Sarong Siglo nin Paghahayag kan Kahadian!
1. Sa anong gibuhon nadagka an mga lingkod ni Jehova haros sarong siglo na an nakaagi?
1 “Uya, namamahala na an Hadi! Kamo an saiyang mga representante sa pagpaisi. Kun siring ipaisi, ipaisi, ipaisi, an Hadi asin an saiyang kahadian.” Huli sa nakakapahirong mga tataramon na iyan ni Brother Rutherford haros sarong siglo na an nakaagi, nadagka an mga lingkod ni Jehova na ipalakop an mensahe kan Kahadian. Asin talagang nagibo ta iyan! Arog kan inot na mga Kristiyano, ihinuhulit ta an maugmang bareta kan Kahadian ‘sa gabos na linalang na nasa irarom nin langit.’ (Col. 1:23) Ano an mga nagibo niyato sa nakaaging siglo tanganing ihayag an Kahadian nin Diyos? Paano ta ini padagos na ikakahayag mantang parani na kita sa ika-100 na anibersaryo kan pagkamundag kan Kahadian?
2. Paano ipinopromotir kan satong mga literatura an Kahadian nin Diyos?
2 An mga Nagibo Niyato: Pirang dekada nang ipinopromotir kan satong mga literatura an Kahadian nin Diyos. Puon pa kaidtong 1939, an satong panginot na magasin igwa na nin titulong: An Torrengbantayan Nagpapahayag kan Kahadian ni Jehova. Parating tinutukar kan magasin na ini an Kahadian asin kun ano an gigibuhon kaiyan. Itinatampok man kan magasin na Awake! an Kahadian nin Diyos bilang an solamenteng paglaom kan katawuhan. Kaya tama sanang an duwang magasin na ini an may pinakadakul ngunyan na traduksiyon asin distribusyon nin magasin sa bilog na kinaban!—Kap. 14:6.
3. Ano an nagkapirang paagi na ginamit niyato para ihayag an Kahadian?
3 An mga lingkod ni Jehova naggagamit nin iba-ibang paagi para ihayag an Kahadian. Kaidto, nagbrodkast kita sa radyo, asin naggamit nin mga sound car saka nabibitbit na ponograpo. Nakatabang an mga paaging iyan para ikapalakop an maugmang bareta sa dakul na tawo kaidtong dikit pa sana an parabalangibog kan Kahadian. (Sal. 19:4) Dai pa sana nahahaloy, ginamit niyato an jw.org tanganing maipaabot an mensahe kan Kahadian sa minilyon na tawo—kaiba na an mga nakaistar sa lugar na bawal an satong gibuhon.
4. Anong espesyal na mga areglo an ginibo niyato?
4 May ginibo man na espesyal na mga areglo an mga lingkod ni Jehova para ipalakop an mensahe kan Kahadian. Halimbawa, puon kaidtong kabangaan kan dekada nin 1990, hininguwa tang dugangan an satong paghuhulit sa harong-harong paagi sa pagpapatotoo sa mga pampublikong parke, sa mga paradahan, asin sa mga lugar nin negosyo. Kasuarin pa sana, nag-areglo kita nin espesyal na pagpapatotoo sa publiko sa darakulang siyudad sa bilog na kinaban. Apuwera kaiyan, dakul na kongregasyon an nakikikabtang sa pagpapatotoo sa publiko sa saindang teritoryo gamit an literature cart asin lamesa na ipinupuwesto sa lugar na dakul an nag-aaragi. Pero, an pagharong-harong pa man giraray an satong panginot na paagi sa paghulit kan Kahadian.—Gui. 20:20.
5. Anong mga oportunidad an magigin bukas sa sato sa bagong taon nin paglilingkod?
5 An mga Gigibuhon Niyato: Sa pagpuon kan bagong taon nin paglilingkod sa Setyembre, dakul an ma-regular payunir. Puwede ka man daw? Kun dai, puwede ka daw mag-auxiliary payunir sa pana-panahon? Makapagpayunir ka man o dai, siguradong bebendisyunan ka ni Jehova huli sa ano man na pagsasakripisyo mo para lubos na makikabtang sa paghahayag kan Kahadian.—Mal. 3:10.
6. Taano ta espesyal an bulan na Oktubre 2014?
6 Sa Oktubre 2014, ika-100 na anibersaryo na kan pagkamundag kan Kahadian. Tamang-tama man, nakapokus sa Kahadian nin Diyos an pampublikong edisyon kan Torrengbantayan sa bulan na iyan. Taano ta dai hinguwahon na makapag-alok kan isyung ini sa pinakadakul na mapupuwede? Mantang tinatanaw ta an puturo, lugod na an kada saro sa sato padagos na ‘ihulit an marahay na bareta dapit sa Kahadian nin Diyos’ sa gabos na madangog.—Gui. 8:12.