An Pagpapatawad ni Jehova—An Kahulugan Kaiyan Para sa Saimo

1. Taano ta an pagpapatawad nin tawo sa parati komplikadong sabuton?

“PINAPATAWAD TAKA NA.” Nakakagian nanggad sa buot an mga tataramon na iyan lalo na kun aram tang may nasabi o nagibo kita na nakakulog sa iba! Pero ano talaga an buot sabihon kan mga tataramon na “Pinapatawad taka na”? Sinasabi daw kan nakulgan mo na mag-amigo pa man giraray kamo? O an buot daw niyang sabihon habo niya nang pag-ulayan pa an isyu? An pagpapatawad nin tawo puwedeng magin komplikadong sabuton.

2. Paano ilinadawan sa Kasuratan an pagpapatawad ni Jehova? (Hilingon man an nota sa ibaba.)

² An pagpapatawad ni Jehova sa bakong perpektong mga tawo ibang-iba kisa sa pagpapatawad niyato sa lambang saro. An pagpapatawad na itinatao ni Jehova daing kaagid. Manungod ki Jehova, sinabi kan salmista: “Sa saimo igwa nin tunay na kapatawadan, na sa siring tawan ka nin hararom na paggalang.”a (Sal. 130:4) Iyo, an pagpapatawad ni Jehova “tunay na kapatawadan.” Siya an nagtatao kan pinakapamantayan sa kun ano talaga an buot sabihon kan pagpapatawad. Sa nagkapirang pagkakataon, ginamit kan mga kagsurat kan Bibliya an sarong Hebreong tataramon para sa pagpapatawad na dai nuarin man ginamit para iladawan an pagpapatawad nin tawo.

3. Ano an pagkakaiba kan pagpapatawad ni Jehova asin kan pagpapatawad ta? (Isaias 55:6, 7)

³ Pag pinatawad ni Jehova an saro, an kasalan kan tawong iyan biyo nang pinapara. An naraot na relasyon lubos nang nagigin marahay giraray. Si Jehova pag nagpapatawad, talagang lubos asin bulaos.—Basahon an Isaias 55:6, 7.

4. Paano kita tinatabangan ni Jehova na masabutan an tunay na kahulugan kan pagpapatawad?

⁴ Kun an pagpapatawad ni Jehova iba sa pagpapatawad ta, paano niyato masasabutan bilang bakong perpektong mga tawo an tunay na kahulugan kaiyan? Tinatabangan kita ni Jehova paagi sa paggamit nin malinaw na mga ilustrasyon para iladawan an saiyang pagpapatawad. Sa artikulong ini, sisiyasaton ta an nagkapira sa mga iyan. Ipapahiling kaiyan sa sato kun paano hinahali ni Jehova an kasalan asin, kasabay kaiyan, kun paano niya ibinabalik sa dati an relasyon na naraot huli sa kasalan. Mantang pinag-aadalan ta an mga ilustrasyon na ini, lalo kitang magigin mas mapagpasalamat sa satong mamumuton na Ama, na ipinapahiling an saiyang pagpapatawad sa dakulon na paagi.

HINAHALI NI JEHOVA AN KASALAN

5. Ano an nangyayari pag pinapatawad ni Jehova an satong mga kasalan?

⁵ Sa Bibliya, an mga kasalan parating iinaagid sa magabat na mga pasan. Ilinadawan ni Hading David an mga kasalan niya sa arog kaining paagi: “An mga sála ko lampas na sa sakong payo; siring sa magabat na pasan, magabaton na iyan para makaya ko.” (Sal. 38:4) Pero pinapatawad ni Jehova an mga kasalan kan nagsusulsol na mga parakasala. (Sal. 25:18; 32:5) An Hebreong ekspresyon na itrinadusir na “pinatawad” sa panginot nangangahulugan na “alsahon” o “darahon.” Tibaad naiisip ta si Jehova bilang sarong makusog na lalaki na piguratibong inaalsa an magabat na pasan na kasalan na nasa mga abaga niyato dangan dinadara iyan parayo.

6. Gurano kaharayo dinadara ni Jehova an satong mga kasalan?

⁶ May saro pang ilustrasyon na nagpapahiling sato kun gurano kaharayo dinadara ni Jehova an mga kasalan ta. Sinasabi sa sato kan Salmo 103:12: “Kun gurano kaharayo kan sirangan sa sulnupan, arog man niya kaiyan kaharayong ibinubugtak hali sa sato an satong mga paglapas.” An sirangan iyo an pinakaharayo hali sa sulnupan. Dai nuarin man nagtatagbuan an duwang iyan. Sa ibang pagtaram, dinadara ni Jehova an satong mga kasalan sagkod sa pinakaharayong lugar na puwede niyatong maimahinar. Sarong nakakaasigurar nanggad na paglaladawan iyan kan saiyang pagpapatawad!

7. Paano ilinaladawan kan Bibliya kun ano an ginigibo ni Jehova sa satong mga kasalan? (Mikas 7:18, 19)

⁷ Maski ngani piguratibong dinadara ni Jehova harayo sa sato an satong mga kasalan, padagos niya daw iyan na kinakaputan? Dai. Manungod ki Jehova, isinurat ni Hading Hezekias: “Iinapon mo sa likudan mo an gabos kong kasalan.” O arog kan pagkasabi sa nota sa ibaba, “hinali mo sa saimong paghiling an gabos kong kasalan.” (Isa. 38:9, 17; nota sa ibaba) Ipinapahiling kan ilustrasyon na ini na dinadara ni Jehova an kasalan kan mga nagsusulsol asin iinaapon tanganing mahali sa saiyang paghiling. An mga tataramon na ini puwede man itradusir na: “Ginibo mo na garo dai nangyari [an sakong mga kasalan].” Urog pang idinuduon kan Bibliya an puntong ini sa saro pang ilustrasyon na nasa Mikas 7:18, 19. (Basahon.) Sinasabi diyan na iinaapon ni Jehova an satong mga kasalan sa kairaruman kan dagat. Kan suanoy na mga panahon, imposible para sa saro na makua pa giraray an sarong bagay na iinapon sa kairaruman kan dagat.

8. Ano an mga nanudan niyato sagkod sa puntong ini?

⁸ Paagi sa mga ilustrasyon na ini, nanudan niyato na pag si Jehova nagpatawad, lubos niyang hinahali sa sato an nagpapagabat na mga kasalan niyato. Tunay nanggad, arog kan sinabi ni David, “maugma an mga pinatawad sa saindang maraot na mga gibo asin tinahuban an mga kasalan; maugma an tawo na an kasalan dai na nanggad gigirumdumon ni Jehova.” (Roma 4:7, 8) Iyan an tunay na kapatawadan!

PINAPARA NI JEHOVA AN KASALAN

9. Anong mga ilustrasyon an ginamit ni Jehova tanganing ipaliwanag kun paano niya kita lubos na pinapatawad?

⁹ Naggamit si Jehova nin iba pang mga ilustrasyon tanganing tabangan kitang masabutan kun paanong paagi sa atang na pantubos, pinapara niya an mga kasalan kan mga nagsusulsol. Sa piguratibong paagi, sinambit si Jehova na hinuhugasan asin binabalnawan niya an mga kasalan ta. An resulta, nadadalisay an parakasala. (Sal. 51:7; Isa. 4:4; Jer. 33:8) Ilinadawan mismo ni Jehova an resulta kan prosesong ini: “Dawa pa an mga kasalan nindo kakulor nin iskarlata, papapution iyan na garo niyebe; dawa kasingpula an mga iyan nin pulang tela, magigin kasingputi an mga iyan nin telang lana.” (Isa. 1:18) Dipisilon nanggad halion an kulor iskarlata o mapulahon na mga mantsa sa sarong tela. Minsan siring, paagi sa ilustrasyon na ini, inaasigurar sa sato ni Jehova na an satong kasalan puwedeng lubos na mahugasan na dai na iyan mahihiling pa.

10. Ano an saro pang ilustrasyon na ginamit ni Jehova para iilustrar kun gurano kabulaos an saiyang pagpapatawad?

¹⁰ Arog kan sinambit sa sinundan na artikulo, an kasalan iinagid man sa “utang.” (Mat. 6:12, nota sa ibaba; Luc. 11:4) Kaya sa kada nagkakasala kita ki Jehova, garo man sana kita palubog nin palubog sa utang. Dakulaon na marhay an utang ta sa saiya! Pero pag pinatawad kita ni Jehova, garo man sana niya kinakanselar an utang na dapat kutanang singilon sa sato. Dai niya hinahagad na bayadan ta an mga kasalan na pinatawad niya na. Magayunon nanggad na ilustrasyon iyan na naglaladawan sa kaginhawahan na namamatian ta pag pinatawad kita ni Jehova!

11. Ano an buot sabihon pag sinasabi kan Bibliya na an satong mga kasalan ‘pinara’ na? (Gibo 3:19)

¹¹ Dai lang basta kinakanselar ni Jehova an satong mga utang, o mga kasalan; pinapara niya iyan. (Basahon an Gibo 3:19.) Pag an sarong utang kinakanselar, tibaad maimahinar tang linalagan nin dakulaon na X an rekord kan satong utang. Pero, tibaad hiling pa man giraray an mga numero sa rekord maski linagan na iyan nin X. Pero iba pag sinabing pinara na an sarong bagay. Tanganing masabutan an ilustrasyon na ini, kaipuhan tang girumdumon na kan suanoy na panahon an ginagamit na tinta kompuwesto nin pinagharalong karbon, pulot, saka tubig. Puwedeng gumamit an saro nin basang espongha para puraon an mga nakasurat. Kaya pag an utang ‘pinara,’ entero na iyan na mayo. Dai na mahihiling kan mata nin tawo an ano man na senyales na igwang nakasurat diyan dati. An utang garo man sana dai nag-eksister. Nagpapasalamat nanggad kita na dai lang kinakanselar ni Jehova an satong mga kasalan kundi lubos niya man iyan na pinapara!—Sal. 51:9.

12. Ano an buot sabihon para sa sato kan ilustrasyon may koneksiyon sa mahibog na panganuron?

¹² Naggamit si Jehova nin kaagid na ilustrasyon para iladawan kun paano niya pinapara an kasalan. Sinabi niya: “Paparaon ko an saimong mga paglapas na garo linipudan nin panganuron asin an saimong mga kasalan na garo linipudan nin mahibog na panganuron.” (Isa. 44:22) Pag si Jehova nagpapatawad, garo man sana siya naggagamit nin sarong mahibog na panganuron tanganing itago an satong mga paglapas para dai na iyan mahiling pa.

13. Ano an dai ta na dapat mamatian pag pinatawad na ni Jehova an satong mga kasalan?

¹³ Ano an itinutukdo sa sato kan mga ilustrasyon na ini? Pag pinatawad na ni Jehova an satong mga kasalan, dai niyato dapat mamati na dadarahon ta sa satong konsiyensiya habangbuhay an mga nagibo tang kasalan. Paagi kan dugo ni Jesu-Cristo, lubos nang kinanselar an satong mga utang. Dai na mahihiling pa maski an rekord kan mga utang na iyan. Ini an kahulugan para sa sato kan tunay na kapatawadan na hali ki Jehova pag pinagsusulsulan ta an satong mga kasalan.

IBINABALIK NI JEHOVA AN MARAHAY NA RELASYON TA SA SAIYA

14. Taano ta makakapagtiwala kita sa pagpapatawad ni Jehova? (Hilingon man an mga ritrato.)

¹⁴ Huli sa tunay na kapatawadan na hali ki Jehova, puwede kitang magkaigwa nin marahay na relasyon sa saiya. Nakakatabang iyan sa sato na dai na ribukon kan satong konsiyensiya. Dai ta kaipuhan na mahadit na tibaad may tinatago pa man giraray siyang kaanggutan sa sato asin naghahanap nin paagi para padusahan kita. Dai niya lamang iyan gigibuhon. Taano ta makakapagtiwala kita ki Jehova pag sinasabi niyang pinapatawad niya na kita? Kinotar ni propeta Jeremias an sinabi ni Jehova: “Papatawadon ko an saindang pagkakasala, asin dai ko na gigirumdumon an kasalan ninda.” (Jer. 31:34) Kinotar ni apostol Pablo an mga tataramon na iyan kan sabihon niya: “Dai ko na gigirumdumon an mga kasalan ninda.” (Heb. 8:12) Pero ano talaga an buot sabihon kaiyan?

15. Ano an buot sabihon kan dai na ni Jehova ginigirumdom an satong mga kasalan?

¹⁵ Sa Bibliya, an ekspresyon na “girumdumon” dai pirming nanunungod sa pagrumdom sa sarong bagay o pag-isip manungod diyan. Imbes, puwede iyan na magpanungod sa saro na minagibo nin aksiyon. An kriminal na nakapako sa hariging pasakitan kataid ni Jesus nakiulay sa saiya: “Jesus, girumdumon mo ako pag yaon ka na sa saimong Kahadian.” (Luc. 23:42, 43) Dai lang siya basta nakikiulay ki Jesus na isipon siya sa mga panahon na idto. An simbag ni Jesus nagpaparisa na magibo siya nin aksiyon tanganing buhayon liwat an kriminal. Kaya, pag sinasabi ni Jehova na dai niya na gigirumdumon an satong mga kasalan, an buot niyang sabihon dai siya magibo nin aksiyon laban sa sato. Dai niya kita papadusahan pag-abot nin panahon sa mga kasalan na pinatawad niya na.

16. Paano ilinaladawan kan Bibliya an katalingkasan na dara kan tunay na kapatawadan?

¹⁶ May ginagamit an Bibliya na saro pang ilustrasyon para tabangan kitang masabutan an katalingkasan na dara kan tunay na kapatawadan. Huli sa satong minanang kasalan asin makasalan na tendensiya, iinagid kita sa “mga uripon nin kasalan.” Pero salamat sa pagpapatawad ni Jehova, kita arog sa mga uripon na “pinatalingkas . . . sa kasalan.” (Roma 6:17, 18; Kap. 1:5) Iyo, an pagpapatawad ni Jehova nagtatao sa sato nin labi-labing kaugmahan huli sa pagkapatalingkas sa sato sa pagkauripon.

17. Paano kita napapaumayan huli sa pagpapatawad ni Jehova? (Isaias 53:5)

¹⁷ Basahon an Isaias 53:5. Sa huring ilustrasyon na pag-uulayan ta, ikinukumparar kita sa mga tawong igwa nin nakakagadan na hilang. Huli sa atang na pantubos na itinao ni Jehova paagi sa saiyang Aki, napaumayan kita sa piguratibong paagi. (1 Ped. 2:24) Pinapagin posible kan pantubos na lubos na mahirahay an relasyon ta ki Jehova, na naraot huli sa hilang sa espirituwal. Kun paanong an sarong tawong naumayan sa malalang hilang nakakamati nin labi-labing kaugmahan, nakakamati man kita nin kaugmahan pag naumayan kita sa espirituwal asin nakamtan giraray an pag-uyon ni Jehova na resulta kan saiyang pagpapatawad.

AN KAHULUGAN PARA SA SATO KAN PAGPAPATAWAD NI JEHOVA

18. Ano an nanudan ta sa pagsiyasat sa manlain-lain na ilustrasyon na nasa Bibliya manungod sa pagpapatawad ni Jehova? (Hilingon man an kahon na “Kun Paano Kita Pinapatawad ni Jehova.”)

¹⁸ Ano an nanudan ta sa pagsiyasat sa mga ilustrasyon sa Bibliya manungod sa pagpapatawad ni Jehova? Si Jehova pag nagpatawad, lubos asin permanente. Huli kaiyan, puwede kitang magkaigwa nin marahay na relasyon sa satong Ama sa langit. Kasabay kaiyan, isinasaisip niyato na an tunay na kapatawadan sarong regalo. Resulta iyan kan pagkamuot asin daing kapantay na kabuutan ni Jehova, na ipinapahiling niya sa makasalan na katawuhan. Bako iyan sarong deretso na obligado niyang itao pag hinagad kan mga tawo.—Roma 3:24.

19. (a) Ano an dapat na ipagpasalamat niyato? (Roma 4:8) (b) Ano an pag-uulayan ta sa sunod na artikulo?

¹⁹ Basahon an Roma 4:8. Ipinagpapasalamat nanggad kan lambang saro sa sato na si Jehova an Diyos nin “tunay na kapatawadan”! (Sal. 130:4) Alagad, an pagpapatawad niya sa sato nakadepende sa sarong mahalagang bagay. Ipinaliwanag ni Jesus: “Kun dai nindo pinapatawad an mga tawo sa mga kasalan ninda, dai man papatawadon kan saindong Ama an mga kasalan nindo.” (Mat. 6:14, 15) Kaya malinaw, mahalagang marhay na arugon ta an pagpapatawad ni Jehova. Pero paano ta iyan magigibo? Ipapahiling sa sato kan sunod na artikulo kun ano an kalabot diyan.