KUN PAANO MAPAPAPUNDO AN DAI MATAPOS-TAPOS NA PAGKAUNGIS

1 | Dai Magpalain-lain

Itinutukdo kan Bibliya:

“An Diyos mayong pinapalain, kundi sa lambang nasyon, inaako niya an [gabos na] tawong may pagkatakot sa saiya asin naggigibo nin matanos.”—GIBO 10:34, 35.

An Buot Sabihon Kaiyan:

Dai kita hinuhusgaran kan Diyos na Jehovaa base sa satong nasyonalidad, lahi, kulor, o kultura. Imbes, nagpopokus siya sa kun ano talaga an mahalaga—kun ano an nasa puso ta. Sa katunayan, “an tawo naghihiling sa kun ano an nahihiling kan mga mata, alagad si Jehova naghihiling sa kun ano an nasa puso.”—1 Samuel 16:7.

An Puwede Mong Gibuhon:

Dawa ngani dai man kita nakakabasa nin puso, puwede tang arugon an Diyos asin mansayon an iba na daing pagpalain-lain. Maghinguwang mansayon an mga tawo bilang mga indibidwal asin bako bilang sarong grupo. Kun naririsa mo na igwa kang negatibong sabuot sa ibang tawo—tibaad sa saro na iba an lahi o nasyonalidad—mamibi sa Diyos asin hagadon saiya na tabangan kang mahali iyan. (Salmo 139:23, 24) Kun sinsero mong hahagadon ki Jehova na tabangan kang dai magpalain-lain, makakasigurado ka na dadangugon niya an pamibi mo asin tatabangan ka niya.—1 Pedro 3:12.

a Jehova an personal na pangaran nin Diyos.—Salmo 83:18.

“Dai ko pa lamang dati nakaibanan an sarong puti na daing nangyayaring iriwal . . . Ngunyan parte na ako nin sarong tunay na internasyonal na kasararuan nin magturugang.”—TITUS

Eksperyensiya—TITUS

Nahali Niya an Pakamati nin Pagkaungis

Miyembro si Titus nin sarong bayolenteng gang na ikinakaanggot an bakong makatanusan na mga ley manungod sa pagsuway-suway base sa lahi. Sinabi niya: “Nagduduman kami sa mga lugar kun sain bawal an mga itom arog kan mga hotel saka bar tangani sanang makipag-iwal.” Sinabi ni Titus na an namamati niyang pagkaungis an dahilan kaiyan, asin sinabi pa niya: “Pag may nakakadiskutir ako, lalaki man o babayi, ako an pirming naiinot na mangulog.”

Nagpuon na magbago si Titus kan makipag-adal siya nin Bibliya sa mga Saksi ni Jehova. Kan mabasa niya an Bibliya, dakulaon an nagin epekto kaiyan saiya. Nakapahiro na marhay sa saiya an pangako manungod sa maabot na kinaban na diyan “an kagadanan mawawara na. Dai na man magkakaigwa nin pagmundo, o nin pagtangis, o nin kulog.”—Kapahayagan 21:3, 4.

Kan primero, nasakitan si Titus na halion an pagkaungis na yaon sa saiyang puso. “Masakiton na baguhon an sakong pag-iisip saka paggawi,” an sabi niya. Pero natabangan siya kan nanudan niya sa Gibo 10:34, 35, na nagsasabi na an Diyos dai nagpapalain-lain.

Ano an nagin resulta? Ipinaliwanag ni Titus: “Nagin kumbinsido ako na an mga Saksi ni Jehova an tunay na relihiyon kan mahiling ko an pagkamuot ninda sa lambang saro, ano man an saindang lahi o kulor. Dawa kan dai pa ako bawtisado bilang Saksi, sarong puting tugang sa kongregasyon an nag-imbitar sako na magkakan sa saindang harong. Garo iyan sarong pangaturugan. Dai ko pa lamang dati nakaibanan an sarong puti na daing nangyayaring iriwal, pero ngunyan kaibanan ko siyang nagkakakan sa saindang harong. Ngunyan parte na ako nin sarong tunay na internasyonal na kasararuan nin magturugang.”