Bagong mga Awit sa Pagsamba!
1 Sa pinakahuring taunan na miting kan Watch Tower Bible and Tract Society of Pennsylvania, na ginibo kan Oktubre 4, 2014, ipinaisi an planong irebisar an songbook na ginagamit ta ngunyan. Nakakaugma nanggad na bareta iyan! An gabos na nag-atender sa miting na iyan napagirumdom na may mahalagang kabtang sa satong pagsamba an mga awit na pang-Kahadian.—Sal. 96:2.
2 Posibleng maisip nindo, ‘Ta’no ta kaipuhan rebisaron an songbook?’ May nagkapirang dahilan. Inot sa gabos, an satong pakasabot sa Kasuratan padagos na dinadalisay kaya may epekto man iyan sa liriko kan satong mga kanta. (Tal. 4:18) An saro pa, dakul na termino asin pananaram sa ginagamit tang songbook an hali pa sa dating New World Translation. Kaipuhan nang liwaton an mga liriko kaiyan tanganing maibagay sa mga tataramon na ginamit sa revised edition. Pero huling dakulang trabaho an kaipuhan diyan, napagdesisyunan na magdagdag nin nagkapirang bagong kanta sa satong songbook.
3 Kaipuhan ta pa daw maghalat sagkod na mailuwas an bagong songbook bago niyato magamit an bagong kanta? Dai. Nauugma kaming ipaaram sa saindo na sa masunod na mga bulan, may mga bagong kanta na iluluwas sa satong Web site na jw.org. Pag may ilinuwas na bagong kanta, iyan an magigin panghuring kanta sa iskedyul kan Pagtiripon sa Paglilingkod, na may nakalaag na “bagong kanta.”
4 Pag-adalan an Bagong mga Kanta: Bako pirming madali na makanuod nin bagong kanta. Pero, arog kan salmista, gusto ta talagang magkanta sa mga pagtiripon sa kongregasyon asin habo tang magsilensiyo sana. (Sal. 30:12) Para manudan an bagong kanta, sunudon an simpleng mga paaging ini:
Pauruutrong dangugon an piano recording kan kanta, na ilalaag sa satong Web site. Pag pirmi mo iyan na nadadangog, mas madali mo iyan na matandaan.
Pag-adalan an mga liriko, asin hinguwahon na tuumon iyan.
Magkanta kasabay kan rekording. Uruutrong gibuhon iyan sagkod na makabisado an kanta.
Sa saindong Pampamilyang Pagsamba, praktison nin pirang beses an bagong mga kanta sagkod na magin pamilyar kamo diyan.
5 Sa masurunod na bulan pag nakaiskedyul na kantahon an sarong bagong kanta sa katapusan kan Pagtiripon sa Paglilingkod, dadangugon nguna kan kongregasyon an piano recording. Dangan, makanta an gabos kasabay kan rekording, arog kan dati tang ginigibo.
6 Kun iisip-isipon mo an bagay na ini, an pagkanta sa satong mga pagtiripon makakapaugma sa sato mantang iriba kitang nagkakanta sa pag-umaw ki Jehova. Kaya pag oras na nin pagkanta sa satong mga pagtiripon, dai ta pag-ugalion na maghali sa satong tukawan kun dai man kaipuhan.
7 May saro pang paagi kun paano ta maipapahiling an pagpapahalaga sa satong mga kanta nin pag-umaw sa Diyos. Sa mga asembleya asin kumbensiyon, may nadadangog kitang musika bago magpuon an kada sesyon. Duwang beses kada taon, may maigot na mga tugang hali sa manlain-lain na parte kan kinaban na nagbibiyahe pasiring sa Patterson, New York, sa sadiri nindang gastos tanganing makaprodusir nin magayon na musika para sa satong pagsamba. Kaya pag sinabi kan tsirman na magturukaw na asin magdangog sa musikang inandam kan orkestra para sa sato, gibuhon ta iyan. Makakatabang ini sa sato na ihanda an satong puso sa mga impormasyon na madadangog ta.—Esd. 7:10.
8 Sa pagtatapos kan satong pagtiripon ngunyan, kakantahon ta an bagong awit na may titulong “Tindog Na an Kahadian—Lugod Dumatong Na Iyan!” An kantang ini, na itinampok sa nakaagi pa sanang taunan na miting, espesyalmenteng kinomponer para sa ika-100 na anibersaryo kan pagkamundag kan Kahadian.
9 An bagong mga kanta talagang ‘marahay na mga bagay’ hali ki Jehova. (Mat. 12:35a) Magin determinado lugod kita na manudan an bagong mga kanta asin kantahon iyan nin hali sa puso, na itinatao sa satong Diyos an angay na pag-umaw asin onra!—Sal. 147:1.