Magayon na Puturo—An Gusto kan Gabos
Anong klaseng puturo an gusto mo? Siguradong arog kan kadaklan, gusto mo nin magayon na puturo para saimo saka sa pamilya mo—saro na maugma, may marahay na salud, matuninong, saka maginhawa an buhay.
Pero, dakul na tawo an dai sigurado kun baga magkakaigwa sinda kan puturo na gusto ninda. Nahiling ninda an biglaan saka dai linalauman na mga pangyayari—arog kan COVID-19 na pandemya—na nakaribaraw sa sosyedad, nakaraot sa ekonomiya, asin guminadan nin dakul na tawo. Dahil diyan, pagmati ninda dai na sinda magkakaigwa nin magayon na puturo.
Dahil sa kawaran nin kasiguruhan, nagmamaigot na marhay an mga tawo na makahanap nin makakatao sainda nin magayon na puturo. Nagtitiwala an iba sa mga dai nahihiling na puwersa arog kan kapaladan o suwerte. Dakul an nagpopokus sa pagkua nin edukasyon asin kayamanan, na iniisip na an mga ini an makakatao sa sainda kan mga bagay na gusto ninda. Iniisip man kan iba na an kaipuhan lang nindang gibuhon iyo na magin marahay na tawo para magkaigwa sinda nin magayon na buhay.
Maitatao daw kan arin man sa mga iyan an puturo na gusto mo? Para maaraman, kaipuhan mong pag-isipan an mga hapot na ini:
Sain talaga nakadepende an puturo mo?
Makakagarantiya daw nin marahay na buhay an edukasyon saka kuwarta?
An pagigin marahay na tawo daw naggagarantiya nin magayon na puturo?
Sain ka makakakua nin mapagkakatiwalaan na giya para magkaigwa nin magayon na puturo?
Matatabangan ka kan isyung ini kan An Torrengbantayan na maaraman an mga simbag.