Mag-ingat Mantang Nasa Ministeryo
1. Taano ta kaipuhan na magin maingat mantang nasa ministeryo?
1 “Siring sa mga karnero sa tahaw nin mga lobo,” an mga lingkod nin Dios naghuhulit sa ‘tahaw nin biko asin sutil na kapag-arakian.’ (Mat. 10:16, NW; Fil. 2:15) An nakakahandal na mga bareta nin kariribokan sibil, madahas na pagsururog, asin maringis na mga pagkidnap ordinaryo na sana, asin iyan ebidensia na an maraot na mga tawo padagos na “magdadagdag sa karatan.” (2 Tim. 3:13) Anong mga prinsipyo sa Kasuratan an puede tang iaplikar na makakatabang sa sato na magin maingat sa ministeryo?—Mat. 10:16.
2. Sa anong mga kamugtakan tibaad mas marahay na humale sa teritoryo asin maghulit sa ibang lugar?
2 Magin Alisto: Idinodoon kan Talinhaga 22:3 an kadonongan nin ‘paglikay’ sa kapahamakan. Magdanay na alisto! Puedeng biglang magbago an kamugtakan sa sarong lugar na sa parate mayong peligro. Tibaad mahiling nindo na may mga pulis na nagreresponde o nagdadakol an tawo sa tinampo. Kun beses, sarong maboot na kagharong an matao nin patanid. Imbes na maghaloy pa tanganing mag-usyoso, madonong na humale tolos asin magpadagos sa ibang lugar.—Tal. 17:14; Juan 8:59; 1 Tes. 4:11.
3. Paano aplikado sa satong ministeryo an prinsipyo sa Parahulit 4:9?
3 Maghulit na May Kaiba: ‘Marahay an duwa kisa sa saro,’ an sabi kan Parahulit 4:9. Minsan ngani puedeng natuod na kamong maghulit nin solo na mayong peligro, totoo pa daw iyan sa ngonyan? Sa ibang lugar, iyo. Alagad sa iba, delikado na para sa sarong tugang na babae o sa sarong hoben na maghulit nin solo sa harong-harong, lalo na kun padiklom na. Ipinapahiling kan mga eksperyensia na mahalagang marhay na may alistong kapartner. (Par. 4:10, 12) Danay na magin mapagrisa sa kairiba nindo sa grupo. Ugaleon na magpaaram sa iba kun kamo mahale sa teritoryo.
4. Ano an magigibo ta tanganing maprotehiran an gabos sa kongregasyon?
4 Bilang nagbabantay o ‘nagpupuka sa satong kalag,’ an mga elder an may paninimbagan na magtao nin praktikal na paggiya kaoyon kan lokal na mga kamugtakan. (Heb. 13:17) Makakasierto kita sa bendisyon ni Jehova mantang kita nagpapahiling nin Kristianong kababaan nin boot asin lubos na nakikikooperar sa sainda. (Miq. 6:8; 1 Cor. 10:12) Logod na an gabos na lingkod nin Dios magkaigwa nin kabtang sa pagtao nin epektibong patotoo sa satong teritoryo, alagad pirmeng may igong pag-iingat.