Gibuhon na Arugan an mga Propeta—Si Sofonias
1. Ano an sitwasyon kan magin propeta si Sofonias, asin paano siya nagin marahay na halimbawa sa sato ngunyan?
1 Nasa kabangaan kaidto kan ikapitong siglo B.C.E. Hayag-hayagan na sinasamba si Baal sa Juda. Dai pa sana nahahaloy kan gadanon an maraot na si Hading Amon, asin ngunyan an hoben na si Hading Josias na an namamahala. (2 Cron. 33:21–34:1) Kan panahon na iyan, isinugo ni Jehova si Sofonias tanganing maghayag kan Saiyang mensahe nin paghatol. Dawa ngani miyembro si Sofonias kan maharlikang pamilya nin Juda, dai niya pinaluya an puwersa kan mensahe nin pagkondenar ni Jehova sa pamamahala sa Juda. (Sof. 1:1; 3:1-4) Hinihinguwa ta man na arugon an kusog nin buot ni Sofonias asin dai ta tinutugutan an relasyon sa pamilya na makaapektar sa satong pagsamba ki Jehova. (Mat. 10:34-37) Ano an mensahe na ihinayag ni Sofonias, asin ano an resulta?
2. Ano an dapat tang gibuhon tanganing iligtas ni Jehova sa aldaw kan saiyang kaanggutan?
2 Hanapon si Jehova: Si Jehova sana an may kakayahan na magligtas sa aldaw kan saiyang kaanggutan. Kaya, dinagka ni Sofonias an mga taga Juda na hanapon si Jehova, hanapon an katanusan, asin hanapon an kahuyuan mantang may oras pa. (Sof. 2:2, 3) Totoo man iyan ngunyan. Arog ni Sofonias, dinadagka ta an iba na hanapon si Jehova, pero dapat man kitang humiro asin magin determinadong dai ‘magsibog sa pagsunod ki Jehova.’ (Sof. 1:6) Imbes, hanapon ta si Jehova paagi sa pag-adal kan saiyang Tataramon asin pagpamibi para sa saiyang paggiya. Hanapon ta an katanusan paagi sa pamumuhay na malinig sa moral. Hanapon ta an kahuyuan paagi sa pagigin mapagpasakop asin pagigin andam na sumunod sa instruksiyon kan organisasyon ni Jehova.
3. Taano ta dapat na pirmi kitang positibo sa ministeryo?
3 Positibong mga Resulta: An mensahe nin paghatol ni Sofonias nakamotibar sa ibang mga taga Juda pero lalong-lalo na sa hoben na si Josias, na nagpuon na hanapon si Jehova kan siya aki pa. Kan huri, pinanginutan ni Josias an maigot na kampanya laban sa idolatriya sa Juda. (2 Cron. 34:2-5) Sa ngunyan, dawa ngani may mga banhi kan Kahadian na naisabwag sa gilid nin dalan, sa lugar na magapo, o matunok, igwa man nin mga nasabwag sa marahay na daga asin nagbubunga. (Mat. 13:18-23) Makakapagtiwala kita na padagos na bebendisyunan ni Jehova an mga paghihinguwa ta mantang pirmi kitang sibot sa pagpalakop kan banhi kan Kahadian.—Sal. 126:6.
4. Taano ta dapat na padagos tang ‘halaton si Jehova’?
4 Inisip kan iba sa Juda na dai na mahiro si Jehova. Pero, sinigurado ni Jehova sa gabos na talagang harani na an saiyang dakulang aldaw. (Sof. 1:12, 14) An kaligtasan para sana sa mga nagpapaili sa saiya. (Sof. 3:12, 17) Mantang padagos tang ‘hinahalat si Jehova,’ lugod na magin maugma kita sa paglilingkod na may pagkasararo kaiba kan satong mga tugang sa pagsamba sa satong dakulang Diyos!—Sof. 3:8, 9.