Akuon an Pagpapatawad ni Jehova

1-2. Anong kaginhawahan an puwedeng mamatian nin mga nagkasala na tunay na nagsusulsol? (Hilingon man an ritrato.)

ARAM ni Hading David an pagmati na makonsiyensiya dahil sa mga nagibong kasalan. (Sal. 40:12; 51:3; superskripsiyon) Nakagibo siya kaidto nin magabat na mga kasalan. Pero, nagpahiling siya nin udok na pagsulsol, asin pinatawad siya ni Jehova. (2 Sam. 12:13) Huli kaiyan, aram man ni David an kaginhawahan na resulta kan pagpapatawad ni Jehova.—Sal. 32:1.

² Arog ni David, puwede ta man mamatian an kaginhawahan na resulta kan pag-ako niyato kan pagkahirak ni Jehova. Nakakaranga nanggad maaraman na andam si Jehova na patawadon an satong mga kasalan—dawa pa magabat iyan—kun tunay kitang nagsusulsol, kun itutuga ta iyan, asin kun ginigibo ta an satong pinakamakakaya na dai na iyan pag-utruhon! (Tal. 28:13; Gibo 26:20; 1 Juan 1:9) Saka nakakapakusog nanggad maaraman na lubos niya kitang pinapatawad na garo baga dai lamang nangyari an satong kasalan!—Ezek. 33:16.

3-4. Ano an namatian nin sarong sister pagkatapos niyang mabawtismuhan, asin ano an pag-uulayan niyato sa artikulong ini?

³ Alagad, tibaad nasasakitan kun minsan an iba na akuon na pinatawad na sinda ni Jehova. Pag-isipan an eksperyensiya ni Jennifer, na nagdakula sa katotoohan. Kan siya tin-edyer, nagpuon siyang gumibo nin maraot na mga bagay asin nagkaigwa nin dobleng pamumuhay. Pakalihis nin mga taon, nagbalik siya ki Jehova asin pag-abot nin panahon nakuwalipikar para sa bawtismo. Sinabi niya: “Materyalistiko ako kaidtong marhay, grabe kaimoral, makusugon uminom, saka grabe kun maanggot. Sa isip ko, aram ko man na pagkatapos kong makimahirak na patawadon saka magsulsol, malinig na ako huli sa atang ni Cristo. Pero dai ko makumbinsir an puso ko na talagang pinatawad na ako.”

⁴ Nasasakitan ka daw kun minsan na kumbinsiron an puso mo na pinatawad na ni Jehova an mga nagibo mo kaidtong sala? Gusto ni Jehova na, arog ni David, lubos kitang magtiwala sa Saiyang pagkahirak. Sa artikulong ini, pag-uulayan niyato kun taano ta kaipuhan tang akuon an pagpapatawad ni Jehova asin kun ano an makakatabang sa sato na magibo iyan.

TAANO TA KAIPUHAN NIYATONG AKUON AN PAGPAPATAWAD NI JEHOVA?

5. Sa ano kita gustong papaniwalaon ni Satanas? Magtao nin halimbawa.

⁵ Paagi sa pag-ako kan pagpapatawad ni Jehova, malilikayan niyatong mahulog sa saro sa mga siod ni Satanas. Tandaan na gigibuhon ni Satanas an gabos tanganing papunduhon kita sa paglilingkod ki Jehova. Para mangyari iyan, tibaad papaniwalaon kita ni Satanas na dai na mapapatawad an satong mga kasalan. Pag-isipan an eksperyensiya nin sarong lalaki sa Corinto na hinali sa kongregasyon dahil sa seksuwal na imoralidad. (1 Cor. 5:1, 5, 13) Kan huri, nagsulsol siya. Pero buot ni Satanas na an mga nasa kongregasyon magin bakong mapagpatawad—na magin nanggad sindang daing hirak asin dai na akuon giraray sa kongregasyon an lalaki. Kasabay kaiyan, buot man ni Satanas na mamatian kan nagsusulsol na lalaki na dai na siya mapapatawad—na “madaog kan grabeng kamunduan” asin magpundo na sa paglilingkod ki Jehova. Dai nagbago an mga taktika o an buot na mangyari ni Satanas. Alagad “bako man kitang ignorante sa saiyang mga pakana.”—2 Cor. 2:5-11.

6. Paano kita magiginhawahan kun riniribok pa man giraray kita kan satong konsiyensiya?

⁶ Paagi sa pag-ako kan pagpapatawad ni Jehova, magiginhawahan kita huling dai na kita riribukon kan satong konsiyensiya. Pag nagkasala kita, natural sanang makamati kita nin pagkakonsiyensiya. (Sal. 51:17) Marahay iyan. Puwede kitang pahiruon kan satong konsiyensiya na gumibo nin mga pagbabago para maitanos an satong dalan. (2 Cor. 7:10, 11) Pero, kun padagos pa man giraray kitang nakokonsiyensiya dawa haloy na niyatong pinagsulsulan an satong kasalan, tibaad magpundo na lugod kita sa paglilingkod ki Jehova. Pag inako na niyato an pagpapatawad ni Jehova, puwede ta nang ibugtak an pagkakonsiyensiya kun sain iyan dapat—sa likudan ta. Dangan makakapaglingkod na kita ki Jehova sa paaging buot niya para sa sato—an paglingkudan niyato siya nin may malinig na konsiyensiya asin nin may kaugmahan. (Col. 1:10, 11; 2 Tim. 1:3) Pero, paano ta makukumbinsir an satong puso na akuon an pagpapatawad ni Jehova?

ANO AN MAKAKATABANG SA SATO NA AKUON AN PAGPAPATAWAD NI JEHOVA?

7-8. Paano ilinadawan ni Jehova an saiyang sadiri ki Moises, asin sa ano kita makakapagtiwala huli kaiyan? (Exodo 34:6, 7)

⁷ Hurop-hurupon kun paano ilinadawan ni Jehova an saiyang sadiri. Halimbawa, mangnuhon kun ano an sinabi kaidto ni Jehova ki Moises sa Bukid nin Sinai.a (Basahon an Exodo 34:6, 7.) Sa gabos na puwedeng sabihon ni Jehova manungod sa saiyang mga kuwalidad asin mga pamamaagi, pinili niyang iladawan an saiyang sadiri bilang “sarong Diyos na mahihirakon asin mapagmalasakit.” Ipapanguri daw kan siring na Diyos an pagpapatawad sa parasamba niyang tunay na nagsusulsol sa saiyang kasalan? Dai nanggad! Huling mangangahulugan iyan na daing hirak siya saka matagas an puso—mga kuwalidad na dai nanggad kayang ipahiling ni Jehova.

⁸ Makakapagtiwala kita na nungkang mahiro si Jehova sa paaging bakong kauyon kan pagkakaladawan niya sa sadiri niya, huling siya Diyos na nagsasabi nin katotoohan. (Sal. 31:5) Kaya lubos kitang makakapagtiwala sa mga sinasabi niya. Kun nadidipisilan kang halion an pagkakonsiyensiya sa mga nagibo mo kaidtong kasalan, haputon an sadiri: ‘Naniniwala daw ako na totoong mahihirakon saka mapagmalasakit si Jehova asin nungka niyang ipapanguri an pagpapatawad sa siisay man na nagsusulsol na nagkasala? Kun iyo, bako daw na dapat kong akuon na pinatawad niya na ako?’

9. Ano an buot sabihon kan pinatawad na an satong mga kasalan? (Salmo 32:5)

⁹ Hurop-hurupon kun ano an ipinasabong ni Jehova na sabihon kan mga kagsurat kan Bibliya manungod sa saiyang pagpapatawad. Halimbawa, pag-isipan kun paano ilinadawan kan kagsurat kan Bibliya na si David an pagpapatawad ni Jehova. (Basahon an Salmo 32:5.) “Pinatawad mo an sakong mga pagkakasala,” an sabi ni David. Sa Hebreo, an tataramon na itrinadusir na “pinatawad” puwedeng mangahulugan na “alsahon,” “halion,” o “darahon.” Kan pinatawad ni Jehova si David, garo man sana Niya inalsa an mga kasalan kaini asin dinara an mga iyan parayo. Dangan nakamati si David nin kaginhawahan huling nahali na an magabat niyang pasan—an saiyang grabeng pagkakonsiyensiya. (Sal. 32:2-4) Puwede man kitang makamati nin kaagid na kaginhawahan. Kun udok na kitang nagsulsol, dai ta na kaipuhan na padagos na pasanon, sabi ngani, an grabeng pagkakonsiyensiya sa mga kasalan na inalsa asin dinara na ni Jehova parayo sa sato.

10-11. Ano an manunudan ta manungod ki Jehova sa mga tataramon na “andam na magpatawad”? (Salmo 86:5)

¹⁰ Basahon an Salmo 86:5. Ilinaladawan digdi ni David si Jehova bilang “andam na magpatawad.” Manungod sa ekspresyon na iyan, ini an komento kan sarong reperensiya sa Bibliya manungod ki Jehova: “[Siya] ‘parapatawad’—iyan an ‘naturalesa’ niya.” Taano ta naturalesa ni Jehova an pagigin mapagpatawad? Ini an paliwanag kan sunod na parte kan bersikulo: “Abunda ka sa maimbod na pagkamuot para sa gabos na nag-aapod sa saimo.” Arog kan nanudan ta sa sinundan na artikulo, pinapahiro si Jehova nin maimbod na pagkamuot na magkaigwa nin hararom asin nagdadanay na mapagpadangat na relasyon sa saiyang maimbod na mga parasamba. Huli sa saiyang maimbod na pagkamuot, ‘andam niyang papatawadon’ an gabos na nagsusulsol na nagkasala. (Isa. 55:7, nota sa ibaba) Kun nasasakitan kang akuon an pagpapatawad nin Diyos, puwede mong ihapot sa saimong sadiri: ‘Naniniwala daw ako na Parapatawad si Jehova—na andam niyang patawadon an gabos na nagsusulsol na nagkasala na nakikiulay na pahilingan sinda nin pagkahirak? Kun iyo, bako daw na dapat kong akuon na pinatawad niya na ako kan makiulay ako saiya na pahilingan ako nin pagkahirak?’

¹¹ Makakamati kita nin karangahan huling aram niyatong lubos na nasasabutan ni Jehova an satong makasalan na kamugtakan. (Sal. 139:1, 2) Malinaw ining ipinapahiling sa saro pa sa mga salmo ni David, na makakatabang man sa sato na akuon an pagpapatawad ni Jehova.

DAI PAGLINGAWAN KUN ANO AN PIGGIGIRUMDOM NI JEHOVA

12-13. Uyon sa Salmo 103:14, ano an ginigirumdom sa satuya ni Jehova, asin napapahiro siya kaiyan na gibuhon an ano?

¹² Basahon an Salmo 103:14. Sinabi ni David na si Jehova “ginigirumdom na kita alpog lang.” Paagi sa mga tataramon na iyan, ipinaliwanag ni David an saro sa mga dahilan kun taano ta andam si Jehova na patawadon an nagsusulsol na mga parasamba: Pirmi niyang isinasaisip an satong makasalan na kamugtakan. Tanganing mas masabutan iyan, urog pa niyatong pag-ulayan an mga tataramon ni David.

¹³ Sinabi ni David na si Jehova “aram [na] marhay kun paano kita hinaman.” Hinaman Niya si Adan “hali sa alpog kan daga” asin aram Niyang marhay na an perpektong mga tawo igwa nin natural na mga limitasyon—halimbawa, kaipuhan nindang magkakan, magturog, asin maghangos. (Gen. 2:7) Pero kan magkasala si Adan asin Eva, nagkaigwa nin dugang pang kahulugan an pagigin alpog. Bilang mga gikan ninda, minana niyato an saindang pagigin makasalan na nagigin dahilan na magkaigwa kita kan tendensiyang gumibo nin sala. Dai lang basta aram ni Jehova an satong makasalan na kamugtakan; sinabi ni David na “ginigirumdom” Niya iyan. An Hebreong tataramon na ginamit digdi puwedeng mangahulugan na gumibo nin positibong aksiyon. Puwede niyatong sumaryuhon an kahulugan kan mga tataramon ni David sa arog kaining paagi: Nasasabutan ni Jehova na magkukulang kita paminsan-minsan; pag nangyari iyan, napapahiro siya kan satong udok sa pusong pagsulsol na pahilingan kita nin pagkahirak asin patawadon.—Sal. 78:38, 39.

14. (a) Paano ipinaliwanag ni David kun gurano kalubos kan pagpapatawad ni Jehova? (Salmo 103:12) (b) Paano ipinapahiling kan halimbawa ni David kun gurano kalubos kan pagpapatawad ni Jehova? (Hilingon an kahon na “Kun Paano ni Jehova Pinapatawad Asin Linilingawan an Satong mga Kasalan.”)

¹⁴ Gurano kalubos kan pagpapatawad ni Jehova? (Basahon an Salmo 103:12.) Sinabi ni David na “kun gurano kaharayo kan sirangan sa sulnupan, arog man . . . kaiyan kaharayo ibinubugtak [ni Jehova] hali sa sato” an satong mga kasalan pag siya nagpapatawad. An sirangan pirming nasa pinakaharayong distansiyang maiimahinar ta hali sa sulnupan; nungkang magkakatagbuan an duwang iyan. Ano an manunudan ta digdi manungod sa mga kasalan na pinatawad na ni Jehova? Arog kaini an pagkailustrar diyan nin sarong reperensiya: “Kun an kasalan hahalion asin ibubugtak sa harayuon, makakasigurado kita na biyo nang mayo an parong kaiyan, an ano man na tada kaiyan, an mismong pakagirumdom diyan.” Isip-isipa na sana—an parong puwedeng magpagirumdom sa sato nin sarong bagay. Alagad pag si Jehova nagpapatawad, garo man sana mayo ni kadikit na parong an natatada na magpapagirumdom sa kasalan asin magpapangyaring gamiton niya iyan laban sa sato.—Ezek. 18:21, 22; Gibo 3:19.

15. Ano an puwede tang gibuhon kun padagos pa man giraray kitang nakokonsiyensiya sa mga nagibo ta kaidtong sala?

¹⁵ Paano makakatabang sa sato an mga tataramon ni David na yaon sa Salmo 103 na akuon an pagpapatawad ni Jehova? Kun padagos pa man giraray kitang nakokonsiyensiya sa mga nagibo ta kaidtong kasalan, puwede tang haputon an satong sadiri: ‘Nalilingawan ko daw kun ano an piggigirumdom ni Jehova—sa ibang pagtaram, nalilingawan ko daw na isinasaisip ni Jehova an sakong makasalan na kamugtakan asin na papatawadon niya an nagsusulsol na nagkasalang arog ko? Piggigirumdom ko daw kun ano an piglilingawan na ni Jehova—sa ibang pagtaram, piggigirumdom ko daw an mga pinatawad niya nang kasalan na nungka niyang gagamiton laban sa sako?’ Dai nagpopokus si Jehova sa mga nagibo ta kaidtong kasalan. Asin dapat na arog man kita kaiyan. (Sal. 130:3) Kun aakuon ta an pagpapatawad ni Jehova, magigibo tang patawadon an satong sadiri sa mga nagibo ta kaidtong sala asin makapagpadagos na sa buhay.

16. Iilustrar an peligro kun padagos kitang makokonsiyensiya sa mga nagibo ta kaidtong kasalan. (Hilingon man an ritrato.)

¹⁶ Pag-isipan an sarong ilustrasyon. An padagos na pagkakonsiyensiya sa mga nagibo ta kaidtong sala garo man sana pagmaneho nin awto tapos sige sana kitang hiling sa rearview mirror. Marahay man na maghiling diyan paminsan-minsan para makalikay sa mga posibleng peligro na nasa likudan mo. Pero tanganing ligtas kang makaabante, dapat na magpokus ka sa dalan sa inutan mo. Kaagid kaiyan, puwedeng magin kapaki-pakinabang kun iisip-isipon ta paminsan-minsan an mga nagibo ta kaidtong sala; makakanuod kita diyan asin mapapakusog an satong determinasyon na dai na iyan pag-utruhon. Pero kun maparapokus kita sa mga nagibo ta kaidtong sala, malilimitaran kan satong pagkakonsiyensiya an mga puwede tang magibo ngunyan sa paglilingkod sa Diyos. Imbes, lugod na padagos kitang magpokus sa dalan sa inutan ta. Yaon kita sa dalan na pasiring sa buhay sa bagong kinaban na ipinanuga nin Diyos, na diyan an maraot na mga pangyayari “dai na masabong pa sa isip.”—Isa. 65:17; Tal. 4:25.

PADAGOS NA KUMBINSIRON AN SAIMONG PUSO

17. Taano ta kaipuhan niyatong padagos na kumbinsiron an satong puso na namumutan asin papatawadon kita ni Jehova?

¹⁷ Kaipuhan niyatong padagos na kumbinsiron an satong puso na namumutan asin papatawadon kita ni Jehova. (1 Juan 3:19, nota sa ibaba) Taano? Huling dai mapundo si Satanas sa pagpurbar na kumbinsiron kitang dai kita angay na mamutan o patawadon. Arin man diyan, saro lang an buot niyang mangyari—papunduhon kita sa paglilingkod ki Jehova. Asahan niyato na lalo pa siyang mahinguwang gibuhon iyan huling aram niyang halipot na sana an panahon niya. (Kap. 12:12) Dai ta pagtugutan na magin mapanggana siya!

18. Ano an puwede mong gibuhon tanganing makumbinsir mo an saimong puso na namumutan asin papatawadon ka ni Jehova?

¹⁸ Tanganing mapakusog an saimong pagtitiwala na namumutan ka ni Jehova, iaplikar an mga suhestiyon na pinag-ulayan sa sinundan na artikulo. Para makumbinsir an saimong puso na pinatawad ka na ni Jehova, isip-isipon kun paano ilinadawan ni Jehova an saiyang sadiri. Hurop-hurupon kun ano an ipinasabong niyang sabihon kan mga kagsurat kan Bibliya manungod sa saiyang pagpapatawad. Dai paglingawan na aram niyang marhay an saimong makasalan na kamugtakan asin papahilingan ka niya nin pagkahirak. Asin girumdumon na pag siya nagpapatawad, ginigibo niya nanggad iyan nin lubos. Dangan arog ni David na lubos na nagtiwala sa pagkahirak ni Jehova, masasabi mo man, “Salamat, Jehova, sa pagpapatawad mo kan ‘sakong mga pagkakasala’!”—Sal. 32:5.