Kaipuhan an Pasensia sa Satong Ministeryo

1. Paano si Jehova nagpapaheling nin pasensia sa katawohan?

¹ Mapasensiang marhay an Dios sa katawohan. (Ex. 34:6; Sal. 106:41-45; 2 Ped. 3:9) An saro sa pangenot na mga halimbawa nin mamomoton na pasensia nia maheheling sa pambilog na kinaban na paghuhulit kan Kahadean. Haros 2,000 na taon nang nagpapasensia si Jehova sa katawohan, pero padagos niang irinarani sa saiya an mga sadiosan an puso. (Juan 6:44) Paano niato maaarog sa satong ministeryo an pagpapasensia ni Jehova?

2. Paano kita makakapaheling nin pagpapasensia sa paghuhulit sa teritoryo?

² Pagharong-Harong: Inaarog niato an pagpapasensia ni Jehova paagi sa ‘daing ontok’ na paghuhulit sa teritoryo na mayo pang nagpapaheling nin interes. (Gui. 5:42) Mapasensia niatong tinatagalan an pagkadaing interes, pag-olog-olog, asin pagtumang sa satong ministeryo. (Mar. 13:12, 13) Ipinapaheling man niato an pagpapasensia paagi sa padagos na paghihingoang baribian an mga banhi nin katotoohan dawa kun depisil manompongan sa harong an mga interesado.

3. Taano ta kaipuhan an pagpapasensia sa pagdalaw liwat asin pagkondukta nin mga pag-adal sa Biblia?

³ Mga Pag-adal sa Biblia: An pagtanom nangangaipo nin pasensia. Puede tang pataluboon an tanom, alagad dai niato mahihidali an pagdakula kaiyan. (Sant. 5:7) Kaagid kaiyan, an espirituwal na pag-oswag nangyayari nin luway-luway asin tangga-tangga. (Mar. 4:28) An mga tinotokdoan niato tibaad masakitan na bayaan an falsong relihiosong mga paniniwala o bakong sono sa Kasuratan na mga kostumbre. Dai niato maninigong hidalion an pag-oswag kan satuyang mga tinotokdoan paagi sa pagpirit sa sainda na magbago. Kaipuhan an pagpapasensia tanganing tawan nin rasonableng lawig nin panahon an espiritu nin Dios na mapahiro an puso kan estudyante.—1 Cor. 3:6, 7.

4. Paano makakatabang sa sato an pagpapasensia tanganing epektibo kitang makapagpatotoo sa bakong kapagtubod na mga kapamilya asin paryente?

⁴ Bakong Kapagtubod na mga Kapamilya Asin Paryente: Minsan ngani labi-labi an pagmawot niato na makanood kan katotoohan an bakong kapagtubod na mga kapamilya asin paryente niato, nagpapaheling kita nin pagpapasensia paagi sa paghalat nin tamang panahon na ihiras sa sainda an satong pagtubod, na nag-iingat na dai sinda paoranan nin kadakol na impormasyon. (Par. 3:1, 7) Mientras tanto, an satong halimbawa iyo an magpapatotoo para sa sato asin magdanay kitang andam na sabihon sa sainda an satong pagtubod sa paaging may mahoyong boot asin hararom na paggalang. (1 Ped. 3:1, 15) Tunay nanggad na magigin mas epektibo asin makakapaogma sa satong langitnon na Ama an ministeryo na igwa nin pagpapasensia.