Gusto ni Jehova na an Gabos Magsulsol

1. Ano an kalabot sa pagsulsol?

PAG kita nakagibo nin sala, mahalagang marhay na magsulsol kita. Sa Bibliya, an tawong nagsusulsol binabago an saiyang kaisipan manungod sa sarong partikular na paggawi, ipinupundo an paggawing iyan, asin determinado na dai iyan pag-utruhon.​—Hilingon an Glosaryo nin mga Termino sa Bibliya, “Pagsulsol.”

2. Taano ta kaipuhan niyato gabos na manudan an manungod sa pagsulsol? (Nehemias 8:​9-11)

² An lambang tawong nabubuhay kaipuhan na manudan an manungod sa pagsulsol. Taano? Huling gabos kita nagkakasala aroaldaw. Bilang mga gikan ni Adan asin Eva, an lambang saro sa sato nagmana nin kasalan asin kagadanan. (Roma 3:23; 5:12) Mayo nin siisay man sa sato an libredo diyan. Dawa an mga lingkod na may pambihirang pagtubod, arog ni apostol Pablo, nasakitan sa pakikipaglaban sa kasalan. (Roma 7:​21-24) An buot sabihon daw kaini dapat na pirmi na sana kitang mamunduon o pinangluluyahan nin buot dahil sa satong mga kasalan? Dai, huling mahihirakon si Jehova, asin gusto niyang magin maugma kita. Pag-isipan an eksperyensiya kan mga Judio kan panahon ni Nehemias. (Basahon an Nehemias 8:​9-11.) Habo ni Jehova na magmundo sinda nin sobra-sobra huli sa mga nagibo ninda kaidtong kasalan, imbes gusto niyang magin maugma sinda sa pagsamba sa saiya. Aram ni Jehova na an pagsulsol minaresulta sa kaugmahan. Kaya tinutukduan niya kita manungod diyan. Kun pagsusulsulan ta an satong mga kasalan, makakapagtiwala kita na papatawadon kita kan satong mahihirakon na Ama.

3. Ano an pag-uulayan ta sa artikulong ini?

³ Urog pa niyatong aramon an manungod sa pagsulsol. Sa artikulong ini, pag-uulayan ta an tulong aspekto. Inot, maaaraman ta kun ano an itinukdo ni Jehova sa Israel manungod sa pagsulsol. Dangan, mapokus kita sa kun paano tinabangan ni Jehova na magsulsol an mga nagkasala. Panghuri, tutukaron ta kun ano an nanudan kan mga parasunod ni Jesus manungod sa pagsulsol.

KUN ANO AN ITINUKDO NI JEHOVA SA ISRAEL MANUNGOD SA PAGSULSOL

4. Ano an itinukdo ni Jehova sa nasyon nin Israel manungod sa pagsulsol?

⁴ Kan organisaron ni Jehova an mga Israelita na magin sarong nasyon, nakipagtipan siya, o naggibo nin sarong pormal na kasunduan, sa sainda. Kun susunudon ninda an saiyang mga tugon, poprotektaran asin bebendisyunan niya sinda. Manungod sa mga tugon na iyan, inasigurar niya sinda: “An tugon na ini na ipinagbubuot ko sa saimo ngunyan bako man dipisilon para sa saimo, asin bako man ining harayuon sa saimo.” (Deu. 30:​11, 16) Pero kun marebelde sinda sa saiya—halimbawa, paagi sa pagsamba sa ibang mga diyos—hahalion niya sa sainda an saiyang bendisyon, asin magdudusa sinda. Pero dawa kun mangyari iyan, puwede pa man nindang makamtan giraray an pag-uyon nin Diyos. Puwede sindang “magbalik . . . ki Jehova na [saindang] Diyos asin magdangog sa mga sinasabi niya.” (Deu. 30:​1-3, 17-20) Sa ibang pagtaram, puwede sindang magsulsol. Kun gigibuhon ninda iyan, marani sa sainda si Jehova asin bebendisyunan niya giraray sinda.

5. Paano ipinahiling ni Jehova na dai niya sinukuan an saiyang banwaan? (2 Hadi 17:​13, 14)

⁵ Pauruutrong nagrebelde ki Jehova an saiyang piniling banwaan. Apuwera sa idolatriya, nagsagibo sinda nin iba pang grabe karaot na mga bagay. Bilang resulta, nagdusa sinda. Pero dai sinukuan ni Jehova an saiyang masinuway na banwaan. Pauruutro siyang nagsugo nin mga propeta tanganing sadulon an saiyang banwaan na magsulsol asin magbalik sa saiya.​—Basahon an 2 Hadi 17:​13, 14.

6. Paano ni Jehova ginamit an saiyang mga propeta para tukduan an banwaan niya manungod sa kahalagahan nin pagsulsol? (Hilingon man an ritrato.)

⁶ Parating ginagamit ni Jehova an saiyang mga propeta para patanidan asin itanos an saiyang banwaan. Halimbawa, sinabi nin Diyos paagi ki Jeremias: “Magbalik ka, O rebelyosong Israel . . . Dai ako sa saindo madungaw na anggot, ta maimbod ako . . . Dai ako magdadanay na naghihinanakit nin daing sagkod. Basta akuon mo lang an kasalan mo, huling nagrebelde ka ki Jehova.” (Jer. 3:​12, 13) Paagi ki Joel, sinabi ni Jehova: “Bumalik kamo sako nin bilog nindong puso.” (Joel 2:​12, 13) Sinabi niya ki Isaias na ipahayag: “Magpakalinig kamo; halia nindo sa atubangan ko an maraot nindong mga gibo; magpurundo kamo sa paggibo nin maraot.” (Isa. 1:​16-19) Asin paagi ki Ezekiel, ihinapot ni Jehova: “Nauugma lamang daw ako sa pagkagadan nin maraot na tawo? . . . Bako daw na mas gusto kong talikdan niya an saiyang mga dalan asin padagos siyang mabuhay? Dai lamang ako nauugma sa pagkagadan nin siisay man, . . . kaya bumalik kamo asin mabuhay.” (Ezek. 18:​23, 32) Nauugma si Jehova pag nahihiling niyang nagsusulsol an mga tawo huling gusto niya na padagos sindang mabuhay—nin daing sagkod! Kaya dai sana basta naghahalat si Jehova na magbago an mga tawong makasalan bago niya sinda tabangan. Hilingon ta an nagkapirang iba pang halimbawa kaini.

7. Paagi sa halimbawa ni propeta Oseas asin kan saiyang agom, ano an itinukdo ni Jehova sa saiyang banwaan?

⁷ Mangnuhon kun ano an itinukdo ni Jehova sa saiyang banwaan paagi sa sarong halimbawa na aktuwal na nangyari—an halimbawa ni Gomer, na agom ni propeta Oseas. Pagkatapos na makakomiter nin pagsambay, binayaan niya si Oseas para umiba sa ibang mga lalaki. Imposible na daw na magbago siya? Si Jehova, na nakakabasa nin puso, nagsabi ki Oseas: “Kamutan mo giraray an babayi na namumutan nin ibang lalaki asin nagsasambay, kun paanong namumutan ni Jehova an banwaan nin Israel maski nagsasamba sinda sa ibang mga diyos.” (Os. 3:1; Tal. 16:2) Mangnuhon na an agom ni Oseas nagkokomiter pa nin magabat na kasalan. Pero, sinabi ni Jehova ki Oseas na kaulayon siya asin patawadon asin makipag-ulian.a Sa kaagid na paagi, dai pa man giraray tinatalikdan ni Jehova an saiyang masinuway na banwaan. Dawa ngani nagsasagibo pa sinda nin marauton na mga kasalan, namumutan niya pa man giraray sinda asin padagos niya sindang tinatabangan na magsulsol asin mabago an paggawi ninda. Ipinapahiling daw kan halimbawa na ini na si Jehova, “an parasiyasat nin mga puso,” tatabangan na magsulsol an sarong indibidwal na nagkokomiter pa nin magabat na kasalan? (Tal. 17:3) Aramon ta.

KUN PAANO NI JEHOVA TINATABANGAN AN MGA NAGKASALA NA MAGSULSOL

8. Ano an ginibo ni Jehova para matabangan si Cain na magsulsol? (Genesis 4:​3-7) (Hilingon man an ritrato.)

⁸ Si Cain an panganay na aki ni Adan asin Eva. Nagmana siya nin makasalan na mga tendensiya sa mga magurang niya. Dugang pa, sinasabi kan Bibliya manungod sa saiya: “An saiyang mga gibo maraot.” (1 Juan 3:12) Tibaad iyan an dahilan kun taano ta “dai [ni Jehova] nauyunan si Cain asin an dulot kaini” kan nagdulot siya nin atang. Imbes na baguhon an saiyang paggawi, “naanggot na marhay si Cain asin grabe an kamunduan niya.” Ano an sunod na ginibo ni Jehova? Kinaulay niya si Cain. (Basahon an Genesis 4:​3-7.) Risahon na mabuot na nakipag-ulay si Jehova ki Cain, na tinatawan ini nin tsansa na magbago asin pinapatanidan manungod sa peligro nin kasalan. Makamumundo, dai nagdangog si Cain. Dai niya tinugutan si Jehova na tabangan siyang magsulsol. Pagkatapos kan nangyaring iyan, nagpundo na daw si Jehova sa paghihinguwang tabangan an ibang nagkasala na magsulsol? Dai nanggad!

9. Paano tinabangan ni Jehova si David na magsulsol?

⁹ Namumutan na marhay ni Jehova si Hading David. Inapod niya pa ngani siyang “sarong lalaki na nauuyunan kan sakuyang puso.” (Gibo 13:22) Pero naggibo si David nin magabat na mga kasalan, kaiba an pagsambay asin paggadan. Uyon sa Katugunan ni Moises, maninigo sa kagadanan si David. (Lev. 20:10; Bil. 35:31) Pero, mabuot siyang tinabangan ni Jehova.b Isinugo niya an saiyang propetang si Natan na magduman sa hadi, dawa ngani dai pa kaidto nagpapahiling si David nin ano man na indikasyon nin pagsulsol. Naggamit si Natan nin sarong ilustrasyon tanganing mataros an puso ni David. Napahirong marhay si David kaya nagsulsol siya. (2 Sam. 12:​1-14) Nagsurat siya nin sarong udok sa pusong salmo na nagpapahayag kun gurano niya pinagsusulsulan an ginibo niya. (Sal. 51, superskripsiyon) An salmong iyan nakaranga sa dakul na nagkasala asin nakapahiro sa sainda na magsulsol. Dai daw kita nagpapasalamat na mamumuton na tinabangan ni Jehova an padaba niyang lingkod na si David na magsulsol?

10. Ano an namamatian mo manungod sa pagpapasensiya asin pagpapatawad ni Jehova sa makasalan na mga tawo?

¹⁰ Ikinakaungis ni Jehova an kasalan, asin dai niya iyan kinukunsinti sa ano man na paagi. (Sal. 5:​4, 5) Minsan siring, aram niya na gabos kita nagkakasala, asin huli sa pagkamuot niya sa sato, gusto niya kitang tabangan na malabanan an kasalan. Pirmi niyang hinihinguwa na tabangan na magsulsol asin rumani sa saiya dawa an mga nakagibo nin marauton na kasalan. Nakakaranga nanggad na maaraman iyan! Pag hinurop-hurop ta an manungod sa pagpapasensiya asin pagpapatawad ni Jehova, namomotibar kita kaiyan na magdanay na maimbod sa saiya asin magsulsol tulos kun magkasala kita. Pag-ulayan ta ngunyan kun paano urog pang natukduan an Kristiyanong kongregasyon manungod sa pagsulsol.

KUN ANO AN NANUDAN KAN MGA PARASUNOD NI JESUS MANUNGOD SA PAGSULSOL

11-12. Ano an itinukdo ni Jesus sa mga nagdadangog sa saiya manungod sa pagigin mapagpatawad kan saiyang Ama? (Hilingon an ritrato.)

¹¹ Kan inot na siglo C.E., nag-abot na an panahon kan pagdatong kan Mesiyas. Arog kan sinambit sa sinundan na artikulo, ginamit ni Jehova si Juan Bautista asin si Jesu-Cristo para tukduan an mga tawo kun gurano kahalaga na magsulsol.​—Mat. 3:​1, 2; 4:17.

¹² Sa bilog niyang ministeryo, itinukdo ni Jesus sa mga nagdadangog sa saiya an manungod sa pagigin mapagpatawad kan saiyang Ama. Ginibo iyan ni Jesus sa magayunon na paagi kan iistorya niya an parabula manungod sa aking naparaot an buhay. Sa sarong peryodo nin panahon, pinili kan hoben na lalaking iyan an makasalan na paagi nin pamumuhay. Alagad, ‘nakapag-isip-isip siya’ asin nagpuli siya sa saindang harong. Ano an nagin reaksiyon kan saiyang ama? Sinabi ni Jesus na mantang “harayo pa [an aking lalaki], natanaw siya kan saiyang ama asin nahirak ining marhay sa saiya, asin duminalagan ini saka kinugos siya asin mapagpadaba siyang hinadukan.” Makikiulay kuta an aki kun puwedeng magin suruguon siya sa harong kan saiyang ama, pero inapod siya kan saiyang ama na “ining aki ko” asin inako giraray siya sa pamilya. Sinabi kan ama: “Nawara siya asin nakua na.” (Luc. 15:​11-32) Kan si Jesus nakaistar pa sa langit bago magdigdi sa daga, siguradong namasdan niya an saiyang Ama na nagpahiling kan siring na pagkahirak sa dai mabilang na mga nagkasala na nagsulsol. Saro nanggad ining nakakapahiro sa puso asin nakakaasigurar na paglaladawan ni Jesus sa satong mahihirakon na Ama, si Jehova!

13-14. Ano an nanudan ni apostol Pedro manungod sa pagsulsol, asin ano an itinukdo niya sa iba manungod diyan? (Hilingon man an ritrato.)

¹³ Dakulon an nanudan ni apostol Pedro ki Jesus manungod sa pagsulsol asin pagpapatawad. Parati kaidtong kinaipuhan ni Pedro nin pagpapatawad, asin bulaos iyan na itinao sa saiya ni Jesus. Halimbawa, pagkatapos na nigaran ni Pedro nin tulong beses na bisto niya an saiyang Kagurangnan, nakamati siya nin grabeng kamunduan huli sa ginibo niya. (Mat. 26:​34, 35, 69-75) Pero pagkatapos na buhayon liwat si Jesus, nagpahiling siya ki Pedro—minalataw na sinda sanang duwa. (Luc. 24:​33, 34; 1 Cor. 15:​3-5) Siguradong sa pagkakataon na iyan, mamumuton na pinatawad asin inasigurar ni Jesus an saiyang nagsusulsol na apostol.​—Hilingon an Marcos 16:7 asin an study note na “at kay Pedro.”

¹⁴ Huling naeksperyensiyahan mismo ni Pedro na magsulsol asin patawadon, nagibo niyang tukduan an iba manungod diyan. Paghaloy-haloy pagkatapos kan kapiyestahan nin Pentecostes, nagtao nin diskurso si Pedro sa sarong grupo nin daing pagtubod na mga Judio, na ipinapaliwanag sa sainda na ginadan ninda an Mesiyas. Pero mamumuton niya sindang dinagka: “Kaya magsurulsol kamo asin magbakli tanganing mapara an saindong mga kasalan, na sa siring an mga panahon nin kaginhawahan mag-abot hali ki Jehova mismo.” (Gibo 3:​14, 15, 17, 19) Paagi kaiyan, ipinahiling ni Pedro na an pagsulsol nagpapahiro sa sarong nagkasala na magbakli—na baguhon an saiyang salang kaisipan asin paggawi—asin magpuon na mamuhay sa paaging nakakapaugma sa Diyos. Ipinahiling man kan apostol na paparaon ni Jehova an saindang mga kasalan, o papangyarihon niyang mawara an mga iyan. Asin pakalihis nin mga dekada, inasigurar ni Pedro an mga Kristiyano: “Si Jehova [mapasensiya] sa saindo huling habo niyang malaglag an siisay man, imbes, gusto niya na an gabos makapagsulsol.” (2 Ped. 3:9) Marahayon nanggad na paglaom iyan para sa mga Kristiyano pag nakagibo sinda nin kasalan—dawa pa kun magabat iyan!

15-16. (a) Paano nakanuod si apostol Pablo manungod sa pagpapatawad? (1 Timoteo 1:​12-15) (b) Ano an pag-uulayan ta sa sunod na artikulo?

¹⁵ Si Saulo na taga Tarso na gayod an mas urog na nangangaipo nin pagsulsol asin pagpapatawad kisa sa dakul na iba pang tawo. Saro kaya siyang maringis na parapersegir kan namumutan na mga parasunod ni Cristo. Posibleng marhay na para sa kadaklan na Kristiyano wara na siyang paglaom na magbago o magsulsol. Pero an pagmansay kan binuhay liwat na si Jesus bako nanggad arog kan salang pangangatanusan na iyan nin tawo. Siya asin an saiyang Ama may nahiling na marahay na mga kuwalidad ki Saulo. Sinabi ni Jesus: “An tawong ini sarong lalagan na pinili ko.” (Gibo 9:15) Naggamit pa ngani si Jesus nin sarong milagro para tabangan si Saulo na magsulsol. (Gibo 7:58–8:3; 9:​1-9, 17-20) Pagkatapos na magin Kristiyano, si Saulo—na kan huri namidbid bilang si apostol Pablo—parating ipinapahayag an saiyang pasasalamat sa kun paano siya pinahilingan nin kabuutan asin pagkahirak. (Basahon an 1 Timoteo 1:​12-15.) Itinukdo kan mapagpasalamat na apostol na ini: “Dahil sa saiyang kabuutan, hinihinguwa nin Diyos na matabangan kang magsulsol.”​—Roma 2:4.

¹⁶ Kan mabaretaan ni Pablo an manungod sa sarong iskandalosong problema manungod sa imoralidad sa Kristiyanong kongregasyon sa Corinto, paano niya iyan inasikaso? Ginibo niya iyan sa paaging dakul kitang manunudan manungod sa mamumuton na pagdisiplina ni Jehova asin sa kahalagahan kan pagpahiling nin pagkahirak. Pag-uulayan ta nin mas detalyado an salaysay na iyan sa sunod na artikulo.