Ano an Paghiling sa Sako ni Jehova?
1. Taano ta masasabing kaagid nin salming an Bibliya?
1 Gurano ka kaparating naghihiling sa salming? Aroaldaw na ginigibo iyan kan kadaklan sa sato huling nakakatabang iyan na mahiling kun arin na parte kan itsura ta an kaipuhan pakarhayon. Kaagid nin salming an Bibliya. Natatabangan kita kan pagbasa kan Bibliya na mahiling an satong panglaog na pagkatawo, na iyo an pighihiling ni Jehova. (1 Sam. 16:7; Sant. 1:22-24) An Tataramon nin Diyos “nakakabatid kan mga kaisipan asin intensiyon kan puso.” (Heb. 4:12, NW) Paano makakatabang an aroaldaw na pagbasa asin paghurop-hurop sa Bibliya na mahiling an mga bagay na dapat pauswagon sa satong sadiri tanganing magin mas mapanggana kitang ebanghelisador?—Sal. 1:1-3.
2. Paano kita matatabangan kan Bibliya na siyasaton an satong sadiri?
2 Paagi sa Paggamit kan Bibliya Bilang Salming: An mga halimbawa sa Bibliya nin maimbod na mga lingkod ni Jehova nagtutukdo sato kun anong mga kuwalidad an magayon sa paghiling niya. Halimbawa, nagpahiling si David nin kaigutan para sa ngaran nin Diyos. (1 Sam. 17:45, 46) Si Isaias may kusog nin buot na nagboluntaryong maghulit sa masakit na teritoryo. (Isa. 6:8, 9) Huli sa hararom na pagkamuot ni Jesus sa saiyang langitnon na Ama, an ministeryo nakakapaginhawa asin nakakakontento para sa saiya imbes na pagabat. (Juan 4:34) An mga Kristiyano kan inot na siglo maigot na naghulit, nagtiwala ki Jehova, asin determinadong dai magpundo. (Gui. 5:41, 42; 2 Cor. 4:1; 2 Tim. 4:17) An paghurop-hurop sa siring na mga halimbawa nakakatabang na siyasaton an satong sadiri sa katuyuhan na pauswagon an kalidad kan satong sagradong paglilingkod.
3. Taano ta dai kita dapat mag-atraso sa paggibo nin kinakaipuhan na pagliliwat?
3 Paagi sa Paghiro Tanganing Itama an mga Depekto: Siyempre, daing saysay an paghiling sa salming kun babaliwalaon man sana an sarong depekto. Puwede tang hagadon ki Jehova na tabangan kitang masiyasat nin prangka an satong sadiri dangan tabangan kitang magibo an kinakaipuhan na mga pagliliwat. (Sal. 139:23, 24; Luc. 11:13) Huling nabawasan na an natatadang panahon asin buhay an nakataya, dai kita dapat mag-atraso sa paggibo nin kinakaipuhan na mga pagbabago.—1 Cor. 7:29; 1 Tim. 4:16.
4. Ano an nangyayari sa sarong tawo na nagbabasa kan Tataramon nin Diyos dangan naghihiro kauyon kan naaraman niya?
4 An panglaog na pagkatawo nin saro—na iyo an pighihiling ni Jehova—mas importanteng marhay kisa pangluwas na itsura. (1 Ped. 3:3, 4) Ano an nangyayari sa sarong tawo na nagbabasa kan Tataramon nin Diyos dangan naghihiro kauyon kan naaraman niya? Siya nagigin ‘bakong paradangog na nalilingaw kundi paragibo na naggigibo; an tawong ini [magigin maugma] sa saiyang gibo.’ (Sant. 1:25) Iyo, kita magigin maugma asin epektibong ministro huling kita ‘nagpapabanaag siring sa mga salming kan kamurawayan ni Jehova.’—2 Cor. 3:18, NW.