KUN PAANO MAPAPAPUNDO AN DAI MATAPOS-TAPOS NA PAGKAUNGIS

Halion an Pagkaungis sa Tabang nin Diyos

Itinutukdo kan Bibliya:

“An bunga kan espiritu iyo an pagkamuot, kagaya-gayahan, katuninungan, pagpapasensiya, kabuutan, karahayan, pagtubod, kahuyuan, pagpupugol sa sadiri.”—GALACIA 5:22, 23.

An Buot Sabihon Kaiyan:

Kayang mahali an dai matapos-tapos na pagkaungis sa tabang nin Diyos. Puwede kitang tabangan kan saiyang banal na espiritu na magkaigwa nin mga kuwalidad na tibaad dai lamang kita magkakaigwa kun sa sadiri ta sana. Kaya imbes na sa sadiri sana magdepende para hinguwahon na halion an pagkaungis, mas marahay na magsarig kita sa tabang na itinatao nin Diyos. Kun gigibuhon ta iyan, maeeksperyensiyahan ta an naeksperyensiyahan ni apostol Pablo, na nagsurat: “Igwa akong kusog na atubangon an gabos na bagay paagi sa saiya na nagtatao sa sako nin puwersa.” (Filipos 4:13) Asin masasabi ta: “An tabang sa sakuya hali ki Jehova.”—Salmo 121:2.

An Puwede Mong Gibuhon:

“Binago ako ni Jehova hali sa pagigin madahas pasiring sa pagigin mapagpatuninong na tawo.”—WALDO

Udok na hagadon ki Jehova sa pamibi an saiyang banal na espiritu. (Lucas 11:13) Hagadon saiya na tabangan kang maipahiling sa saimong buhay an diyosnon na mga kuwalidad. Pag-adalan an manungod sa mga kuwalidad na sinasabi kan Bibliya na nakakatabang na mahali an pagkaungis, arog kan pagkamuot, pagigin mapagpatuninong, pagpapasensiya, saka pagpupugol sa sadiri. Maghanap nin mga paagi para mapatalubo an mga kuwalidad na iyan sa saimong buhay. Asin makiiba-iba sa mga tawong naghihinguwa man na magkaigwa nin arog kaiyan na mga kuwalidad. Makakatabang sinda na “mapahiro [ka] na magpahiling nin pagkamuot asin marahay na mga gibo.”—Hebreo 10:24.

Eksperyensiya—WALDO

Nahali Niya an Grabeng Pagkaungis

Bakong magayon an nagin buhay ni Waldo kan nagdadakula siya, kaya pano nin pagkaungis an puso niya. Inistorya niya: “Pirmi akong naiimbuwelto sa pakikipagrambulan sa mga nagpapabakal nin droga . . . Sarong beses, an kalaban ming gang nagbayad nin sarong midbid na paragadan para gadanon ako, pero nakadulag ako na may saro lang na saksak.”

Dai naugma si Waldo kan an agom niya magpuon na makipag-adal nin Bibliya sa mga Saksi ni Jehova. Sinabi niya: “Uyamon ako sa mga Saksi, asin dakul na beses ko sindang kinurahawan nin bastos na mga tataramon. Pero pirming kalmado an reaksiyon ninda.”

Pag-abot nin panahon, nagpuon na man na mag-adal nin Bibliya si Waldo. Sinabi niya: “Bakong pasil na isabuhay an mga nanunudan ko. Paghuna ko dai ko na talaga makokontrol an pagigin arangguton kong marhay.” Pero may nanudan siya sa Bibliya na nakapabago kan saiyang sabuot.

Ipinaliwanag ni Waldo: “Sarong aldaw, ipinabasa sako kan nagtutukdo sako na si Alejandro an Galacia 5:22, 23. . . . Ipinaliwanag ni Alejandro na an pagpatalubo kan mga kuwalidad na iyan dai nakadepende sa sadiri kong kusog, kundi sa banal na espiritu nin Diyos. An katotoohan na iyan biyong nakapabago kan sakong sabuot!”

Paagi sa pagsarig sa tabang nin Diyos, nahali ni Waldo sa saiyang buhay an pagkaungis. Sinabi niya: “Dai makapaniwala an sakong mga paryente saka an dating mga amigo ko sa dakulaon na pagbabago ko.” Sinabi pa niya: “Binago ako ni Jehova hali sa pagigin madahas pasiring sa pagigin mapagpatuninong na tawo.”