Kun Paano Ihinahayag kan Kaglalang an Saiyang Mamumuton na mga Panuga

Puon pa kan lalangon an katawuhan, nakikikomunikar na sa mga tawo an satong Kaglalang paagi sa mga anghel asin mga propeta. Saro pa, ipinasurat niya an saiyang mensahe saka an ipinanuga niyang mga biyaya. Nanunuga an Diyos na puwede kang magkaigwa nin maugmang buhay sa maabot. Kaya sain mo mababasa ngunyan an mga panuga nin Diyos?

Yaon sa Banal na Kasuratan an mensahe sa sato nin Diyos. (2 Timoteo 3:16) Paano nin Diyos ipinasurat sa mga propeta an saiyang mensahe? (2 Pedro 1:21) Ipinasabong nin Diyos an saiyang kaisipan sa pinili niyang mga lalaki, dangan isinurat ninda iyan. Kapareho iyan kan sarong negosyante na nagpapasurat nin mensahe sa saiyang sekretaryo. Maski ngani bako siya an nagsurat, aram tang hali sa negosyante an mensahe. Kaya dawa ipinasurat kan Diyos sa mga tawo an saiyang mensahe, siya talaga an Awtor kan Banal na Kasuratan.

AN TATARAMON NIN DIYOS PUWEDENG MABASA KAN GABOS

Mahalagang marhay an mensahe nin Diyos kaya gusto niyang mabasa iyan saka masabutan kan gabos na tawo. Ngunyan, an saiyang “daing katapusan na maugmang bareta” puwede nang manudan kan “gabos na nasyon asin tribo asin lengguwahe.” (Kapahayagan 14:6) Huli sa paggiya nin Diyos, an Banal na Kasuratan mababasa na nin bilog o porsiyon sana sa labing 3,000 na lengguwahe, mas dakul nanggad kisa sa arin man na libro sa kinaban.