PAMUMUHAY BILANG KRISTIYANO

Handa Ka Na Daw Pag Nagkaigwa nin Krisis sa Ekonomiya?

Dai na kita nabibigla pag an mga pangyayari sa kinaban nagkakawsa nin krisis sa ekonomiya. Taano? Huling nabubuhay na kita sa puro kan huring mga aldaw asin pinapatanidan kita kan Bibliya na dai ibugtak an satong tiwala sa “kayamanan na mayong kasiguruhan.” (1Ti 6:17; 2Ti 3:1) Ano an itinutukdo sato kan halimbawa ni Hading Jehosafat kun manungod sa pagigin handa pag nagkaigwa nin krisis sa ekonomiya?

Kan mapaatubang sa pananakot kan kaiwal na mga nasyon, nagtiwala si Jehosafat ki Jehova. (2Cr 20:9-12) Ihinanda man niya an nasyon antes pa paagi sa pagpakusog kan depensa kan mga siyudad asin pagbugtak nin mga garison. (2Cr 17:1, 2, 12, 13) Arog ni Jehosafat, mas marahay na magtiwala kita ki Jehova asin gumibo nin mga paghahanda para maatubang an masakit na mga panahon.

ANO AN PUWEDE TANG GIBUHON PARA MAGIN HANDA PAG NAGKAIGWA NIN KRISIS SA EKONOMIYA?

Magin handa sa espirituwal: Magin kontento, asin pakusugon an pagtitiwala mo sa kakayahan ni Jehova na itao an mga pangangaipo mo sa aroaldaw. (Mat 6:26; 1Ti 6:8) Dai nuarin man ikompromiso an mga prinsipyo sa Bibliya para sana magkaigwa kan mga pangangaipong iyan. (Ro 2:21) Pag-isipan kun paano ka makakakua nin espirituwal na kakanon kun mawaran nin kuryente o Internet. Magsaray nin nagkapirang piniling imprentadong publikasyon, asin kun posible, mag-download antes pa kan mga publikasyon sa electronic format.

Magin handa sa materyal: Bawasan an utang asin an dai kinakaipuhan na mga gastusan bago pa magkaigwa nin krisis sa ekonomiya. (Tal 22:7) Kun posible, magkaigwa nin rasonableng istak na suplay nin mga pagkakan asin iba pang mga kaipuhan. Puwedeng pag-isipan kan nagkapira na magtanom asin magkaigwa nin tanuman nin mga gulay para makatipid.

HILINGON AN VIDEO NA PREPARADO KA DAW SA KALAMIDAD ASIN IBA PANG PELIGRO? DANGAN SIMBAGON AN MINASUNOD NA MGA HAPOT:

Sarong eksena sa video na “Preparado Ka Daw sa Kalamidad Asin Iba Pang Peligro?” Mahihiling diyan an sarong Bibliya, go bag asin cellphone, saka mga nagtatrabaho sa pagtugdok.

Ano an puwede tang gibuhon para preparado kita sa kalamidad asin iba pang peligro?

An saimong simbag

Sarong eksena sa video na “Preparado Ka Daw sa Kalamidad Asin Iba Pang Peligro?” Mga tugang na nagtatabang sa pagtao nin ayuda paagi sa gibuhon na pagtugdok asin pagdiskarga nin mga materyales sa trak.

Paano kita magigin preparado sa pagtabang sa iba?

An saimong simbag