An Espesyal na Imbitasyon ni Jehova na Magin Saiyang mga Bisita

1-2. Ano an imbitasyon ni Jehova sa saiyang maimbod na mga parasamba?

ANO an papel ni Jehova sa saimong buhay? Tibaad an isimbag mo, ‘Si Jehova an sakong Ama, sakong Diyos, asin sakong Amigo.’ Tibaad may naiisip kang iba pang mga titulo o apod ki Jehova. Pero, ibinibilang mo man daw siya bilang saimong Kag-imbitar?

² Ikinumparar ni Hading David an pagigin mag-amigo ni Jehova asin kan Saiyang maimbod na mga parasamba sa relasyon na igwa an sarong kag-imbitar asin an mga bisita kaini. Naghapot siya: “O Jehova, siisay an puwedeng magin bisita sa tolda mo? Siisay an puwedeng mag-istar sa banal na bukid mo?” (Sal. 15:1) Sa ipinasabong na mga tataramon na ini, nanudan niyato na puwede kitang magin mga bisita ni Jehova—na magin mga amigo niya. Bako daw na sarong espesyal na imbitasyon ini hali ki Jehova?

GUSTO NI JEHOVA NA MAGIN MGA BISITA NIYA KITA

3. Siisay an inot na bisita ni Jehova, asin ano an namatian ni Jehova asin kan saiyang bisita sa lambang saro?

³ Bago ni Jehova lalangon an gabos na bagay, nagsosolo siya. Dangan pag-abot nin panahon, nagin bisita niya sa saiyang piguratibong tolda an saiyang panganay na Aki. Maugmahon si Jehova sa bago niyang papel bilang Kag-imbitar. Sinasabi kan Bibliya na “urog nang nawiwilihan” ni Jehova an saiyang Aki. Huli kaiyan, an saiyang inot na bisita, ‘naggaya-gaya sa atubangan ni Jehova sa gabos na panahon.’—Tal. 8:30.

4. Paano ni Jehova padikit-dikit na pinahiwas an saiyang imbitasyon sa saiyang tolda?

⁴ Dangan linalang ni Jehova an iba pang espiritung mga linalang, asin inimbitaran sinda na magin saiyang mga bisita man. An saiyang mga anghel inaapod na mga “aki nin Diyos” asin maugma sinda na makaibanan si Jehova. (Job 38:7; Dan. 7:10) Sa laog nin dakul na panahon, an mga bisita ni Jehova iyo sana idtong mga kaibanan niya sa langit. Dangan, pinahiwas niya an saiyang imbitasyon sa mga tawo sa daga. Pag-abot nin panahon, kabilang sa mga nagin bisita niya si Enoc, Noe, Abraham, asin Job. An tunay na mga parasambang iyan ilinadawan bilang mga amigo nin Diyos, o mga naglakaw “kaibanan kan tunay na Diyos.”​—Gen. 5:24; 6:9; Job 29:4; Isa. 41:8.

5. Ano an manunudan ta sa propesiya sa Ezekiel 37:​26, 27?

⁵ Sa laog nin mga siglo, padagos na iniimbitaran ni Jehova an saiyang mga amigo na magin saiyang mga bisita. (Basahon an Ezekiel 37:​26, 27.) Halimbawa, sinasabi sa propesiya ni Ezekiel na talagang gusto nin Diyos na magin dayupot saiya an saiyang maimbod na mga parasamba. Nanunuga siya na “makikipagtipan [siya] sa sainda nin tipan nin katuninungan.” An propesiyang iyan nanunungod sa panahon pag an mga may paglaom na mabuhay sa langit saka an mga may paglaom na mabuhay digdi sa daga magigin iribanan sa irarom kan saiyang piguratibong tolda bilang “sarong aripumpon.” (Juan 10:16) Nauutob na iyan sa ngunyan!

INAATAMAN KITA NIN DIYOS SAIN MAN KITA

6. Paano an saro nagigin bisita sa tolda ni Jehova, asin sain mahihiling an Saiyang tolda?

⁶ Kan mga panahon kan Bibliya, an tolda sarong lugar na pahingaluan asin nagseserbing proteksiyon sa bakong marahay na panahon. Puwedeng asahan kan sarong bisita sa toldang iyan na maaasikaso siyang marhay. Kan idusay ta an satong buhay ki Jehova, nagin mga bisita kita sa saiyang piguratibong tolda. (Sal. 61:4) Igwa diyan nin abundang espirituwal na kakanon asin nakakaibanan ta diyan an iba pang mga bisita ni Jehova. An saiyang piguratibong tolda bako lang nasa sarong partikular na lugar. Tibaad nakaduman ka na sa ibang nasyon, posibleng para mag-atender nin sarong espesyal na kumbensiyon asin nakaibanan mo duman an iba pang maugmang mga bisita sa tolda nin Diyos. Mahihiling iyan sain man yaon an saiyang masinunod na mga parasamba.​—Kap. 21:3.

7. Taano ta masasabi niyato na bisita pa man giraray sa tolda ni Jehova an mga maimbod na nagadan na? (Hilingon man an ritrato.)

⁷ Kumusta man an mga nagadan na maimbod? Masasabi ta daw na bisita pa man giraray sinda sa tolda ni Jehova? Iyo! Taano ta nasabi ta iyan? Huling buhay sinda sa memorya ni Jehova. Ipinaliwanag ni Jesus: “Ining pagbangon sa mga gadan, maski si Moises may sinabi diyan sa salaysay niya manungod sa matunok na palungpong, kan apudon niya si Jehova na ‘Diyos ni Abraham asin Diyos ni Isaac saka Diyos ni Jacob.’ Siya Diyos, bako kan mga gadan, kundi kan mga buhay, huli ta para sa saiya gabos sinda buhay.”​—Luc. 20:​37, 38.

MGA PAKINABANG ASIN MGA RESPONSABILIDAD TA

8. Paano nakikinabang an mga bisita ni Jehova sa laog kan saiyang tolda?

⁸ Kun paanong an literal na tolda puwedeng magin lugar na pahingaluan asin nagseserbing proteksiyon sa maraot na mga kamugtakan nin panahon, an tolda ni Jehova nagtatao sa saiyang mga bisita nin proteksiyon laban sa espirituwal na peligro asin nagtatao nin paglaom. Kun magdadanay kitang harani ki Jehova, mayo si Satanas nin magigibo na permanenteng makakadanyar sa sato. (Sal. 31:23; 1 Juan 3:8) Sa bagong kinaban, padagos na poprotektaran ni Jehova an saiyang maimbod na mga amigo bako lang sa espirituwal na peligro kundi pati man sa kagadanan.​—Kap. 21:4.

9. Ano an inaasahan ni Jehova sa saiyang mga bisita?

⁹ Dakulang onra nanggad na magin sarong bisita sa tolda ni Jehova—na padagos na magkaigwa nin haraning relasyon sa saiya. Ano an dapat tang gibuhon kun gusto tang padagos niyang magin bisita? Kun may saro na mag-imbitar sa saimo sa saiyang harong, aaramon mo kun ano an inaasahan niya sa sarong bisita. Halimbawa, tibaad inaasahan niya na hahalion mo an saimong sapatos bago maglaog sa saiyang harong, asin gikan sa buot mong gigibuhon iyan. Sa kaparehong paagi, siguradong aaramon ta kun ano an inaasahan ni Jehova sa mga gustong padagos na magin bisita niya sa saiyang tolda. An satong pagkamuot ki Jehova magpapahiro sa sato na gibuhon an bilog tang makakaya “tanganing lubos siyang mapaugma.” (Col. 1:10) Asin dawa ngani ibinibilang ta si Jehova na satong Amigo, aram niyato na siya man an satong Diyos asin Ama, na maninigo sa satong paggalang. (Sal. 25:14) Nungka ta iyan na paglingawan asin dapat na pirmi kitang magkaigwa nin hararom na paggalang sa saiya. Makakatabang iyan sa sato na likayan na gumibo nin mga bagay na makakapaanggot sa saiya. Siguradong gusto tang “maglakaw na may kababaan nin buot” kaiba kan satong Diyos.​—Mik. 6:8.

AN DAI PAGPAPALAIN-LAIN NI JEHOVA SA KAAWAGAN

10-11. Paano ipinahiling ni Jehova na mayo siyang pinapalain sa paagi niya nin pagtratar sa mga Israelita sa kaawagan nin Sinai?

¹⁰ Si Jehova dai nagpapalain-lain sa pagtratar niya sa saiyang mga bisita. (Roma 2:11) Makakanuod kita sa dai pagpapalain-lain ni Jehova sa paagi niya nin pagtratar sa mga Israelita sa kaawagan nin Sinai.

¹¹ Pagkatapos niyang patalingkason an saiyang banwaan sa pagkauripon sa Ehipto, nagnombra si Jehova nin mga saserdote para maglingkod sa tabernakulo. Inasignaran an mga Levita na magtabang sa iba pang gibuhon may koneksiyon sa banal na toldang iyan. Nangangahulugan daw iyan na an mga naglingkod sa tabernakulo o an mga nagkampo harani diyan mas napapangatamanan ni Jehova kisa sa iba? Dai! Si Jehova mayong pinapalain.

12. Bilang Kag-imbitar, paano ni Jehova ipinahiling sa saiyang bagong mabilog na nasyon na dai siya nagpapalain-lain? (Exodo 40:38) (Hilingon man an ritrato.)

¹² An gabos na nasa kampo igwa nin pantay-pantay na oportunidad na magin amigo ni Jehova. Sinda man igwa nin espesyal na katungdan o mayo, o gurano man kaharani sa tabernakulo an saindang tolda. Halimbawa, sinigurado ni Jehova na mahihiling kan bilog na nasyon an milagrosong hariging panganuron asin hariging kalayo na nakatindog sa ibabaw kan tabernakulo. (Basahon an Exodo 40:38.) Pag an panganuron nagpuon nang maghiro pasiring sa bagong direksiyon, mahihiling iyan dawa kaidtong mga nagkakampo sa pinakaharayong distansiya hali sa tabernakulo, dangan maimpake sinda kan saindang mga gamit, tatarangkason an saindang mga tolda, asin mahali na kaiba kan bilog na nasyon. (Bil. 9:​15-23) Madadangog kan gabos an makusog asin naiibang tanog kan duwang platang trumpeta na nagtatao nin senyal sa gabos na kaipuhan na nindang umabante. (Bil. 10:2) Kaya dai buot sabihon na idtong mga nakapuwesto an tolda harani sa tabernakulo mas dayupot ki Jehova kisa sa mga nakapuwesto sa harayo. Imbes, an siisay man na kabilang sa bagong mabilog na nasyon ni Jehova puwedeng magin Saiyang bisita asin makakaasa sa Saiyang paggiya asin proteksiyon. Siring man sa ngunyan, sain man kita nakaistar sa kinaban, puwede kitang makinabang sa mamumuton na pag-ataman asin proteksiyon ni Jehova.

MGA HALIMBAWA NIN DAI PAGPAPALAIN-LAIN NI JEHOVA SA NGUNYAN

13. Ano an sarong paagi na ipinapahiling ni Jehova na dai siya nagpapalain-lain sa ngunyan?

¹³ May mga lingkod an Diyos ngunyan na nakaistar harani sa world headquarters o sa sarong sangang opisina kan Mga Saksi ni Jehova. An iba naglilingkod mismo sa mga pasilidad na ini. Kaya nakakapagpartisipar sinda sa dakul na aktibidad na ginigibo diyan asin personal na nakakaibanan an mga nanginginot. An iba naglilingkod bilang nagbibiyaheng mga paraataman o sa iba pang mga klase nin espesyal na bilog na panahon na paglilingkod. Kun arog kan kadaklan, dai mo man naeeksperyensiyahan sa ngunyan an arog kaiyan na mga pribilehiyo, makakasigurado ka na an satong Kag-imbitar, si Jehova, namumutan an gabos niyang bisita. Midbid niya an kada saro sa sato asin itinatao niya an satong mga pangangaipo. (1 Ped. 5:7) An gabos na lingkod nin Diyos nag-aako nin espirituwal na pagkakan, paggiya, asin proteksiyon na kaipuhan ninda.

14. Ano an saro pang halimbawa kan dai pagpapalain-lain ni Jehova bilang satong Kag-imbitar?

¹⁴ An saro pang halimbawa kan dai pagpapalain-lain ni Jehova bilang satong Kag-imbitar iyo na pinapangyari niyang mabasa sa ngunyan an Bibliya kan mga tawo sa bilog na kinaban. An Banal na Kasuratan inot na isinurat sa tulong lengguwahe: Hebreo, Aramaiko, asin Griego. Nangangahulugan daw iyan na idtong tataong magbasa kan Bibliya sa orihinal na mga lengguwahe mas dayupot ki Jehova kisa sa mga dai tatao kaiyan? Dai.​—Mat. 11:25.

15. Ano an nagpapatunay na dai nagpapalain-lain si Jehova? (Hilingon man an ritrato.)

¹⁵ An pag-uyon sa sato ni Jehova dai nakadepende sa satong sekular na inadalan o sa satong abilidad sa mga lengguwahe. Puwedeng magkaigwa kan kadunungan na hali saiya bako lang an mga may halangkaw na inadalan kundi an gabos na tawo sa bilog na kinaban, halangkaw man an inadalan o bako. An saiyang ipinasabong na Tataramon, an Bibliya, itrinadusir sa rinibong lengguwahe kaya an mga tawo sa bilog na kinaban puwedeng makinabang sa mga itinutukdo kaiyan asin makanuod kun paano sinda magigin saiyang mga amigo.​—2 Tim. 3:​16, 17.

MAGDANAY NA BISITA NI JEHOVA

16. Uyon sa Gibo 10:​34, 35, paano kita magdadanay na inaako ni Jehova?

¹⁶ Sarong dakulang pribilehiyo na magin mga bisita ni Jehova sa saiyang piguratibong tolda. Siya an pinakamabuot, pinakamamumuton, asin pinakamapag-istimar na Kag-imbitar. Saka, dai siya nagpapalain-lain—iniimbitaran niya kita gabos sain man kita nakaistar, ano man an satong pinaghalian, inadalan, rasa, tribo, edad, lalaki man kita o babayi. Alagad, idto sanang nakakaabot sa mga pamantayan niya an inaako niya bilang saiyang mga bisita.​—Basahon an Gibo 10:​34, 35.

17. Sain kita makakakua nin dagdag na impormasyon manungod sa pagigin bisita ni Jehova sa saiyang tolda?

¹⁷ Arog kan mababasa sa Salmo 15:​1, naghapot si David: “O Jehova, siisay an puwedeng magin bisita sa tolda mo? Siisay an puwedeng mag-istar sa banal na bukid mo?” Pinasabngan an salmista na simbagon an mga hapot na idto. Tutukaron sa sunod na artikulo an nagkapirang espesipikong kahagadan na kaipuhan tang maabot tanganing magdanay na bisita ni Jehova.