An Tataramon nin Dios Para sa Sato Paagi ki Jeremias
1. Anong publikasyon an ilinuwas kan 2010 na pandistritong kombension, asin sa ano niato ini gagamiton?
1 Ogmahon nanggad kita kan iluwas an bagong libro na arog kaiyan an titulo sa 2010 na “Magdanay na Harani ki Jehova!” na Pandistritong Kombension! Itinatampok kan librong ini an mga leksion para sa satong pang-aroaldaw na buhay na nasa librong Jeremias asin Lamentacion. (Roma 15:4) Huling dinisenyo tanganing gamiton sa Pag-adal sa Biblia kan Kongregasyon, pag-aadalan iyan poon sa semana nin Nobyembre 5, 2012.
2. Taano ta makikinabang kita sa pag-estudyar kan mga libro sa Biblia na Jeremias asin Lamentacion?
2 Kapakipakinabang Ngonyan: Si Jeremias, an kagsurat kan ipinasabong na librong ini sa Biblia, naghula durante kan maribok na panahon sa Juda. Kan primero, inisip nia na bako siang kualipikado sa asignasyon nia. (Jer. 1:6) Pinersegir man sia kan mga kamidbid nia asin tibaad kan mga paryente nia sa saiyang ginikanan na banwaan na Anatot. (Jer. 11:21, 22) Natural sana, may beses na pinangluyahan nin boot si Jeremias. (Jer. 20:14) Mantang inootob niato an sugo sa sato na ‘gumibo nin mga disipulo sa gabos na nasyon,’ parate kitang nakakaeksperyensia nin mga kadepisilan asin mga pagmate na kapareho kan ki Jeremias. (Mat. 28:19) An pag-estudyar sa mga isinurat nia makakatabang sa sato na magibo an satong ministeryo na may kompiansa asin kaigotan.
3. Paano niato gagamiton an pirang espesyal na kabtang kan librong Jeremias?
3 Espesyal na mga Kabtang: Naka-italiko an importanteng marhay na mga teksto na maninigong basahon durante kan pagtokar. Sa katapusan kan kada semanal na pag-aadalan, igwa nin saro o duwang makahulogan na hapot na nakasurat sa mas maitom na letra na nagtatampok kan pangenot na mga punto kan pinag-adalan. Maninigong ihapot ini sa mga nagdadangog bilang repaso. Sa bilog na libro, igwang magagayon na ilustrasyon na siertong gugustohon kan kongregasyon na komentohan.
4. Paano kita lubos na makikinabang sa pag-adal kan librong Jeremias?
4 Tanganing lubos na makinabang, patienot na mag-andam sa pag-aadalan. Maghanap nin mga punto na magagamit nindo sa saindong buhay asin ministeryo. Lubos na makikabtang sa pagkomento. Huli sa bendisyon ni Jehova, naotob ni Jeremias an asignasyon nia na may kagayagayahan asin pagkakontento. (Jer. 15:16) Logod na an pag-adal niato sa bagong publikasyon na ini makatabang sa sato na magibo an satong ministeryo sa kaparehong paagi.