Tama Asin Sala: Sarong Desisyon na Dapat Mong Gibuhon
Nakadependeng marhay sa mga pamantayan sa moral na pinipili tang isabuhay kun magigin maugma kita o dai. Aram iyan kan Diyos na Jehova. Kaya, gusto niya na mamuhay kita kauyon kan saiyang mga pamantayan.
Gusto ni Jehova na magkaigwa kita nin matuninong asin maugmang buhay.
“Ako, si Jehova, an saimong Diyos, an Saro na nagtutukdo sa saimo tanganing makinabang ka, an Saro na naggigiya sa saimo sa dalan na dapat mong lakawan. Kun tatawan mo lang kuta nin atensiyon an sakuyang mga tugon! Dangan an saimong katuninungan magigin siring sa salog asin an saimong katanusan magigin siring sa mga alon kan dagat.”—Isaias 48:17, 18.
Bilang satong Kaglalang, aram nin Diyos an pinakamarahay na paagi nin pamumuhay para sa sato. Gusto niya na sunudon ta an saiyang paggiya huling para iyan sa ikakarahay ta. Pag sinusunod ta an pagbuot nin Diyos, dai kita magdududa kun baga magigin marahay an mga resulta kan satong mga desisyon. Pirmi kitang makakagibo nin tamang desisyon, na matao sa sato nin katuninungan asin kaugmahan.
Dai hinahagad sa sato ni Jehova na gibuhon an imposible.
“An tugon na ini na ipinagbubuot ko sa saimo ngunyan bako man dipisilon para sa saimo, asin bako man ining harayuon sa saimo.”—Deuteronomio 30:11.
Para makapamuhay kita kauyon kan mga pamantayan nin Diyos sa moral tibaad kaipuhan tang baguhon an satong kaisipan asin paggawi. Pero, dai hinahagad ni Jehova sa sato na gibuhon an sobra sa kaya tang gibuhon. Tutal, bilang satong Kaglalang, aram niya kun ano an kaya ta lang na gibuhon. Asin mantang namimidbid ta si Jehova, mahihiling ta na “an saiyang mga tugon bakong pagabat.”—1 Juan 5:3.
Nangangako si Jehova na tatabangan niya an mga tawo na pinipiling mamuhay kauyon kan saiyang mga pamantayan.
“Ako, si Jehova na saimong Diyos, an nagkakapot sa tuo mong kamot, an Saro na nagsasabi sa saimo, ‘Dai ka matakot. Tatabangan taka.’”—Isaias 41:13.
Makakaya tang makapamuhay kauyon kan mga pamantayan nin Diyos sa moral huling tatabangan niya kita. Paagi sa saiyang Tataramon, an Bibliya, papakusugon niya kita asin tatawan nin paglaom.
Napatunayan na kan minilyon na tawo sa bilog na kinaban na an pamumuhay kauyon kan mga pamantayan sa Bibliya nakatabang sa sainda na magkaigwa nin mas maugmang buhay. Gusto mong maaraman pa an marahay na mga sadol na itinatao kan Bibliya? Matatabangan ka kan brosyur na basado sa Bibliya na may titulong Mabuhay nin Maugma Sagkod Pa Man! Libre iyan asin makukua sa jw.org. Igwa iyan nin mga leksiyon na:
Paano Makakatabang Saimo an Bibliya?
An Bibliya Nagtatao nin Paglaom
Makakapagtiwala Ka Daw sa Sinasabi kan Bibliya?
Mantang pinag-aadalan mo an Tataramon nin Diyos, an Bibliya, maaaraman mo na dawa lumang libro iyan, “pirming masasarigan an mga iyan, ngunyan asin sagkod pa man.” (Salmo 111:8) An pagsunod sa mga pamantayan sa moral na yaon sa Bibliya iyo an pinakamarahay na paagi nin pamumuhay para sa sato. Alagad, dai kita pinipirit nin Diyos na gibuhon iyan. (Deuteronomio 30:19, 20; Josue 24:15) Sarong desisyon iyan na dapat gibuhon kan kada saro sa sato.