Nungka Kitang Minapondo sa Gibohon
1. Paano niato naaraman na nungkang nagpondo sa gibohon an mga paraebanghelyo kan enot na siglo?
1 An maigot na mga paraebanghelyo kan enot na siglo ‘daing ontok’ na nagbalangibog kan maogmang bareta saen man may mga tawo. (Gui. 5:42) Kaya dai niato maiimahinar na kun sinda naghaharongharong, linalampasan sana ninda an mga tawo sa dalan na dai man lamang sinda hinuhulitan. Dai man ninda pinapalampas an oportunidad na magpatotoo nin impormal mantang namamakal sa sadan pagkatapos kan ministeryo sa langtad. Arog ni Jesus, nungka sindang nagpondo sa gibohon.—Mar. 6:31-34.
2. Ano an kalabot sa satong pagigin Saksi ni Jehova?
2 Pirmeng Andam: An pag-apod sa sato na Mga Saksi ni Jehova dai sana naglaladawan kun ano an satong ginigibo; ilinaladawan man kaiyan kun siisay kita. (Isa. 43:10-12) Kaya pirme kitang andam na idepensa an satong paglaom, dawa mayo kita sa ministeryong pagharongharong. (1 Ped. 3:15) Inaantisipar daw nindo an mga situwasyon na puede kamong magpatotoo nin impormal dangan pinag-iisipan kun ano an puede nindong sabihon? May dara daw kamong mga literatura na ikakatao nindo sa mga nagpapahiling nin interes? (Tal. 21:5) Kamo daw naghaharongharong sana, o nagbabalangibog man kan maogmang bareta sa mga tawo sa iba-ibang lugar kun itinotogot nin mga kamugtakan?
3. Taano ta bakong angay na gamiton an terminong “alternatibo” para sa paghuhulit sa tinampo saka paradahan, parke, lugar nin negosyo, asin iba pa?
3 Bakong “Alternatibong” Pagpapatotoo: Kaidto, ginagamit niato kun beses an terminong “alternatibo” para sa paghuhulit sa tinampo saka paradahan, parke, lugar nin negosyo, asin iba pa. Minsan siring, an “alternatibo” garo baga nagsusuherir na an mga paghihingoang iyan bakong ordinaryo, bihirang gibohon, o opsional. Sinabi ni apostol Pablo na sia naghulit sa “publiko” asin sa harong-harong. (Gui. 20:20, NW) Kaya an pagpapatotoo sa “publiko” mas angay na termino kisa sa “alternatibong” pagpapatotoo. Totoo na an ministeryong pagharongharong an padagos na magigin pangenot asin pinakaepektibong paagi tanganing ipaabot sa mga tawo an mensahe kan Kahadean. Minsan siring, an mga paraebanghelyo kan enot na siglo nagkonsentrar sa mga tawo, bakong sa mga harong. Inaprobetsaran ninda an lambang oportunidad na ipakipag-olay an katotoohan—sa publiko, impormal na paagi, asin sa harong-harong. Logod na magin arog man kaiyan an satong kaisipan tanganing lubos tang maotob an ministeryo.—2 Tim. 4:5.