Gamiton an Satong Web Site sa Pagtukdo sa Saindong mga Aki
1. Ano an katuyuhan kan seksiyon sa satong Web site na may temang “Children”?
1 Dinisenyo an satong Web site na jw.org para sa gabos na tawo, ano man an edad. An seksiyon sa Web site na “Children” (buksan an Bible Teachings > Children) nakakatabang sa mga aki asin mga magurang na magin harani sa kada saro asin ki Jehova. (Deut. 6:6, 7) Paano nindo magagamit an seksiyon na ini sa pagtukdo sa saindong mga aki?
2. Paano kamo makakapili nin pag-aadalan na angay sa edad kan saindong mga aki?
2 Ibagay: Magkakalain an pangangaipo kan mga aki. (1 Cor. 13:11) Kun siring, paano kamo makakapili nin pag-aadalan na angay sa edad kan saindong mga aki? Haputon an sadiri: ‘Ano an makakapukaw sa interes kan mga aki ko? Masasabutan daw ninda iyan gabos? Gurano kalawig sindang makakapagkonsentrar?’ Sa mga aki na edad tulo pababa, puwede nindong ipakipag-ulay an mga istorya na yaon sa “My Bible Lessons.” Nauugma an ibang pamilya sa mga istorya sa Bibliya na yaon sa “Teach Your Children.” Puwede man nindong konsideraron an minasunod na opsiyon.
3. Paano epektibong magagamit kan mga magurang an mga istorya asin activity na yaon sa “Family Worship Projects”?
3 “Family Worship Projects”: An mga project na ini pantabang sa mga magurang sa pagtukdo sa saindang mga aki. Tanganing maaraman kun paano gagamiton an mga istorya asin activity, i-click an “Download,” asin basahon an “Parents’ Guide” para sa kada project. Gamiton an mga picture activity, arog kan kukuluran na mga ritrato, sa pagtukdo sa mas saradit pang aki. Tabangan an durudakula nang mga aki na makumpleto an mga study activitiy. An gabos na activity sa kada project manungod sa saro sanang istorya o leksiyon sa Bibliya, kaya makakapagpartisipar sa pampamilyang pagsamba an mga aki, ano man an edad ninda.
4. Ano an mahihiling sa seksiyon na “Become Jehovah’s Friend”?
4 “Become Jehovah’s Friend”: An mga video, kanta, asin activity na nasa seksiyon na ini kan satong Web site nakakatabang sa mga magurang na ikatadom an Tataramon nin Diyos sa saindang saradit pang aki. (Deut. 31:12) An kada halipot na animated video nagtutukdo nin mahalagang leksiyon. An manlain-lain na activity nakakatabang na maiduon an mga leksiyon na iyan. Huling sa parati gusto kan mga aki na magkanta—asin an mga kanta nakakatabang sa mga aki na magirumduman an nanudan ninda—an mga awit na pang-Kahadian asin an mga kanta na espesyalmenteng isinurat para sa mga aki regular na ilinalaag sa Web site.
5. Taano ta maninigong ipamibi kan mga magurang ki Jehova na tabangan sinda sa pagtukdo kan katotoohan sa saindang mga aki?
5 Mga magurang, gusto ni Jehova na kamo magin mapangganang mga ina asin ama. Kaya ipamibi sa saiya na tabangan kamong itukdo an katotoohan sa saindong mga aki. (Hok. 13:8) Sa suporta ni Jehova, masasanay nindo sinda na magin ‘madunong para sa kaligtasan’ paagi sa pagtubod mapadapit ki Cristo Jesus.—2 Tim. 3:15; Tal. 4:1-4.