Ano an Nagmomotibar sa Sato na Maghulit?
1. Paano magkakonektar an pagkamuot asin an satong ministeryo?
1 An paghuhulit kan maugmang bareta kan Kahadian nin Diyos an pinakamakahulugan na gibuhon na magigibo ta ngunyan. Sa katunayan, sa gibuhon na ini, kinukuyog ta an duwang pinakanangungurog na tugon: Mamutan si Jehova asin mamutan an satong kapwa. (Mar. 12:29-31) An pagkamuot sarong makusog na puwersa na makakamotibar sa sato na magin maigot na mga ministro.—1 Juan 5:3.
2. Paano nagpapahiling nin pagkamuot ki Jehova an satong paghuhulit?
2 Pagkamuot ki Jehova: An pagkamuot sa pinakanamumutan tang Katuod, si Jehova, nagpapahiro sa sato na idepensa siya. Mga 6,000 na taon na siyang pinapakaraot ni Satanas. (2 Cor. 4:3, 4) Kaya, naniniwala an mga tawo na an mga parakasala pinapasakitan nin Diyos sa nagkakalayong impiyerno, na siya sarong misteryosong Trinidad, asin mayong pakiaram sa mga tawo. Dakul pa ngani an nagsasabing mayong Diyos. Gusto ta nanggad na maaraman kan mga tawo an katotoohan dapit sa satong langitnon na Ama! Paagi sa satong maigot na paghihinguwa bilang mga saksi nin Diyos, napapaugma ta siyang marhay asin napapahimutikan si Satanas.—Tal. 27:11; Heb. 13:15, 16.
3. Paano nagpapahiling nin pagkamuot sa kapwa an satong ministeryo?
3 Pagkamuot sa Kapwa: Kada magpatotoo kita sa sarong tawo, nagpapahiling kita nin pagkamuot sa saiya. Kaipuhan na marhay na madangog kan mga tawo an maugmang bareta sa masakit na mga panahon na ini. Dakul an arog kan mga taga Ninive kan panahon ni Jonas na “dai man lamang nakakaaram kan pagkakalain kan saindang tuong kamot asin kan saindang wala.” (Jon. 4:11, NW) Paagi sa ministeryo, natutukduan an mga tawo kun paano mamuhay nin marahay asin maugma. (Isa. 48:17-19) Nagtatao iyan sa sainda nin paglaom. (Roma 15:4) Kun sinda mahinanyog asin mahiro kauyon kan saindang nanunudan, sinda “maliligtas.”—Roma 10:13, 14.
4. Ano an nungkang malilingawan ni Jehova?
4 An marahay na mga aki dai nagpapahiling nin pagkamuot sa saindang mga magurang sa panahon na gusto sana ninda. Pinagmamaigutan nindang magin mamumuton sa gabos na panahon. An makusog na pagkamuot sa Diyos asin sa kapwa mamotibar man sa sato na magin alisto sa mga oportunidad na magpatotoo sa gabos na panahon, bako sana kun may nakaiskedyul na paghuhulit. Maghuhulit kita nin daing untok. (Gui. 5:42) An siring na pagkamuot nungkang malilingawan ni Jehova.—Heb. 6:10.