TABANG PARA SA PAMILYA | RELASYON NIN MAG-AGOM
Kun Paano Magigin Mapasensiya
“Natetesting kada aldaw an pasensiya nin mag-agom. Pag mayo ka pang agom, garo baga sadit na isyu lang an pagpahiling nin pasensiya, pero mahalagang marhay iyan para magin mapanggana an pag-aguman.”—John.
Taano ta kaipuhan mong magin mapasensiya?
Pag mag-agom na kamo, mas mahihiling mo an mga kaluyahan kan saimong agom.
“Pag medyo haloy na kamong kasal, nagkakaigwa ka na nin tendensiyang magpokus sa bakong magayon na mga kuwalidad kan agom mo. Pag nagpupuon ka nang mag-isip nin arog kaiyan, mas madali ka nang mawaran nin pasensiya.”—Jessena.
Pag nawaran ka nin pasensiya, makakataram ka nin dai pinag-iisipan.
“Sinasabi ko tulos an namamatian ko—kun minsan nasosobrahan naman. Kun mas mapasensiya kuta ako, mapag-iisipan ko kun baga talagang kaipuhan ko pang sabihon an sarong bagay asin tibaad dai ko na lang iyan itaram.”—Carmen.
Sinasabi kan Bibliya: “An pagkamuot mapasensiya asin mabuot.” (1 Corinto 13:4) Garo baga rasonable sanang isipon na an duwang tawo na nagkakaminuutan magigin mapasensiya sa lambang saro. Pero bakong arog kaiyan pirmi. Si John, na sinambit kasubago, nagsabi: “Arog sa iba pang marahay na mga kuwalidad, mas madaling mawaran nin pasensiya kisa magin mas mapasensiya. Kaipuhan na maghinguwa para magin mas mapasensiya.”
Paano mo maipapahiling an pagigin mapasensiya?
Pag may biglang mangyaring makakabalo sa pasensiya mo.
Halimbawa: May sinabi saimong makulog an agom mo. An tendensiya mo iyo na simbagon man siya nin makulog.
Prinsipyo sa Bibliya: “Dai ka tulos makulgan nin buot, huling an pagkulog nin buot nagtetenir sa daghan kan mga mangmang.”—Parahulit 7:9, NWT.
Kun paano maipapahiling an pagigin mapasensiya: Magpundo nguna. Bago sumimbag, hinguwahon na isipon na dai tinuyo kan agom mo na kulgan ka. Sinabi kan librong Fighting for Your Marriage: “An kadaklan sa sato nagsisimbag base sa pagkaintindi ta sa sinabi kan satong agom imbes na sa kun ano talaga an sinabi niya.”
Dawa pa kun pinapaanggot ka talaga kan agom mo, an pagpapasensiya paagi sa pagpugol na bumalos makakabawas kan tensiyon imbes na makapagrabe pa. “Nagagadan an kalayo kun mayo nin igatong,” an sabi kan Bibliya.—Talinhaga 26:20, An Marahay na Bareta Biblia.
“Pag nagpupuon nang magin kaiwal an hiling mo sa saimong agom, pumundo nguna asin isipon kun taano ta namumutan mo siya asin gumibo tulos nin sarong bagay na magugustuhan niya.”—Ethan.
Pag-isipan:
Ano an reaksiyon mo pag an agom mo may sinabi o ginibong nakakakulog saimo?
Paano ka magigin mas mapasensiya pag nangyari giraray iyan?
Pag pauruutrong ginigibo kan agom mo an bagay na ikinakasuya mo.
Halimbawa: Pirming huri an agom mo kaya nauuyam ka sa pagparahalat saiya.
Prinsipyo sa Bibliya: “Padagos na pagpasensiyahan an lambang saro asin lubos na patawadon an lambang saro.”—Colosas 3:13.
Kun paano maipapahiling an pagigin mapasensiya: Inuton an kapakanan kan saindong relasyon bako kan sadiri. Haputon an sadiri, ‘Pag ginibo kong isyu ini, makakarahay daw iyan sa relasyon mi o makakaraot?’ Tandaan man na “gabos . . . kita napapasala nin dakul na beses.” (Santiago 3:2) Nangangahulugan ini na igwa ka man nin mga dapat baguhon sa saimong sadiri.
“Minsan, nagigin mas mapasensiya ako sa mga amigo ko kisa sa agom ko. Siguro dahil pirmi ko siyang kaibanan, kaya mas nahihiling ko an mga kaluyahan niya. Pero an pagigin mapasensiya sarong aspekto nin pagkamuot—sa katunayan, tanda iyan nin paggalang—kaya mahalaga iyan sa relasyon mi ni agom.”—Nia.
Pag-isipan:
Mapasensiya ka daw sa mga kaluyahan kan saimong agom?
Paano ka makakapahiling nin mas halabang pasensiya sa sunod?