“Tawan Mo nin Onra an Saimong Ama Saka an Saimong Ina”

Kan nasa daga si Jesus, idinuon niya an pagbuot na ini: “Tawan mo nin onra an saimong ama saka an saimong ina.” (Ex 20:12, NW; Mat 15:4) Masasabi iyan ni Jesus nin daing pag-alangan huling “nagdanay siyang masinunod” sa saiyang mga magurang kan aki pa siya. (Lu 2:51, nota sa ibaba) Kan siya adulto na, sinigurado niya na may maataman sa saiyang ina pagkagadan niya.—Ju 19:26, 27.

Sa panahon ta man ngunyan, tinatawan nin onra kan mga hoben na Kristiyano an mga magurang ninda paagi sa pagigin masinunod asin pakikipag-ulay sa sainda nin may paggalang. An totoo, aplikado an pagbuot na iyan sa gabos na panahon. Dawa pa gurang na an satong mga magurang, dapat na padagos ta sindang tawan nin onra paagi sa pagpapahalaga sa kadunungan na itinukdo ninda. (Tal 23:22) Tinatawan ta man nin onra an satong maedad nang mga magurang paagi sa pagtao sa sainda nin emosyonal asin pinansiyal na tabang kun kaipuhan. (1Ti 5:8) Hoben man kita o gurang, an pagkaigwa nin marahay na komunikasyon sa satong mga magurang sarong panginot na paagi nin pagtao nin onra sa sainda.

HILINGON AN WHITEBOARD ANIMATION NA PAANO AKO MAKIKIPAG-ULAY SA MGA MAGURANG KO? DANGAN SIMBAGON AN MINASUNOD NA HAPOT:

• Taano ta tibaad nadidipisilan kang makipag-ulay sa saimong mga magurang?

• Paano mo matatawan nin onra an saimong mga magurang pag nakikipag-ulay ka sa sainda?

  

• Taano ta sulit an paghihinguwa mong makipag-ulay sa saimong mga magurang? (Tal 15:22)