Gibuhon na Arugan an mga Propeta—Si Nahum
1. Ano an manunudan niyato sa libro nin Nahum?
1 Pinapatunayan kan kagabaan kan suanoy na Nineve, arog kan ihinula ni Nahum, na si Jehova namamalos sa Saiyang mga kalaban, asin dawa an pinakamaringis na kaiwal daing kalaban-laban sa Saiya. (Nah. 1:2, 6) Sa pagsiyasat sa hula ni Nahum, may manunudan kita na magagamit niyato sa satong ministeryo.
2. Paano ta mapagdadanay na positibo an satong mensahe?
2 Magtao nin Pagranga asin Paglaom: Sa inot na hiling, an libro nin Nahum garo sana kapahayagan nin kalaglagan sa Nineve, an orgulyosong kabisera kan suanoy na Asiria. (Nah. 1:1; 3:7) Minsan siring, an kapahayagan na ini sarong maugmang bareta para sa mga Judio, an banwaan kaidto ni Jehova. Inasegurar sinda ni Nahum, na an pangaran nangangahulugan na “Pararanga,” na mawawara na an saindang kaiwal! Sinabi pa ni Nahum na si Jehova ‘sarong pailihan sa aldaw nin kasakitan.’ (Nah. 1:7) Pag naghuhulit kita, ipinapaabot ta man sa iba an maugmang bareta asin dinadagka sinda na magpaili ki Jehova.—Nah. 1:15.
3. Paano niyato maarog si Nahum sa paggamit nin mga halimbawa asin ilustrasyon?
3 Maggamit nin mga Halimbawa asin Ilustrasyon: Pinasabngan ni Jehova si Nahum na ikumparar an magigin katapusan kan Nineve sa nagin katapusan kan siyudad nin Thebes sa Ehipto (No-amon), na linaglag mismo kan Asiria. (Nah. 3:8-10) Pag ipinapakipag-ulay ta sa iba an manungod sa katapusan kan maraot na sistemang ini nin mga bagay, puwede tang sambiton an mga hula sa Bibliya na nagpapatunay na inuutob ni Jehova an saiyang sinasabi sagkod sa kasadit-saditing detalye. Halimbawa, kan 632 B.C.E., kan salakayon kan mga Babilonyo asin Medo an Nineve, naglipwas an salog nin Tigris huli sa makusog na uran kaya nagaba an halangkaw na lanob kan siyudad. Huli kaiyan, madaling nasakop an Nineve arog kan ihinula ni Jehova.—Nah. 1:8; 2:6.
4. Paano kita magigin malinaw asin madaling maintindihan sa ministeryo?
4 Malinaw asin Madaling Maintindihan: Detalyado asin dramatiko an istilo nin pagsurat ni Nahum. Malinaw an saiyang mga punto. (Nah. 1:14; 3:1) Gusto ta man maggamit nin mga tataramon na madaling maintindihan. (1 Cor. 14:9) Sa inot na pagdalaw, ipaliwanag na nin malinaw kun taano ta nagdalaw ka. Mantang tinutukduan mo sa Bibliya an mga indibidwal, tabangan sindang magkaigwa nin pagtubod ki Jehova saka sa saiyang Tataramon, asin mahiling kun paano ninda ikakaaplikar an mga nanudan ninda.—Roma 10:14.
5. Ano an sinisigurado sa sato kan hula ni Nahum?
5 An pagtitiwala ni Nahum na siguradong mauutob an tataramon ni Jehova hiling-hiling sa libro sa Bibliya na inginaran sa saiya. Mantang nagdadangadang an katapusan kan sistema ni Satanas, nararanga kita sa sinabi nin Diyos: ‘An kasakitan dai matindog nin makaduwa.’—Nah. 1:9.