorootrong pinagigirumdom kita kan Kasuratan dapit kan pangangaipo na kumakan nin igo sa espirituwal tanganing magkaigwa nin tunay na kaogmahan sa paggibo kan kabotan nin Dios.—Salmo 1:1-3; 19:7-10; 119:1, 2.

An kamagurangan puedeng tumabang sa iba na mapangganahan an panluluya kan boot paagi sa nakaparirigon sa boot na pagdalaw sa pagpastor sa sainda. Durante kan pribadong mga pagdalaw na ini, ikapaheheling kan kamagurangan na an balang saro sa sato inaapresyar asin igwa nin importanteng kabtang sa tahaw kan banwaan ni Jehova. (1 Corinto 12:20-26) Sa pagtaram manongod sa mga kapwa Kristiano, an sarong magurang sa kongregasyon nagsabi: “Tanganing idoon an saindang kahalagahan, ipinagigirumdom ko sa sainda an saindang naginibo kan nakaagi. Sinasabi ko na sinda mahalagang marhay sa pagheling ni Jehova asin na an dugo kan saiyang Aki itinao para sa sainda. Pirmeng marahay an pag-ako sa pangangatanosan na ini. Oras na masuportaran ini nin marigon na mga sinasabi sa Biblia, an mga nanluluya an boot nasa kamugtakan na magbugtak nin bagong mga pasohan, arog baga nin pampamilyang pamimibi asin pag-adal patin pagbasa sa Biblia.”—Hebreo 6:10.

Durante nin mga pagdalaw sa pagpastor, kaipuhan na mag-ingat an kamagurangan na dai paluwason na garo baga an Dios imposibleng mapaogma. Imbes, puedeng tabangan kan kamagurangan an nanluluya an boot na mga kapwa parasamba na masabotan na an pasan kan mga parasunod ni Jesus magian. Bilang resulta, an satong Kristianong paglilingkod pinaggigikanan nin kagayagayahan.—Mateo 11:28-30.

Pagdaog sa Panluluya kan Boot

Ano man an mga dahelan kaiyan, an panluluya kan boot sarong sakit na dapat labanan. Pero girumdomon na dai kita nagsosolo sa laban na ini. Kun nanluluya an satong boot, akoon ta an tabang kan satong Kristianong kairiba, nangorogna an kamagurangan. Sa paggibo kaiyan, puede niatong mainaan an mga pakamate nin panluluya kan boot.

Orog sa gabos, kaipuhan kitang patabang sa Dios sa pagdaog sa panluluya kan boot. Kun kita mapagngayongayo na mananarig ki Jehova, puede nia kitang tabangan na biyong daogon an panluluya kan boot. (Salmo 55:22; Filipos 4:6, 7) Sa paano man, bilang saiyang banwaan mamamatean man niato an mga sentimiento kan salmista na nag-awit: “Maogma an banwaan na tataong magkurahaw sa kagayagayahan. O Jehova, sa liwanag kan saimong lalauogon padagos sindang nagraralakaw. Sa saimong ngaran magayagaya sinda sa bilog na aldaw asin sa saimong katanosan papalangkawon sinda. Huli ta ika an kagayonan kan saindang kakosogan; asin huli sa saimong marahay na boot mapapalangkaw an samong sungay.”—Salmo 89:15-17.

[Mga Nota sa Ibaba]

[Retrato sa pahina 31]

An nakapakokosog na mga pagdalaw sa pagpastor nin mamomoton na kamagurangan makatatabang sa mga Kristiano na daogon an panluluya kan boot