An mga Tataramon na Ini Dapat na Nasa Saimong Puso
An mga magurang kapareho nin mga pastor. Dapat nindang atamanon na marhay an saindang mga aki, ta madali sindang malagalag asin mabiktima nin iba. (Tal. 27:23) Paano iyan magigibo kan mga magurang? Dapat sindang magtagama nin panahon na makaulay kada aldaw an saindang mga aki tanganing maaraman ninda kun ano an nasa isip asin buot kan mga ini. (Tal. 20:5) An mga magurang dapat man na gumamit nin mga materyales na dai nasusulo para pakusugon an pagtubod kan saindang mga aki. (1 Cor. 3:10-15) Itinatampok kan video na ‘Ang mga Salitang Ito ay Dapat na Nasa Iyong Puso’ an kahalagahan kan regular na pampamilyang pagsamba. Hilingon nindo iyan bilang pamilya, dangan pag-ulayan an minasunod na mga hapot.
(1) Ano an dahilan ta mayo sa pokus an espirituwalidad kan pamilyang Roman? (2) Taano ta mayong nangyari sa inot na pagpurbar ni Brother Roman na magkaigwa nin pampamilyang pagsamba? (3) Anong maka-Kasuratan na pormula an makakatao nin pinakamarahay na solusyon sa pagpadakula nin mga aki? (Deut. 6:6, 7) (4) Ano an makakatabang tanganing magin mas maugma an pag-urulay kan pamilya? (5) Anong mga pagsasakripisyo an kaipuhan gibuhon kan mga magurang para sa saindang mga aki? (6) Paano nagin marahay na impluwensiya si Brother asin Sister Barrow sa pamilyang Roman? (Tal. 27:17) (7) Ano an dapat na patiinot na gibuhon kan payo nin pamilya tanganing magin mapanggana an pampamilyang pagsamba? (8) Ano an mga ginibo ni Brother Roman tanganing magrahay an relasyon nindang magkakapamilya? (9) Taano ta importante na bakong paburubago an iskedyul kan pampamilyang pagsamba? (Efe. 6:4) (10) Ano an mga puwedeng gibuhon sa pampamilyang pagsamba? (11) Paano si Brother Roman nagin kalmado pero mapuwersa kan tinatabangan niya si Marcus na masabutan an kahalagahan kan paggibo kan tama? (Jer. 17:9) (12) Paano kinaulay ni Brother asin Sister Roman si Rebecca tanganing tabangan ining makapagdesisyon nin tama dapit sa relasyon kaini ki Justin? (Mar. 12:30; 2 Tim. 2:22) (13) Paano nagpahiling nin pagtubod si Brother asin Sister Roman kan naggigibo sinda nin mga pagbabago sa saindang buhay? (Mat. 6:33) (14) Paano ipinahiling sa video na kaipuhan kan mga payo nin pamilya na itao an espirituwal na pangangaipo kan saindang pamilya? (1 Tim. 5:8) (15) Ano an determinado mong gibuhon bilang payo nin pamilya?
PARA SA MGA PAYO NIN PAMILYA: Iprinesentar an modernong dramang ini sa pandistritong kumbensiyon kan 2011. Kan mahiling nindo idto, may naisip daw kamong kaipuhan na baguhon sa saindong pampamilyang pagsamba? Kumusta ngunyan? Kun may kaipuhan pang baguhon, ipamibi tabi iyan asin hinguwahon na magibo huling para iyan sa daing katapusan na kapakinabangan kan saindong pamilya.—Efe. 5:15-17.