Sunudon an mga Pamantayan ni Jehova sa Moral

Nagtao an Diyos na Jehova nin pamantayan sa moral para sa mga tawo. Halimbawa, ipinagbuot niya na an pag-aguman permanenteng pag-ibanan nin sarong lalaki asin sarong babayi. (Mat 19:4-6, 9) Kinokondenar niya an gabos na klase nin seksuwal na imoralidad. (1Co 6:9, 10) Nagtao pa ngani siya nin mga prinsipyo dapit sa pagbado asin pagpakarhay sa sadiri na nagpapahiling na napapalain sa iba an saiyang mga lingkod.​—De 22:5; 1Ti 2:9, 10.

Sa kinaban ngunyan, dakul an habong magsunod sa mga pamantayan ni Jehova. (Ro 1:18-32) Nagsusunod sinda sa kadaklan kun dapit sa pagbado asin pagpakarhay sa sadiri saka paggawi. Dai ninda ikinakasupog an maraot nindang paggawi asin tinatatsaran pa ngani an mga namumuhay kauyon kan pamantayan nin Diyos sa moral.​—1Pe 4:3, 4.

Bilang mga Saksi ni Jehova, dapat na kusog-buot niyatong sunudon an mga pamantayan nin Diyos sa moral. (Ro 12:9) Paano? Dapat na magin mataktika kita pag sinasabi ta sa iba an pamumuhay na inaako nin Diyos. Kaipuhan ta man na padagos na mamuhay uyon sa halangkaw na mga pamantayan na iyan. Halimbawa, pag nagpipili nin istilo nin pagbado saka pagpakarhay sa sadiri, haputon an sadiri: ‘Ini daw nagpapahiling kan pamantayan ni Jehova o kan kinaban? An pagbado ko daw nagpapabisto sako bilang sarong Kristiyano na may takot sa Diyos?’ Pag nagpipili nin mga programa o pelikula, haputon an sadiri: ‘Aprubado daw ini ni Jehova? Kiisay na pamantayan sa moral an sinusuportaran kaini? An pinipili ko daw na libangan nagigin dahilan na masakitan akong sunudon an mga pamantayan ni Jehova? (Sal 101:3) Makakapasingkog daw iyan sa mga kapamilya ko saka sa iba?’​—1Co 10:31-33.

Taano ta importanteng marhay na sunudon ta an mga pamantayan ni Jehova sa moral? Dai mahahaloy tatapuson na ni Cristo Jesus an mga nasyon asin an gabos na maraot. (Eze 9:4-7) An mga naggigibo sana kan kabutan nin Diyos an maliligtas. (1Ju 2:15-17) Kaya, padagos tang suportaran an mga pamantayan ni Jehova sa moral tanganing an mga nakakahiling kan satong marahay na paggawi magpamuraway sa Diyos.​—1Pe 2:11, 12.

HILINGON AN VIDEO NA MAGIN KATUOD NI JEHOVA—SARONG LALAKI, SARONG BABAYI, DANGAN SIMBAGON AN MINASUNOD NA MGA HAPOT:

• Taano ta sarong kadunungan na mamuhay sigun sa mga pamantayan ni Jehova?

• Taano ta dapat nang tukduan kan mga magurang an saindang mga aki mantang sadit pa dapit sa mga pamantayan ni Jehova sa moral?

• Paano an mga hoben asin may edad na makakatabang sa mga tawo na makinabang sa karahayan nin Diyos?