‘Padagos na Maglakaw sa Katotoohan’

1. Paano kita nakikinabang pag ipinapakipag-ulay ta kun paano ta nasumpungan an “katotoohan”?

“PAANO mo nasumpungan an katotoohan?” Siguradong dakul na beses mo nang sinimbag an hapot na iyan. Iyan an saro sa inot na ihinahapot ta pag gusto tang mas mamidbid pa an sarong tugang. Gusto tang maaraman kun paano namidbid asin namutan kan satong mga tugang si Jehova, asin nauugma kitang sabihon sa sainda kun gurano kahalaga sa sato an katotoohan. (Roma 1:11) An arog kaining pag-urulay nagpapagirumdom sa sato kun gurano nanggad kahalaga kan katotoohan. Nagigin mas determinado man kita na ‘padagos na maglakaw sa katotoohan’—an buot sabihon, padagos na mamuhay sa paagi na maresulta nin bendisyon asin pag-uyon ni Jehova.—3 Juan 4.

2. Ano an pag-uulayan ta sa artikulong ini?

² Sa artikulong ini, pag-uulayan niyato an nagkapirang dahilan kun taano ta namumutan ta an katotoohan. Dangan pag-uulayan niyato kun paano ta padagos na maipapahiling an satong pagkamuot sa mahalagang marhay na regalong ini. Siguradong mapapararom kaini an satong pagpapahalaga na irinani kita ni Jehova sa katotoohan. (Juan 6:44) Mapapakusog man kaini an satong pagmawot na sabihon sa iba an katotoohan.

KUN TAANO TA NAMUMUTAN TA AN “KATOTOOHAN”

3. Ano an pinakamahalagang dahilan kaya namumutan ta an katotoohan?

³ Dakul an dahilan kaya namumutan ta an katotoohan. An pinakamahalaga diyan, namumutan ta an Diyos na Jehova, an Gikanan kan katotoohan. Paagi sa saiyang Tataramon, an Bibliya, namidbid ta siya bako lang bilang an pinakamakapangyarihan na Kaggibo kan langit asin daga kundi pati man bilang an satong mamumuton na Ama sa langit, na nagmamakulog na marhay sa sato. (1 Ped. 5:7) Aram ta na an satuyang Diyos “mahihirakon asin mapagmalasakit, dai tulos naaanggot asin abunda sa maimbod na pagkamuot saka katotoohan.” (Exo. 34:6) Namumuot si Jehova sa hustisya. (Isa. 61:8) Nakukulgan siya pag nahihiling niyang nagsasakit kita, asin andam siya—iyo, gustong-gusto niya—na tapuson an gabos na pagsakit sa itinalaan na panahon. (Jer. 29:11) Nakakaugma nanggad iyan! Kaya namumutan tang marhay si Jehova!

4-5. Taano ta ikinumparar ni apostol Pablo sa sarong angkla an satong paglaom?

⁴ Ano an saro pang dahilan kaya namumutan ta an katotoohan? An katotoohan nagdadara sa sato nin dakulang mga pakinabang. Pag-isipan an sarong halimbawa. Kaiba sa katotoohan sa Bibliya an satong paglaom sa maabot na panahon. Tanganing iilustrar an halaga kan paglaom na iyan, si apostol Pablo nagsurat: “Yaon sa sato an paglaom na ini bilang angkla para sa kalag, sigurado asin marigon.” (Heb. 6:19) Kun paanong an angkla nakakatabang para dai ianod kun sain-sain an bangka, an satong paglaom na basado sa Bibliya makakatabang na magin marigon kita pag nag-aagi kita nin mga pagbalo sa buhay.

⁵ Sa tekstong ini, an sinasabi ni Pablo iyo an langitnon na paglaom na pinapahalagahan na marhay kan linahidan na mga Kristiyano. Pero an saiyang mga tataramon aplikado man sa mga Kristiyano na naglalaom na mabuhay nin daing katapusan sa paraisong daga. (Juan 3:16) Tunay nanggad na nagin makahulugan an satong buhay kan maaraman ta an manungod sa paglaom na buhay na daing katapusan.

6-7. Paano nakinabang si Yvonne kan maaraman niya an katotoohan manungod sa maabot na panahon?

⁶ Pag-isipan an eksperyensiya kan sister na si Yvonne. Dai siya nagdakula sa katotoohan, asin kan aki pa siya natatakot siya sa kagadanan. Nagirumduman niya na may nabasa siya kaidto na dai mawara-wara sa isip niya: “Maabot an aldaw na mayo nang agang naghahalat.” Sinabi niya: “Dahil sa mga tataramon na iyan, may mga bangging dai ako nakakaturog sa pagparaisip sa mangyayari sa maabot na panahon. Sa buot-buot ko, ‘Imposibleng arog sana kaini an buhay. Ano ta yaon ako digdi?’ Habo kong magadan!”

⁷ Kan tin-edyer na si Yvonne, nakaulay siya nin mga Saksi ni Jehova. Sinabi niya: “Nagpuon na ako na magtubod na puwede akong magkaigwa nin paglaom na mabuhay nin daing katapusan sa Paraiso digdi sa daga.” Paano nakinabang an satong sister sa pakaaram sa katotoohan? Sinabi niya pa: “Mayo nang banggi na dai ako nakakaturog dahil sa pagparaisip manungod sa mangyayari sa maabot na panahon o sa kagadanan.” Kaya talagang mahalagang marhay ki Yvonne an katotoohan, asin nauugma nanggad siya na sabihon sa iba an saiyang paglaom para sa maabot na panahon.—1 Tim. 4:16.

8-9. (a) Sa saro sa mga parabula ni Jesus, gurano an pagpapahalaga kan tawo sa kayamanan na nakua niya? (b) Gurano kahalaga sa saimo an katotoohan?

⁸ Kaiba man sa katotoohan sa Bibliya an maugmang bareta manungod sa Kahadian nin Diyos. An katotoohan manungod sa Kahadian na iyan ikinumparar ni Jesus sa sarong nakatagong kayamanan. Sa Mateo 13:44, sinabi ni Jesus: “An Kahadian kan kalangitan nakakaagid sa sarong kayamanan na nakatago sa daga, na nakua nin sarong tawo saka itinago niya giraray; asin huli sa saiyang kaugmahan, naghali siya saka ipinabakal an gabos na pagsadiri niya asin binakal an dagang idto.” Risahon na dai man hinahanap kan lalaki an kayamanan. Pero kan makua niya iyan, dakulang mga pagsasakripisyo an ginibo niya para mapasaiya iyan. Sa katunayan, ipinabakal niya an gabos na pagsadiri niya. Taano? Aram niya na mahalagang marhay an kayamanan na idto. Urog nanggad na mahalagang marhay iyan kisa sa ano man na bagay na isasakripisyo niya.

⁹ Arog man daw kaiyan an pagmansay mo sa katotoohan? Siguradong iyo! Aram ta na ano man na inaalok kan kinaban na ini dai lamang maikukumparar sa kaugmahan niyato ngunyan sa paglilingkod ki Jehova, na may paglaom na mabuhay nin daing katapusan sa maabot na panahon sa irarom kan pamamahala kan Kahadian. An pribilehiyo na magkaigwa nin dayupot na relasyon ki Jehova mas mahalaga nanggad kisa sa ano man na sakripisyo na gigibuhon ta. Mayo nang malabi pa sa kaugmahan niyato na “lubos siyang mapaugma.”—Col. 1:10.

10-11. Ano an nakapahiro ki Michael para baguhon an saiyang paagi nin pamumuhay?

¹⁰ Dakul sa sato an naggibo nin dakulang mga pagsasakripisyo para kamtan an pag-uyon ni Jehova. An iba binayaan an saindang magayunon na karera sa kinaban. An iba man nagpundo na sa saindang mga pagmamaigot na magkamit nin dakul na kayamanan. May iba man na biyong binago an saindang paagi nin pamumuhay kan manudan ninda an manungod ki Jehova. Iyan an ginibo ni Michael. Dai siya nagdakula sa katotoohan. Kan hoben pa siya, nag-adal siya nin karate. Sinabi niya: “Pinapagdanay kong pusog an hawak ko, asin ipinag-oorgulyo ko iyan. Kun beses, an pagmati ko mayong makakadaog sa sako.” Pero kan magpuon na mag-adal sa Bibliya si Michael, nanudan niya an pagmansay ni Jehova sa kadahasan. (Sal. 11:5) Manungod sa mag-agom na Saksi na nagtukdo sa saiya, sinabi ni Michael: “Dai ninda ako nuarin man sinabihan na bayaan an karate; basta padagos sana ninda akong tinukduan kan katotoohan sa Bibliya.”

¹¹ Mantang mas nakakanuod si Michael manungod ki Jehova, mas nagtatalubo man an pagkamuot niya sa Saiya. Napahiro siyang marhay kan pagmalasakit ni Jehova sa Saiyang mga parasamba. Pag-abot nin panahon, narealisar ni Michael na kaipuhan niyang gumibo nin desisyon na makakapabago kan saiyang buhay. “Aram ko na an pagbaya sa karate iyo an pinakamasakit na gigibuhon ko,” an sabi niya. “Pero aram ko man na mauugma kaiyan si Jehova, asin kumbinsido ako na sulit an ano man na pagsasakripisyo tanganing mapaglingkudan siya.” Pinahalagahan ni Michael an halaga kan katotoohan na nasumpungan niya, asin an pagpapahalagang iyan nagpahiro sa saiya na gumibo nin dakulang mga pagbabago sa saiyang buhay.—Sant. 1:25.

12-13. Paano an katotoohan sa Bibliya nagtao nin kaliwanagan ki Mayli?

¹² Tanganing ipahiling an halaga kan katotoohan, ikinumparar kan Bibliya an katotoohan sa lampara na nagliliwanag sa diklom. (Sal. 119:105; Efe. 5:8) Si Mayli na taga Azerbaijan, pinahalagahan na marhay an kaliwanagan na itinao sa saiya kan Tataramon nin Diyos. Magkaiba an relihiyon kan saiyang mga magurang. An saiyang ama Muslim, asin an saiyang ina Judio. Sinabi niya: “Dawa ngani dai ako nuarin man nagduda na may Diyos, dakul akong hapot. Inisip ko, ‘Taano ta linalang nin Diyos an tawo, saka taano ta kaipuhan magsakit an saro nin bilog niyang buhay tapos papadusahan man sana siya sa impiyerno?’ Sinasabi kan mga tawo na an gabos na nangyayari kabutan nin Diyos, kaya naisip ko, ‘Kinokontrol daw nin Diyos an mga tawo na garo mga puppet tapos nauugma Siya na mahiling sinda na nagsasakit?’”

¹³ Padagos na hinanap ni Mayli an simbag sa saiyang mga hapot. Pag-abot nin panahon, nag-ako siya nin pag-adal sa Bibliya asin nagin saro sa mga Saksi ni Jehova. “An nakakakumbinsir na paliwanag kan Bibliya nakapabago kan bilog kong pananaw sa buhay,” an sabi niya. “An masasarigan na mga paliwanag na yaon sa Tataramon nin Diyos nagtao sako nin panglaog na katuninungan.” Arog ni Mayli, gabos kita inuumaw si Jehova, an “Saro na nag-apod sa [sato] hali sa kadikluman pasiring sa saiyang makangangalas na liwanag.”—1 Ped. 2:9.

14. Paano ta mapapararom an satong pagkamuot sa katotoohan? (Hilingon man an kahon na “Iba Pang mga Pagkukumparar.”)

¹⁴ Pira sanang halimbawa iyan na nag-iilustrar kan halaga kan katotoohan. Siguradong dakul ka pang ibang maiisip. Taano ta dai gibuhon na proyekto sa saimong personal na pag-adal an paghanap nin iba pang mga dahilan kun taano ta dapat tang kamutan an katotoohan? Mantang mas namumutan ta an katotoohan, mas mahanap man kita nin mga paagi para ipahiling an satong pagkamuot diyan.

KUN PAANO NIYATO IPINAPAHILING NA NAMUMUTAN TA AN KATOTOOHAN

15. Ano an sarong paagi na maipapahiling niyato an satong pagkamuot sa katotoohan?

¹⁵ Maipapahiling niyato na namumutan ta an katotoohan paagi sa regular na pag-adal kan Bibliya asin mga publikasyon na basado sa Bibliya. Kun sabagay, gurano man kita kahaloy na sa katotoohan, pirming dakul pa kitang manunudan. An kainot-inuting isyu kan magasin na ini, nagsabi: “An katotoohan, arog nin sarong sadit na burak na dai gayong risa sa kadlagan nin buhay, napapalibutan asin haros mapuot na kan marambong na mga duot nin salang mga impormasyon. Tanganing mahiling mo iyan, dapat kang padagos na maghanap. . . . Para mapasaimo iyan, dapat na dumuko ka asin kuanon iyan. Dai ka makontento sa saro sanang burak nin katotoohan. . . . Padagos na kumua, maghanap nin dakul pa.” Kaipuhan an paghihinguwa sa pag-adal, pero sulit an mga paghihinguwang iyan.

16. Anong pamamaagi sa pag-adal an epektibo sa saimo? (Talinhaga 2:4-6)

¹⁶ Bako gabos sato hilig an pagbasa asin pag-adal. Pero dinadagka kita ni Jehova na ‘padagos na maghanap’ asin ‘padagos na magkalot’ para magkaigwa kita nin mas hararom na pakasabot sa katotoohan. (Basahon an Talinhaga 2:4-6.) Pag ginigibo ta an paghihinguwang iyan, pirmi kitang nakikinabang. Sinabi ni Corey na sa saiyang personal na pagbasa kan Bibliya, saro-saro niyang pigpopokusan an mga bersikulo. Ipinaliwanag niya: “Binabasa ko an kada nota sa ibaba, hinihiling ko an kada cross-reference, asin nagre-research ako. . . . Nakinabang nanggad ako sa sakuyang pagbasa huli sa pamamaaging ini!” Ginagamit ta man an pamamaaging iyan o an iba pa, ipinapahiling niyato na pinapahalagahan ta an katotoohan pag nagtatao kita nin panahon asin pinagmamaigutan ta na pag-adalan iyan.—Sal. 1:1-3.

17. Ano an buot sabihon kan isabuhay an katotoohan? (Santiago 1:25)

¹⁷ Siyempre, aram ta na bakong igo na pag-adalan sana an katotoohan. Para lubos na makinabang, dapat na isabuhay ta an katotoohan, an buot sabihon, iaplikar sa satong buhay an nanunudan ta. Kun gigibuhon niyato iyan, mamamatian ta an tunay na kaugmahan huli sa katotoohan. (Basahon an Santiago 1:25.) Paano niyato masisigurado na isinasabuhay ta an katotoohan? An suhestiyon nin sarong brother iyo na siyasaton ta an satong sadiri para maaraman kun sa anong mga aspekto kan satong buhay nag-uswag na kita asin kun sa anong mga aspekto dapat pa kitang mag-uswag. Mapadapit diyan, arog kaini an sinabi ni apostol Pablo: “Ano man an pag-uswag na nagibo na niyato, ipagpadagos ta an paglakaw nin husay sa dalan na iyan.”—Fil. 3:16.

18. Taano ta ginigibo ta an pinakamakakaya ta para ‘padagos na maglakaw sa katotoohan’?

¹⁸ Isip-isipa na sana an mga pakinabang pag ginigibo niyato an pinakamakakaya ta na ‘padagos na maglakaw sa katotoohan’! Dai sana nagigin mas marahay an satong buhay kundi napapaugma ta man si Jehova asin an satong mga kapagtubod. (Tal. 27:11; 3 Juan 4) Iyo, igwa nanggad kita nin marahayon na mga dahilan para kamutan an katotoohan asin isabuhay an katotoohan!