Gibuhon na Arugan an mga Propeta—Si Jonas

1. Ano an positibong mga kuwalidad ni Jonas?

¹ Ano an minasabong sa isip mo pag iniisip mo si propeta Jonas? Tibaad para sa nagkapira, siya maluya an buot o matagas an puso. Minsan siring, malinaw na nagpahiling siya nin kapakumbabaan, kusog nin buot, asin pagsakripisyo. Paano niyato gigibuhon na ‘arugan’ an kahanga-hangang mga kuwalidad ni Jonas?—Sant. 5:10.

2. Paano ta maaarog an kapakumbabaan ni Jonas?

² Kapakumbabaan: Kan primero, dinulagan ni Jonas an teritoryo na iinasignar sa saiya. Dai ini dapat ipagngalas dahil midbid na madahas an mga Asirio, asin an Ninive inapod na “siyudad nin pagpabulos nin dugo.” (Nah. 3:1-3, NW) Pero, dinisiplina ni Jehova si Jonas, na nagpahiling nin kapakumbabaan paagi sa pag-ako kan asignasyon kan tawan siya nin panduwang tsansa. (Tal. 24:32; Jon. 3:1-3) Dawa ngani duminulag siya kan primero, ginibo man giraray niya an kabutan ni Jehova. (Mat. 21:28-31) Determinado man daw kitang maghulit kan maugmang bareta, dawa kun kita nadisiplina o masakit an teritoryong iinasignar sa sato?

3. Anong mga aspekto kan saimong ministeryo an nangangaipo nin kusog nin buot asin pagsakripisyo?

³ Kusog nin Buot Asin Pagsakripisyo: Kan marealisar ni Jonas na nameligro an buhay kan mga marinero huli sa saiyang salang desisyon, andam niyang isakripisyo an buhay niya. (Jon. 1:3, 4, 12) Paghaloy-haloy, kan inuutob an sugo sa saiya sa Ninive, nagduman siya sa sentro kan siyudad, na tibaad naghahanap nin angay na lugar para ipahayag an paghukom ni Jehova. Patunay iyan na bakong maluya an buot niya, kundi saro siyang propeta nin Diyos na makusog an buot! (Jon. 3:3, 4) Kumusta man kita? Kaipuhan an kusog nin buot na gikan sa Diyos tanganing pusoan na makapagpatotoo sa ibong nin pagtumang. (Gui. 4:29, 31) Kaipuhan an pagsakripisyo sa paggamit nin panahon asin kuwarta o materyal na bagay para sa ministeryo.—Gui. 20:24.

4. Taano ta maninigo tang tawan nin panahon na hurop-hurupon an marahay na arugan na itinao kan mga propeta ni Jehova?

⁴ Kada may mabasa ka dapit sa saro sa mga propeta ni Jehova, makikinabang ka kun iimahinaron mong yaon ka sa kamugtakan niya. Haputon an sadiri: ‘Ano man daw an magigin reaksiyon ko? Paano ko maaarog an marahay niyang mga kuwalidad?’ (Heb. 6:11, 12) Tutukaron pa sa masunod na mga artikulo kan An Satong Ministeryo sa Kahadean an mahahalagang leksiyon na manunudan ta sa iba pang maimbod na mga propeta ni Jehova.