An Pagigin Marahay na Tawo Daw Naggagarantiya nin Magayon na Puturo?

Sa laog nin dakul na siglo, iniisip kan dakul na tawo na an pagigin marahay na tawo iyo an paagi para magkaigwa nin magayon na puturo. Halimbawa, nagtutubod an mga taga Sirangan sa sinabi kan pilosopo asin paratukdo na si Confucius (551-479 B.C.E.): “An habo mong gibuhon saimo, dai mo paggibuhon sa iba.”a

PAAGI NIN PAMUMUHAY NA SINUSUNOD KAN DAKUL

Dakul pa man giraray an nagtutubod na an tamang paggawi iyo an sekreto para magkaigwa nin magayon na puturo. Naghihinguwa sinda na magin magalang, magkaigwa nin marahay na mga ugali, makatabang sa komunidad, asin mapagdanay an malinig na konsiyensiya. “Talagang nagtutubod ako na kun onesto ako saka sinsero,” an sabi ni Linh, sarong babayi na taga Vietnam, “bibiyayaan ako dahil kaiyan.”

An iyo man sanang babayi nagtatao nin kakanon sa mga pobre asin sa mga daing istaran.

Naggigibo nin marahay an iba dahil sa mga relihiyosong paniniwala ninda. Sarong lalaki na an pangaran Hsu-Yun, na nakaistar sa Taiwan, an nagsabi, “Itinukdo sako na nakadepende sa ginigibo kan saro mantang buhay siya kun baga magigin maugma siya nin daing katapusan pagkagadan niya o magsasakit siya.”

ANO AN MGA RESULTA?

Pagkatapos nin maghapon, an babayi mamundo asin pagal-pagal, karga an saiyang aking lalaki.

Totoo na dakul an pakinabang kan paggibo nin marahay sa iba. Pero, nahiling kan dakul na sinserong tawo na naghihinguwang maggibo nin marahay sa iba na bako man pirming marahay an ibinabalos sa sainda. “Nahiling ko mismo na an mga naggigibo nin marahay sa iba bako pirming marahay na balos an nakukua,” an sabi kan sarong babayi na an pangaran Shiu Ping, na nakaistar sa Hong Kong. “Ginibo ko an pinakamakakaya ko para atamanon an pamilya ko saka gumibo nin marahay. Pero dai nagin magayon an pag-ibanan ming mag-agom, tapos binayaan niya kami kan aki ko.”

Nahiling kan dakul na dai man pirming natatabangan kan relihiyon an mga tawo na magin marahay. “Nagin miyembro ako nin sarong relihiyosong organisasyon, saka nag-oorganisar ako kaidto nin mga aktibidad para sa mga hoben,” an sabi ni Etsuko, sarong babayi na nakaistar sa Japan. “Nabigla ako kan mahiling ko an imoral na mga gibo-gibo, pag-aragawan sa posisyon, saka salang paggamit nin pondo kan mga karelihiyon ko.”

“Ginibo ko an pinakamakakaya ko para atamanon an pamilya ko saka gumibo nin marahay. Pero dai nagin magayon an pag-ibanan ming mag-agom, tapos binayaan niya kami kan aki ko.”—SHIU PING, HONG KONG

An ibang mga debotong marhay sa relihiyon ninda nadidisganar pag sa ibong kan saindang marahay na mga gibo may nangyayari pa man giraray saindang maraot. Arog kaiyan an namatian ni Van, sarong babayi na taga Vietnam. “Aroaldaw akong nagbabakal nin mga prutas, burak, saka kakanon, tapos pigdudulot ko iyan sa mga altar kan nagadan kong mga apuon, ta nag-aasa ako na bibiyayaan ako pag-abot nin panahon,” an sabi niya. “Sa ibong kan gabos na marahay kong ginigibo saka kan mga ginigibo kong ritwal sa relihiyon sa laog nin dakul na taon, nagkahilang an agom ko na nagpaluya sa hawak niya. Tapos, su aki kong babayi na nagkaklase sa ibang nasyon, nagadan na hobenon pa.”

KUN TAANO TA AN PAGIGIN MARAHAY NA TAWO BAKONG IGO PARA MAGKAIGWA NIN MAGAYON NA PUTURO

Mahalaga an magin marahay na tawo, pero bako iyan garantiya na magkakaigwa an saro nin magayon na puturo. Taano man? Pag-isipan an sinasabi sa sato kan Banal na Kasuratan.

BAKO GABOS NAGGIGIBO NIN MARAHAY

“Maski saro sanang parakasala kayang makaraot nin dakul na karahayan.”—ECLESIASTES 9:18.

Dawa grabe an pagmamaigot mo na magin marahay na tawo, puwedeng maraot an puturo mo kan makasadiring gibo-gibo kan iba. Halimbawa, sa panahon nin pandemya puwedeng sinusunod mo an mga sinasabi kan mga awtoridad asin naglilikay ka na magrani sa iba. Pero paano kun dai magsunod an iba? An dai ninda pagsunod puwedeng magin dahilan na maulakitan ninda nin hilang an mga naghihinguwang gibuhon an tama.

PUWEDENG MASALA AN MGA TAWO SA KUN ANO AN MARAHAY O MARAOT

“Igwa nin dalan na garo baga tama sa paghiling nin sarong tawo, pero kagadanan an puro kaiyan.”—TALINHAGA 14:12.

Dakulon nin halimbawa sa kasaysayan nin mga tawo na naggibo nin mga bagay na sa paghuna ninda tama, pero kan huri naaraman ninda na sala sinda. Dawa pa marahay an intensiyon kan saro, dai siya kaiyan mapoprotektaran sa mga konsekwensiya kan saiyang salang mga desisyon.

DAING KASIGURUHAN AN BUHAY

“Dai man nindo aram kun ano an magigin buhay nindo sa kinaagahan.”—SANTIAGO 4:14.

Dawa gurano pa karahay kan sarong tawo, puwede siyang magadan nin dai inaasahan. Halimbawa sa panahon kan COVID-19 na pandemya, dakul na mapagsakripisyong mga boluntaryo an nagadan. Pag-isipan man an inagihan ni Liting, sarong babayi na taga China na nagadan an ama sa sarong aksidente sa awto. Sinabi niya: “Dai ko masabutan kun ta’no ta nagadan an arog kaiyan kabuot na tawo. Mahiguson si Papa, mapakumbaba, saka sinsero. Siya sana sa mga yaon duman sa awto an nagadan.”

Kun an pagigin marahay na tawo dai makakagarantiya na an saro magkakaigwa nin magayon na puturo, ano kun siring an makakagarantiya? Para masimbag an hapot na iyan, kaipuhan ta nin mapagkakatiwalaan na giya—sarong mapagkukuanan nin impormasyon na makakasimbag sa mga hapot niyato asin makakatabang sato na magkaigwa nin magayon na puturo. Sain ta makukua an arog kaiyan na giya?

a Para sa dagdag na impormasyon manungod sa impluwensiya kan katukduan ni Confucius, hilingon an kapitulo 7, parapo 31-35, kan librong Ang Paghahanap ng Tao sa Diyos, na ipinublikar kan Mga Saksi ni Jehova asin makukua online sa www.jw.org/tl.