KUN PAANO MAPAPAPUNDO AN DAI MATAPOS-TAPOS NA PAGKAUNGIS

3 | Halion sa Isip an Pagkaungis

Itinutukdo kan Bibliya:

“Maliwat kamo paagi sa pagbago kan saindong isip, tanganing mapatunayan nindo sa saindong sadiri an marahay, akseptable, saka perpektong kabutan nin Diyos.”—ROMA 12:2.

An Buot Sabihon Kaiyan:

Mahalaga sa Diyos kun ano an iniisip ta. (Jeremias 17:10) Dawa ngani dapat tang likayan an pagtaram o paggibo nin ano man na nagpapahiling nin pagkaungis, bako lang iyan an dapat tang gibuhon. An dai matapos-tapos na pagkaungis nagpupuon sa isip saka sa puso. Kaya, dapat tang halion an ano man na gira nin pagkaungis sa satong isip asin puso. Iyan sana an paagi para talagang “maliwat” kita asin mapundo an dai matapos-tapos na pagkaungis.

An Puwede Mong Gibuhon:

Isipon na marhay kun ano talaga an iniisip saka sabuot mo sa iba—lalo na sa mga iba an lahi saka nasyonalidad. Haputon an sadiri: ‘Ano an paghiling ko sainda? An iniisip ko daw manungod sainda nakabasar sa kun ano talaga an aram ko sa sainda? O nakabasar iyan sa pagpapalain-lain?’ Likayan an social media, mga pelikula, o libangan na nagtatampok nin pagkaungis saka kadahasan.

Matatabangan kita kan Tataramon nin Diyos na mahali an pagkaungis sa satong isip saka puso

Bako pirming pasil na magkaigwa nin tamang paghusgar pag sinisiyasat ta an satong sadiring kaisipan asin sabuot. Pero matatabangan kita kan Tataramon nin Diyos na “sabuton an mga kaisipan saka mga intensiyon kan puso.” (Hebreo 4:12) Kaya padagos na pag-adalan an Bibliya. Ikumparar an mga katukduan kaiyan sa saimong kaisipan, asin gibuhon mo an saimong pinakamakakaya na maiuyon an saimong kaisipan sa kun ano an itinutukdo kan Bibliya. Matatabangan kita kan Tataramon nin Diyos na mahali an pagkaungis na “matibay an pagkaestablisar” sa satong isip saka puso.—2 Corinto 10:4, 5.

Eksperyensiya—STEPHEN

Binago Niya an Saiyang Kaisipan

Naeksperyensiyahan ni Stephen saka kan saiyang mga kapamilya an pagkaungis kan mga puti. Bilang resulta, naimpluwensiyahan siya kan sarong pulitikal na grupo na agresibong nakikipaglaban para sa mga isyu sa deretso kan mga tawo. Pag-abot nin panahon, nakiiba siya sa paggibo nin krimen na dahil sa pagkaungis. Sinabi ni Stephen: “May pagkakataon kaidto na naghiling kami kan mga amigo ko nin pelikulang nagpapahiling kan mga pagsakit na inagihan kan mga uripon na Aprikano sa Estados Unidos. Sa grabeng kaanggutan dahil sa mga inhustisyang idto, nambugbog kami nin mga hoben na puti duman mismo sa laog kan sinehan. Pagkatapos, nagduman kami sa mga komunidad nin mga puti para maghanap pa nin mabubugbog.”

Nabagong marhay an kaisipan ni Stephen kan magpuon siyang makipag-adal nin Bibliya sa mga Saksi ni Jehova. Sinabi niya: “Dahil dakulon na akong nahiling na diskriminasyon huli sa lahi, napangalas akong marhay sa nahiling ko sa mga Saksi. Halimbawa, kan kinaipuhan magbiyahe sa ibang nasyon kan sarong puting Saksi, iwinalat niya an saiyang mga aki sa sarong pamilyang itom. Igwa man nin pamilyang puti na nagpaistar sa harong ninda nin sarong hoben na itom na nangangaipo nin maiistaran.” Nagin kumbinsido si Stephen na talagang yaon sa mga Saksi ni Jehova an pagkamuot na sa-magturugang na ihinula ni Jesus na mahihiling sa tunay na mga Kristiyano.—Juan 13:35.

Ano an nakatabang ki Stephen na bayaan an saiyang mga gibo-gibo na dahil sa pagkaungis? Natabangan siya kan Roma 12:2. Sinabi niya: “Napag-isip-isip ko na kaipuhan kong baguhon an sakong kaisipan. Kaipuhan kong baguhon an sakong isip, bako lang para magin mapagpatuninong kundi dahil nahiling ko man na ini an pinakamarahay na paagi nin pamumuhay.” Sa ngunyan, labi nang 40 taon na namumuhay si Stephen na dai nakakamati nin pagkaungis.