Makakagarantiya Daw nin Magayon na Puturo an Edukasyon Saka Kuwarta?

Iniisip kan dakul na an mga may halangkaw na inadalan saka mga mayaman magkakaigwa nin magayon na puturo. Naniniwala sinda na an halangkaw na edukasyon makakatabang sa saro na magin mas marahay na empleyado saka mas marahay na miyembro nin pamilya asin nin komunidad. Iniisip man ninda na an marahay na edukasyon matao sainda nin trabaho na halangkaw an suweldo asin na idtong mga tawo na naggaganar nin dakul na kuwarta magigin maugma.

AN NAGIGIN DESISYON KAN DAKUL

Pag-isipan an sinabi ni Zhang Chen, na taga China. Sinabi niya, “Naniniwala ako na kaipuhan kong makatapos sa kolehiyo para makahali sa pagtios asin na an trabaho na may halangkaw na suweldo makakatao nin maugma saka nakakakontentong buhay.”

Para magkaigwa nin magayon na puturo, dakul an gustong-gustong magklase sa sikat na mga unibersidad, na tibaad sa ibang nasyon pa ngani. Dakul nanggad an naggigibo kaiyan bago malimitaran an mga pagbiyahe sa ibang nasyon dahil sa COVID-19. Sarong report kan 2012 kan Organisation for Economic Co-operation and Development an nagsabi: “An 52% kan gabos na estudyanteng nagkaklase sa ibang nasyon mga taga Asia.”

Sa parati, grabe an sakripisyong ginigibo kan mga magurang tangani sanang makaklase an mga aki ninda sa mga unibersidad sa ibang nasyon. Si Qixiang, na taga Taiwan, nagsabi: “Bako man mayaman an mga magurang mi, pero pinaklase ninda kaming apat na magturugang sa kolehiyo sa Estados Unidos.” Para mabayadan an mga gastusan, an pamilya niya, arog kan dakul na iba pa, nagkaigwa nin dakulaon na utang.

ANO AN MGA RESULTA?

Dawa paano nakakatabang an edukasyon para magrahay an buhay, pero dai kaiyan pirming naitatao an mga resulta na inaasahan kan mga estudyante. Halimbawa, pagkatapos nin dakul na taon na pagsasakripisyo asin pagkaigwa nin dakulang utang, dakul an dai nakahanap nin trabaho na gusto ninda. Sa sarong report ni Rachel Mui sa Business Times kan Singapore, sinabi niya: “Nagpaparadakul an naggagradwar sa mga unibersidad na dai nakakakua nin trabaho.” Si Jianjie, na nakatapos nin doctorate na nakaistar sa Taiwan, nagsabi, “Dakul an mayong maginibo kundi akuon an sarong trabaho na mayong koneksiyon sa saindang tinapusan.”

Dawa an mga nakakua nin trabaho na konektado sa tinapusan ninda puwedeng dai pa man giraray mangyari su mga inaasahan ninda. Pagkabalik ni Niran, na taga Thailand, hali sa pagklase sa sarong unibersidad sa United Kingdom, nakakua siya nin trabaho na konektado sa tinapusan niya. “Arog kan inaasahan ko, natabangan ako kan pagklase ko na makakua nin trabaho na may mas halangkaw na suweldo. Pero, pag mas halangkaw an suweldo, mas dakul man na trabaho saka panahon an hinahagad sako. Pag-abot nin panahon, tinanggal kan kompanya an kadaklan sa mga empleyado kaiyan, kaiba na ako. Napag-isip-isip ko na mayo nin kasiguruhan sa arin man na trabaho.”

Dawa an mga mayaman o an mga nagkaigwa na kan inaapod na marahay na buhay nagkakaigwa pa man giraray nin mga problema sa pamilya, malalang hilang, asin nahahadit pa man giraray sa pinansiyal. Si Katsutoshi, na taga Japan, nagsabi, “Dakulon akong kuwarta, pero disganado ako ta may kumpetisyon, may mga nauuri sako, saka maraot an pagtratar kan iba sako.” Si Lam, sarong babayi na nakaistar sa Vietnam, nagsabi, “Dakul an nahiling kong naghinguwa na makakua nin trabaho na may halangkaw na suweldo para magkaigwa nin pinansiyal na seguridad, pero an totoo, igwa iyan nin ibang epekto—takot asin kahaditan, mga hilang, grabeng stress, asin depresyon.”

Arog ni Franklin, dakul an nakapagsabi na may mas mahalagang mga bagay kisa sa pagkua nin halangkaw na edukasyon asin pagkaigwa nin kayamanan. Imbes na ipokus an saindang buhay sa materyal na mga bagay, naghihinguwa an iba na magkaigwa nin marahay na puturo paagi sa pagigin marahay na tawo asin paggibo nin marahay sa iba. An paggibo daw kaiyan makakagarantiya na an saro magkakaigwa nin magayon na puturo? Sisimbagon iyan kan sunod na artikulo.