ARTIKULONG PAG-AADALAN 24
Si Jehova—An Pinakamarahay na Halimbawa sa Pagpapatawad
“Ika, O Jehova, marahay asin andam na magpatawad; abunda ka sa maimbod na pagkamuot para sa gabos na nag-aapod sa saimo.”—SAL. 86:5.
KANTA 42 An Pamibi kan Lingkod nin Diyos
SUMARYO KAN PAG-AADALANa
1. Siring kan mababasa sa Eclesiastes 7:20, anong katotoohan an sinabi ni Hading Solomon?
SINABI ni Hading Solomon: “Mayo nin matanos na tawo sa daga na pirming naggigibo nin marahay asin dai nuarin man nagkakasala.” (Ecl. 7:20) Totoong-totoo nanggad iyan! Gabos kita mga parakasala. (1 Juan 1:8) Kaya gabos kita kaipuhan an pagpapatawad nin Diyos asin kan satong kapwa.
2. Ano an mamamatian ta pag pinatawad kita nin sarong dayupot tang amigo?
2 Siguradong may natatandaan kang pagkakataon na nakulgan mo an sarong dayupot na amigo mo. Gusto mong itama an mga bagay-bagay asin ibalik giraray an marahay na relasyon nindo, kaya udok sa puso kang naghagad nin tawad saiya. Ano an namati mo kan lubos kang patawadon kan amigo mo? Naggian daw su buot mo? Iyo, saka maugmahon ka man na marhay!
3. Ano an pag-uulayan ta sa artikulong ini?
3 Gusto ta na si Jehova an magin pinakadayupot na Amigo ta, pero may mga pagkakataon na nakakataram kita o nakakagibo nin mga bagay na nakakapamundo sa saiya. Alagad, taano ta makakasigurado kita na talagang gusto ni Jehova na patawadon kita? Sa anong paagi daing kaagid an pagpapatawad ni Jehova kun ikukumparar sa pagpapatawad na ginigibo ta bilang tawo? Asin, siisay an mga pinapatawad nin Diyos?
SI JEHOVA ANDAM NA MAGPATAWAD
4. Taano ta makakasigurado kita na si Jehova andam na magpatawad?
4 Inaasigurar sa sato kan Tataramon nin Diyos na si Jehova andam na magpatawad. Kan ipinamidbid ni Jehova an sadiri niya ki Moises sa Bukid nin Sinai, sinabi Niya paagi sa sarong anghel: “Si Jehova, si Jehova, sarong Diyos na mahihirakon asin mapagmalasakit, dai tulos naaanggot asin abunda sa maimbod na pagkamuot saka katotoohan, nagpapahiling nin maimbod na pagkamuot sa rinibo, nagpapatawad nin salang gibo asin paglapas saka kasalan.” (Exo. 34:6, 7) Si Jehova sarong mabuot asin mahihirakon na Diyos na pirming andam na patawadon an nagsusulsol na mga parakasala.—Neh. 9:17; Sal. 86:15.
Aram ni Jehova an gabos na nangyari sa sato na nagmolde sa satong personalidad (Hilingon an parapo 5)
5. Sigun sa Salmo 103:13, 14, huling midbid na marhay kita ni Jehova, napapahiro siya kaiyan na gibuhon an ano?
5 Bilang satong Kaglalang, aram ni Jehova an gabos manungod sa sato. Isipa na sana! Aram niya an kada detalye manungod sa lambang tawo digdi sa daga. (Sal. 139:15-17) Kaya hiling-hiling niya an gabos na kaluyahan na namana ta sa satong mga magurang. Dugang pa, aram niya an gabos na nangyari sa sato na nagmolde sa satong personalidad. Huling midbid na marhay kita ni Jehova, napapahiro siya kaiyan na gibuhon an ano? Napapahiro siyang magin mahihirakon sa sato.—Sal. 78:39; basahon an Salmo 103:13, 14.
6. Paano pinatunayan ni Jehova na gusto niya talagang patawadon kita?
6 Pinatunayan ni Jehova na gusto niya talagang patawadon kita. Nasasabutan niya na huli sa ginibo kan inot na tawo, si Adan, gabos kita napasairarom sa sumpa nin kasalan asin kagadanan. (Roma 5:12) Mayo kitang magiginibo para patalingkason an satong sadiri o an ibang tawo sa sumpang iyan. (Sal. 49:7-9) Pero, nagpahiling nin pagmalasakit an satong mamumuton na Diyos asin naggibo siya nin paagi tanganing patalingkason kita. Ano an ginibo niya? Arog kan sinasabi kan Juan 3:16, isinugo ni Jehova an saiyang bugtong na Aki para magadan alang-alang sa sato. (Mat. 20:28; Roma 5:19) Nagadan si Jesus para sa sato tanganing mapatalingkas an siisay man na nagtutubod sa saiya. (Heb. 2:9) Siguradong nakulgan na marhay si Jehova na mahiling an saiyang namumutan na Aki na mag-agi nin makulugon asin makasusupog na kagadanan! Siyertong dai kutana itutugot ni Jehova na magadan an saiyang Aki kun habo Niyang patawadon kita.
7. Sairisay an nagkapirang halimbawa nin mga indibidwal sa Bibliya na lubos na pinatawad ni Jehova?
7 Sa Bibliya, dakul na halimbawa nin mga indibidwal na lubos na pinatawad ni Jehova. (Efe. 4:32) Siisay an mga naiisip mo? Posibleng maisip mo si Hading Manases. An maraot na tawong iyan grabeng marhay an nagibong pagkakasala ki Jehova. Nagsamba siya sa mga palsong diyos asin dinagka an iba na gibuhon man iyan. Ginadan niya an sadiri niyang mga aki asin iinatang sinda sa mga paganong diyos. Nagbugtak pa ngani siya nin inukit na imahen nin sarong palsong diyos sa sagradong templo ni Jehova. Sinasabi kan Bibliya manungod sa saiya: “Dakulon an ginibo niyang maraot sa paghiling ni Jehova tanganing paangguton siya.” (2 Cron. 33:2-7) Pero, kan ipahiling ni Manases an saiyang udok sa pusong pagsulsol, lubos siyang pinatawad ni Jehova. Ibinalik pa ngani siya nin Diyos sa saiyang posisyon bilang hadi. (2 Cron. 33:12, 13) Puwedeng maisip mo man si Hading David, na nakagibo nin magabat na kasalan ki Jehova, kaiba na an pagsambay asin paggadan. Alagad, kan sinserong nagsulsol si David asin inadmitir an saiyang kasalan, pinatawad man siya ni Jehova. (2 Sam. 12:9, 10, 13, 14) Iyo, nakakasigurado kita na talagang gusto ni Jehova na magpatawad. Asin arog kan maaaraman ta, an pagpapatawad ni Jehova daing kaagid kun ikukumparar sa pagpapatawad na ginigibo nin tawo.
AN DAING KAAGID NA KAKAYAHAN NI JEHOVA NA MAGPATAWAD
8. Bilang daing kaagid na Hukom, ano an epekto kaiyan ki Jehova sa saiyang kakayahan na magpatawad?
8 Si Jehova an “Hukom kan bilog na daga.” (Gen. 18:25) An sarong marahay na hukom kaipuhan na igwa nin hararom na pakasabot sa ley. Asin totoo nanggad iyan ki Jehova huling apuwera sa pagigin satong Hukom, siya man an satong Paratao nin Katugunan. (Isa. 33:22) Mayo nin siisay man apuwera ki Jehova an igwa nin lubos na pakasabot sa kun ano an tama asin sala. Ano pa an kaipuhan nin sarong marahay na hukom? Kaipuhan na may kakayahan siyang ikonsiderar an gabos na impormasyon manungod sa sarong kaso bago magtao nin desisyon. Sa aspektong ini, si Jehova an pinakakuwalipikadong Hukom.
9. Anong mga impormasyon an kinokonsiderar ni Jehova pag nagdedesisyon siya kun mapatawad o dai?
9 Bakong arog nin mga tawong hukom, pirming lubos na nasasabutan ni Jehova an gabos na detalye kan ano man na kaso. (Gen. 18:20, 21; Sal. 90:8) Dai siya nakadepende sana sa kun ano an nahihiling o nadadangog nin mga tawo. Lubos niyang nasasabutan kun paano nakakaapektar sa ginigibo nin sarong tawo an minana niyang mga karakteristiko, an pagpadakula saiya, asin an lugar kun sain siya nagdakula pati na an kamugtakan kan saiyang emosyon saka kaisipan. Nababasa man ni Jehova an puso. Aram niyang marhay an mga motibo, intensiyon, saka pagmawot kan lambang tawo. Mayo nin maitatago ki Jehova. (Heb. 4:13) Kaya an pagpapatawad ni Jehova pirming nakabasar sa lubos niyang pakasabot sa sarong sitwasyon.
Si Jehova makatanusan, rasonable, asin mayong ipinapaurog. Dai siya nasusuhulan (Hilingon an parapo 10)
10. Taano ta masasabi tang pirming makatanusan asin rasonable an paghusgar ni Jehova? (Deuteronomio 32:4)
10 An paghusgar ni Jehova pirming makatanusan asin rasonable. Mayo nanggad siyang ipinapaurog. An pagpapatawad niya dai nakadepende sa itsura, yaman, reputasyon, o abilidad nin saro. (1 Sam. 16:7; Sant. 2:1-4) Mayo nin makakapirit ki Jehova na gibuhon an ano man o makakasuhol saiya. (2 Cron. 19:7) An saiyang mga desisyon nungkang apektado nin pagkauyam o sentimyento. (Exo. 34:7) Daing duda, si Jehova an pinakakuwalipikadong Hukom huli sa saiyang hararom na pakasabot.—Basahon an Deuteronomio 32:4.
11. Taano ta daing kaagid an pagpapatawad ni Jehova?
11 Minidbid kan mga kagsurat kan Hebreong Kasuratan na daing kaagid an pagpapatawad ni Jehova. May mga pagkakataon na naggamit sinda nin Hebreong tataramon na sigun sa sarong reperensiya “partikular nang para sa pagpapatawad nin Diyos sa nagkasala, asin nungkang ginamit para ipanungod sa mas hababang klase asin sukol nin pagpapatawad na ginigibo nin sarong tawo sa kapwa niya.” Si Jehova sana an may awtoridad na lubos na patawadon an sarong nagsusulsol na parakasala. Ano an resulta pag pinatawad kita ni Jehova?
12-13. (a) Ano an naeeksperyensiyahan nin saro pag pinatawad siya ni Jehova? (b) Sagkod nuarin maeeksperyensiyahan an mga pakinabang kan pagpapatawad ni Jehova?
12 Pag inaako ta an katotoohan na pinatawad na kita ni Jehova, naeeksperyensiyahan ta “an mga panahon nin kaginhawahan,” kaiba na an katuninungan nin isip asin malinig na konsiyensiya. An siring na pagpapatawad dai maitatao nin tawo; imbes, si “Jehova mismo” an makakatao kaiyan. (Gibo 3:19) Pag pinapatawad kita ni Jehova, lubos niyang ibinabalik an marahay na relasyon niya sa sato na garo baga dai kita nagkasala.
13 Pag pinatawad na kita ni Jehova, dai niya na kita aakusaran o papadusahan giraray huli sa kasalan na iyan. (Isa. 43:25; Jer. 31:34) “Kun gurano kaharayo kan sirangan sa sulnupan,” arog kaiyan kaharayo ibinubugtak ni Jehova an satong mga kasalan.b (Sal. 103:12) Pag hinuhurop-hurop ta kun gurano kadakula kan pagpapatawad ni Jehova, nakakamati kita nin dakulang pasasalamat asin hararom na paggalang. (Sal. 130:4) Pero siisay an mga papatawadon ni Jehova?
SIISAY AN PAPATAWADON NI JEHOVA?
14. Sa puntong ini, ano an nanudan ta pag nagdedesisyon si Jehova na magpatawad?
14 Arog kan naaraman ta, an desisyon ni Jehova na magpatawad dai nakadepende sa kun baga dakula o sadit an kasalan. Nanudan ta man na ginagamit ni Jehova an saiyang kaaraman bilang satong Kaglalang, Paratao nin Katugunan, saka Hukom pag nagdedesisyon kun baga papatawadon niya an saro. Anong mga bagay an kinokonsiderar ni Jehova?
15. Uyon sa Lucas 12:47, 48, ano an sarong bagay na kinokonsiderar ni Jehova?
15 An sarong bagay na kinokonsiderar ni Jehova iyo na kun baga aram kan nagkasala na sala an ginigibo niya. Malinaw iyan na sinambit ni Jesus, na mababasa sa Lucas 12:47, 48. (Basahon.) An saro na tuyong nagpapakana para gumibo nin maraot mantang aram na aram niyang naggigibo siya nin sarong bagay na nakakapaanggot ki Jehova, nagkakasala nin magabat. Namemeligro siyang dai patawadon. (Mar. 3:29; Juan 9:41) Pero minsan, aram ta man na sala an ginibo ta. Kun arog kaiyan, may paglaom pa daw na mapatawad kita? Igwa nanggad! Kaya pag-ulayan ta an saro pang bagay na kinokonsiderar ni Jehova.
Makakapagtiwala kita na papatawadon kita ni Jehova pag sinsero kitang nagsusulsol (Hilingon an parapo 16-17)
16. Ano an pagsulsol, asin taano ta mahalagang marhay iyan para patawadon kita ni Jehova?
16 An saro pang kinokonsiderar ni Jehova iyo na kun baga sinserong nagsusulsol an parakasala. Ano an buot sabihon nin pagsulsol? An pagsulsol nangangahulugan na “binabago nin saro an saiyang kaisipan, sabuot, o katuyuhan.” Kaiba diyan an ideya na an tawo nakakamati nin pagbasol asin grabeng kamunduan sa maraot na mga bagay na nagibo niya o manungod sa dai niya paggibo kan tama na dapat niya kutang ginibo. An saro na nagsusulsol nagmumundo bako lang huli sa mga nagibo niyang sala kundi pati man sa maluyang espirituwalidad niya na nagin dahilan na magibo niya an mga salang idto. Girumdumon na si Hading Manases saka si Hading David parehong nakagibo nin magabat na mga kasalan; pero, pinatawad sinda ni Jehova ta sinsero sindang nagsulsol. (1 Ha. 14:8) Iyo, dapat makahiling si Jehova nin patunay nin pagsulsol para patawadon an saro. Pero bakong igo na makamati sana kita nin pagbasol sa kasalan na nagibo ta. Dapat na andam kitang ipahiling sa gibo na nagsusulsol kita.c Kaya pag-ulayan ta an saro pang bagay na kinokonsiderar ni Jehova.
17. Ano an pagbabago, asin taano ta mahalagang marhay iyan kun gusto niyatong malikayan na mautro an mga salang nagibo ta? (Isaias 55:7)
17 An saro pang importanteng bagay na kinokonsiderar ni Jehova iyo an pagbabago. An pagbabago nangangahulugan nin “pagbakli.” An buot sabihon, dapat baguhon nin saro an saiyang dalan paagi sa pagbaya sa saiyang maraot na dalan asin paglakaw sa dalan ni Jehova. (Basahon an Isaias 55:7.) Dapat na baguhon kan indibidwal an saiyang isip tanganing magiyahan siya kan kaisipan ni Jehova. (Roma 12:2; Efe. 4:23) Dapat na determinado siyang bayaan an saiyang dating maraot na mga kaisipan asin paggawi. (Col. 3:7-10) Siyempre, an satong pagtubod sa atang ni Cristo an nagtatao nin tunay na basehan para patawadon kita ni Jehova asin linigon kita sa satong kasalan. Papatawadon kita ni Jehova basado sa atang na iyan pag nahihiling niya an sinserong pagmamaigot niyato na baguhon an satong paggawi.—1 Juan 1:7.
MAGTIWALA SA PAGPAPATAWAD NI JEHOVA
18. Ano an mga pinag-ulayan ta manungod sa pagpapatawad ni Jehova?
18 Repasuhon ta sa halipot an nagkapira sa mahalagang mga punto na pinag-ulayan ta. Si Jehova an talagang pinakanangungurog na Parapatawad sa uniberso. Taano ta nasabi ta iyan? Inot, pirmi siyang andam na magpatawad. Ikaduwa, midbid niya kitang marhay. Aram niya an gabos na detalye manungod sato, asin siya an pinakakuwalipikadong maghusgar kun baga talagang nagsusulsol kita. Asin ikatulo, lubos an pagpapatawad ni Jehova, na garo baga pinapara niya an kasalan ta. Kaya nagkakaigwa kita nin malinig na konsiyensiya asin nagkakamit kan saiyang pag-uyon.
19. Dawa ngani bako kitang perpekto asin padagos na magkakasala, taano ta puwede kitang mag-ugma?
19 Siyempre, sagkod na kita bakong perpekto, padagos kitang magkakasala. Pero, mararanga kita kan mga tataramon na mababasa sa Kaunawaan sa Kasulatan, Tomo 2, pahina 712: “Mantang mahihirakon na kinokonsiderar ni Jehova an kaluyahan sa laman kan saiyang mga lingkod, dai ninda kaipuhan na pirming makamati nin grabeng pagbasol huli sa saindang mga sala na dara kan minanang pagkabakong perpekto. (Sal 103:8-14; 130:3) Kun ginigibo ninda an saindang pinakamakakaya para maglakaw sa dalan nin Diyos, puwede sindang mag-ugma. (Flp 4:4-6; 1Ju 3:19-22).” Nakakapakusog nanggad iyan!
20. Ano an pag-uulayan ta sa sunod na artikulo?
20 Nagpapasalamat kita na andam si Jehova na patawadon kita pag talagang pinagbabasulan ta an mga kasalan na nagibo ta. Pero paano ta maaarog an pagpapatawad ni Jehova? Sa anong mga paagi na an satong pagpapatawad kaagid kan pagpapatawad ni Jehova, alagad sa anong mga paagi man iyan magkaiba? Taano ta mahalagang masabutan ta an pagkakalain kaiyan? Sisimbagon an mga hapot na iyan sa sunod na artikulo.
KANTA 45 An Paghurop-hurop kan Sakong Puso
a Sa saiyang Tataramon, inaasigurar sa sato ni Jehova na andam siya na patawadon an nagsusulsol na mga parakasala. Pero, kun beses, tibaad mamatian tang bako kitang maninigo sa pagpapatawad niya. Sa artikulong ini, pag-uulayan ta kun taano ta makakasigurado kita na pirming andam an satong Diyos na patawadon kita pag talagang nagbabasol kita sa mga nagibo tang kasalan.
b Hilingon an librong Rumani ki Jehova, kap. 26, par. 9.
c PALIWANAG DAPIT SA TATARAMON: An “pagsulsol” nanunungod sa pagbago nin isip na may kaibang udok sa pusong pagbasol sa dating paagi nin pamumuhay, salang mga gibo, o mga bagay na dai nagibo. An tunay na pagsulsol igwa nin nahihiling na bunga, an pagbabago sa paggawi asin pamumuhay.