Makakapoon daw Kamo nin Pag-adal sa Biblia sa Oktubre?
1. Ano an alok sa Oktubre?
1 An alok sa Oktubre iyo an mga magasin na Torrengbantayan asin Awake! Sa pagkultibar nin interes, dinadagka kitang ipresentar an pulyetong Gusto daw Nindong Maaraman an Katotoohan? asin maghingoang makapoon nin pag-adal sa Biblia. Paano niato iyan magigibo sa satong pagdalaw liwat?
2. Paano niato puedeng gamiton an pulyetong Maaraman an Katotoohan tanganing makapoon nin pag-adal sa Biblia kun nagdadalaw liwat sa saro na nag-ako nin mga magasin?
2 Kun Paano Gagamiton an Pulyeto: Puede niatong sabihon: “An mga magasin na iwinalat ko sa saindo nagdadagka sa mga tawo na hale sa laen-laen na kamugtakan asin relihion na siyasaton an Biblia. [Iabot sa kagharong an pulyetong Maaraman an Katotoohan, asin itokdo an mga hapot na nasa atubangan kaiyan.] Uya an nagkapirang nakakapukaw nin interes na hapot na may nakakakontentong simbag hale sa Biblia. Ihinapot na daw nindo an pira sa mga ini?” Pagkasimbag kan kagharong, pag-olayan an simbag sa saro sa mga hapot nia na nasa pulyeto, asin basahon an saro sa sitadong mga teksto. Dangan sabihon na saro sana ining sampol kan mga itinotokdo kan Biblia, asin iabot sa saiya an librong Itinotokdo kan Biblia. Dangan puede na niatong ipakipag-olay an enot na mga parapo kan kapitulo na pinili nia sa lista nin mga laog. O puedeng buklaton niato iyan sa mga pahina na igwa nin mas dakol na impormasyon dapit sa temang pinag-olayan niato sa pulyeto. Uya an mga reperensia na puede niatong gamiton:
● An Dios daw talagang may pagmakolog sa sato? (p. 9-11, par. 6-10)
● Matatapos pa daw an guerra asin pagsakit? (p. 12, par. 12-13)
● Ano an nangyayari sa sato kun kita magadan? (p. 59-60, par. 7-8)
● Igwa daw nin ano man na paglaom para sa mga gadan? (p. 71, par. 13-15)
● Paano ako mamimibi asin dadangogon nin Dios? (p. 166-167, par. 5-8)
● Paano ako makakanompong nin kaogmahan sa buhay? (p. 9, par. 4-5)
3. Paano niato puedeng liwat-liwaton an satong pamamaagi depende sa mga kamugtakan?
3 Siempre, kun dai itinotogot nin mga kamugtakan na kita makapoon asin makapagdemonstrar nin pag-adal gamit an librong Itinotokdo kan Biblia sa enot na pagdalaw liwat, kita pirmeng makakagibo nin mga areglo na bumalik asin ipadagos an satong pakikipag-olay. Asin depende sa interes kan tawo, puede ngani niatong ipakipag-olay an labi pa sa sarong hapot na nasa pulyeto sa nagkapirang pagdalaw bago iintrodusir an libro. Logod na gamiton nanggad niato an kapakipakinabang na pulyetong ini sa Oktubre tanganing makapoon nin pag-adal sa Biblia asin makatabang sa mga sadiosan an puso na ‘maaraman an katotoohan.’—Juan 8:31, 32.