KUN PAANO MAPAPAPUNDO AN DAI MATAPOS-TAPOS NA PAGKAUNGIS

2 | Dai Magbalos

Itinutukdo kan Bibliya:

“Dai magbalos sa kiisay man nin maraot para sa maraot. . . . Kun posible, sagkod na nakadepende iyan sa saindo, makipagkatuninungan sa gabos na tawo. Dai nanggad kamo magbalos, . . . huli ta nasusurat: ‘“Sakuya an pagbalos; ako an mabalos,” an sabi ni Jehova.’”—ROMA 12:17-19.

An Buot Sabihon Kaiyan:

Dawa normal sanang maanggot pag ginibuhan nin maraot, dai inuuyunan nin Diyos an pagbalos. Imbes, sinasadol niya kita na mapasensiyang maghalat sa saiya dahil madali na niyang itanos an gabos na inhustisya.—Salmo 37:7, 10.

An Puwede Mong Gibuhon:

Pag nagbalos an bakong perpektong mga tawo, nagpapadagos an pagkaungis. Kaya, kun may nakakulog kan buot mo o may naggibo saimong maraot, dai magbalos. Hinguwahon na kontrulon an namamatian mo saka magin kalmado. May mga pagkakataon na tibaad mas marahay na palampason na sana an nangyari. (Talinhaga 19:11) Siyempre, may mga pagkakataon na mas marahay kun aatubangon mo an problema. Halimbawa, kun nagin biktima ka nin krimen, puwede mong ireport an krimen sa pulis o sa iba pang nasa awtoridad.

Ika man sana an madadanyaran kun dai mo ipupundo an pagbalos

Paano kun garo baga mayo nin matuninong na paagi para masolusyunan an problema? O paano kun ginibo mo na an gabos para masolusyunan an problema sa matuninong na paagi? Dai magbalos. Mas mapaparaot sana kaiyan an sitwasyon. Imbes, ipundo an dai matapos-tapos na pagkaungis. Makakapagtiwala ka sa paagi nin Diyos sa pagsolusyon sa problema. “Manarig ka sa saiya, asin mahiro siya para sa saimo.”—Salmo 37:3-5.

Eksperyensiya—ADRIÁN

Nahali Niya an Kagustuhan na Magbalos

Bilang sarong tin-edyer, nagin bayolente si Adrián saka nagin parapakiiwal dahil sa kagustuhan na magbalos. Sinabi niya: “Parati akong naiimbuwelto sa baradilan, asin pirang beses akong haros nagkarigos sa dugo asin binabayaan sa tinampo na haros gadan na.”

Nagpuon na mag-adal nin Bibliya si Adrián kan 16 anyos siya. Sinabi pa niya: “Mantang nag-uuswag ako sa pag-adal nin Bibliya, nahiling kong kaipuhan kong baguhon an personalidad ko.” Kaipuhan niyang mahali an pagkaungis saka ipundo an pagigin bayolente. Nakinabang siyang marhay sa nanudan niya sa Roma 12:17-19 manungod sa dai pagbalos. Sinabi niya: “Nanudan kong akuon na si Jehova an mahali kan inhustisya sa sadiri niyang paagi asin panahon. Padiit-diit, nahali ko an pagigin bayolente.”

Sarong banggi, inatake si Adrián kan dati niyang kaiwal na gang. Nagkurahaw su lider: “Lumaban ka!” Inadmitir ni Adrián: “Gustong-gusto ko kaidtong magbalos.” Pero imbes na magbalos, namibi siya nin halipot ki Jehova asin naghali na.

Sinabi pa ni Adrián: “Kan sunod na aldaw, nakasabatan ko su lider kan gang pero solo sana siya. Nag-init an dugo ko saka gustuhon kong magbalos, pero hinagad ko giraray ki Jehova na tabangan niya akong makapagpugol. Nangalas ako kan magrani siya sako asin magsabi: ‘Pasensiya na sa nangyari kasubanggi. An totoo, gusto kong magin arog mo. Gusto kong mag-adal nin Bibliya.’ Marahay na sana talaga ta napugulan ko su kaanggutan ko! Dahil diyan, magkaibanan na kaming nag-adal nin Bibliya.”