PAMUMUHAY BILANG KRISTIYANO
Hanapon an Kaisipan nin Diyos
Gusto tang mapaugma si Jehova sa gabos na ginigibo ta. (Tal 27:11) Para magibo iyan, kaipuhan tang gumibo nin mga desisyon na nagpapabanaag kan saiyang kaisipan dawa pa mayo nin espesipikong tugon o pagbuot na magiya sa sato. Ano an makakatabang sa sato na magibo iyan?
Papagdanayon an regular na rutina nin pag-adal sa Bibliya. Sa kada pagbasa ta nin Bibliya, garo ta man sana nakakaibanan si Jehova. Puwede tang manudan an kaisipan ni Jehova paagi sa pag-obserbar kun paano niya trinatar an saiyang mga lingkod asin paagi sa pag-adal sa halimbawa kan mga naggibo nin marahay o maraot sa saiyang paghiling. Pag kaipuhan tang gumibo nin desisyon, puwedeng ipagirumdom sa sato kan banal na espiritu an importanteng mga leksiyon saka mga prinsipyo na nanudan ta sa Tataramon nin Diyos.—Ju 14:26.
Mag-research. Pag kaipuhan mong magdesisyon, haputon an sadiri, ‘Anong mga teksto o istorya sa Bibliya an makakatabang sako na masabutan kun ano an sabuot ni Jehova sa bagay na ini?’ Mamibi para sa tabang ni Jehova, asin gumamit nin mga pantabang sa pag-research na igwa sa lengguwahe mo na makakatabang saimo na mahanap asin maiaplikar an mga prinsipyo sa Bibliya na makakatabang sa sitwasyon mo.—Sal 25:4.
HILINGON AN VIDEO NA DAPAT NA “MAGDALAGAN KITA NA MAY PAKATAGAL”—MAGKAKAN NIN MASUSTANSIYANG KAKANON, DANGAN SIMBAGON AN MINASUNOD NA MGA HAPOT:
Anong mga panggigipit an naeksperyensiyahan kan hoben na sister sa video?
Paano mo magagamit an mga pantabang sa pag-research para mapangganahan an kaparehong mga panggigipit?
Paano kita nakikinabang pag nagtatao kita nin panahon sa pag-research asin personal na pag-adal na makakatabang sa sato na makagibo nin marahay na mga desisyon?—Heb 5:13, 14