Taano ta Dapat Kang Magin Interesado sa Kahadian nin Diyos?

Minilyon na tawo sa bilog na kinaban an naglalaom sa Kahadian nin Diyos. Inaarog ninda an halimbawa ni Jesus na nagtukdo sa mga parasunod niya na mamibi: ‘Dumatong an kahadian mo; kuyugon an buot mo digdi sa daga.’​—Mateo 6:10, An Marahay na Bareta Biblia.

Pero makangangalas ta dawa dakul na tawo an interesadong marhay sa Kahadian nin Diyos, an kadaklan man na relihiyon garo dai interesado diyan. Mapadapit digdi, sinabi kan historyador na si H. G. Wells na kun paanong risang-risa ki Jesus an pagtao nin “dakulang importansiya . . . sa katukduan na inaapod niyang Kahadian nin Langit,” an katukduan man na ini, sabi ni Wells, “daing gayo tinatawan nin halaga sa . . . pagtutukdo nin kadaklan sa mga relihiyon na Kristiyano.”

Bakong arog kan mga relihiyon na iyan, mahalagang marhay sa Mga Saksi ni Jehova an Kahadian nin Diyos. Pag-isipan ini: An samong panginot na magasin, na binabasa mo ngunyan, ipinupublikar sa 220 lengguwahe. Haros 46 milyones na kopya kaini an iniimprenta kada isyu, kaya ini an magasin na may pinakamahiwas na sirkulasyon sa bilog na kinaban. Asin ano an panginot na mensahe kan magasin na ini? Hilinga an bilog na titulo kaini sa inutan na cover: An Torrengbantayan Nagpapahayag kan Kahadian ni Jehova.a

Taano ta hinihinguwang marhay kan Mga Saksi ni Jehova na ianunsiyo, o ipahayag an Kahadian nin Diyos? Huling naniniwala kami na an Kahadian nin Diyos an panginot na mensahe kan pinakaimportanteng libro sa kinaban—an Bibliya. Kumbinsido man kami na an Kahadian nin Diyos an solamenteng tunay na solusyon sa mga problema kan katawuhan ngunyan.

Sa pagtao nin importansiya sa Kahadian nin Diyos, hinihinguwa kan mga Saksi ni Jehova na arugon an halimbawa ni Jesus. Kan siya yaon digdi sa daga, panginot sa saiyang buhay asin ministeryo an Kahadian nin Diyos. (Lucas 4:43) Taano ta mahalagang marhay ki Jesus an Kahadian? Taano ta dapat magin mahalaga iyan sa saimo? Pag-isipan tabi an simbag kan Bibliya na mababasa sa sunod na mga artikulo.