An Satong Toolbox sa Pagtutukdo
1. Taano ta masasabing kaagid nin mga trabahador an Kristiyanong mga ebanghelisador?
1 Iba-iba an kasangkapan kan mga trabahador. May mga kasangkapan na bihirang gamiton, pero may ibang panginot na kasangkapan na parating ginagamit sa trabaho. An panginot na mga kasangkapan na ini an yaon pirmi sa toolbox kan eksperyensiyadong mga trabahador, asin mahusay sindang marhay sa paggamit kan mga ini. Dinadagka kan Bibliya an lambang Kristiyano na magmaigot sa ministeryo asin magin ‘sarong [trabahador] na dai maninigong masupog.’ (2 Tim. 2:15) Ano an pinakaimportanteng kasangkapan sa satong toolbox? An Tataramon nin Diyos an panginot na kasangkapan na ginagamit niyato sa ‘paggibo nin mga disipulo.’ (Mat. 28:19, 20) Kaya kaipuhan tang maghinguwa na magin mahusay sa ‘paggamit kan tataramon nin katotoohan.’ Pero, may ibang parating ginagamit na mga kasangkapan sa satong toolbox na kaipuhan manudan na gamiton nin mahusay kan gabos na Kristiyano sa pagtutukdo kan katotoohan.—Tal. 22:29.
2. Ano an panginot na mga kasangkapan niyato sa pagtutukdo?
2 An Satong Panginot na mga Kasangkapan sa Pagtutukdo: Apuwera sa Bibliya, ano pang mga kasangkapan an dapat tang gamiton? An panginot na ginagamit niyato sa pagtutukdo kan mga katotoohan sa Bibliya iyo an Ano Man Nanggad an Itinotokdo kan Biblia? Pag natapos na an pag-adal sa librong iyan, ginagamit ta an “Magdanay Kamo sa Pagkamoot nin Dios” tanganing tukduan an tinutukduan sa Bibliya na iaplikar an mga prinsipyo sa Bibliya sa saiyang aroaldaw na pamumuhay. Kaya, kaipuhan na magin mahusay kita sa paggamit kan duwang librong iyan. May mga brosyur na dapat man iiba sa satong toolbox. An Maogmang Bareta Hale sa Dios! saro sa panginot na mga kasangkapan sa pagpuon nin mga pag-adal sa Bibliya. Kun igwa nin mga tawo sa satong teritoryo na daing gayo tatao magbasa o nagtataram nin lengguwahe na kadikit an publikasyon ta o mayo ngani, puwede man niyatong gamiton an Listen to God o Magdangog sa Dios Asin Mabuhay nin Daing Katapusan. An Siisay an Naggigibo kan Kabotan ni Jehova Ngonyan? an panginot na kasangkapan para giyahan sa organisasyon an mga tinutukduan sa Bibliya. An mga video na makakatabang sa paggibo nin mga disipulo, arog kan Ta’no ta Kaipuhan Mag-adal nin Bibliya?, Paano Ginigibo an Pagtiripon sa Kingdom Hall?, asin Does God Have a Name?, kaipuhan man na manudan tang gamiton na marhay.
3. Paano kita tatabangan kan masurunod na isyu kan An Satong Ministeryo sa Kahadian?
3 Tatabangan kita kan masurunod na isyu kan An Satong Ministeryo sa Kahadian na magin mahusay sa paggamit kan nagkapirang panginot na publikasyon na yaon sa satong toolbox. Mantang hinihinguwa tang gamiton nin mahusay an mga kasangkapan na ini, sinusunod niyato an ipinasabong na sadol: ‘[Pirmi mong tawan nin atensiyon an] saimong sadiri asin an saimong pagtutukdo. Magdanay ka sa mga bagay na ini, huli ta sa paggibo mo kaini ililigtas mo an saimong sadiri asin an mga naghihinanyog sa saimo.’—1 Tim. 4:16.