Naghihimati Ka Daw sa mga Patanid?

1. Anong paghusgar an mangyayari sa dai na mahahaloy?

NABUBUHAY kita sa panahon na may mangyayaring darakulang pagbabago! Dai na mahahaloy, huhusgaran ni Jesus an lambang tawong nabubuhay. Ilinadawan ni Jesus an mga mangyayari na masagkod sa paghusgar na ini paagi sa pagtao sa saiyang mga disipulo nin sarong propetikong “tanda” kan saiyang dai nahihiling na presensiya asin kan “pagtatapos kan sistema nin mga bagay.” (Mat. 24:3) Mababasa an propesiyang ini sa Mateo kapitulo 24 saka 25 asin sa kaagid na mga salaysay sa Marcos kapitulo 13 saka sa Lucas kapitulo 21.

2. Ano an pag-uulayan ta sa artikulong ini, asin taano ta makakatabang ini sa sato?

² Nagtao si Jesus nin kapaki-pakinabang na mga patanid paagi sa tulong parabula. Ini an parabula manungod sa mga karnero asin sa mga kanding, sa mapagmansay asin sa mangmang na mga daraga, asin sa mga talento. An kada parabula nakakatabang sa sato na masabutan kun paano an paggawi nin saro may epekto sa magigin paghusgar sa saiya. Mantang rinerepaso ta an mga parabulang ini, aramon niyato an mga leksiyon na manunudan ta diyan asin kun paano ta iyan iaaplikar. An inot na parabulang pag-uulayan ta iyo an manungod sa mga karnero asin mga kanding.

AN MGA KARNERO ASIN AN MGA KANDING

3. Nuarin gigibuhon ni Jesus an paghusgar sa mga tawo?

³ Sa parabula manungod sa mga karnero asin sa mga kanding, ilinadawan ni Jesus an paghusgar sa mga tawong igwa kan oportunidad na magdangog sa maugmang bareta asin na suportaran an saiyang linahidan na mga tugang. (Mat. 25:​31-46) Durante kan “dakulang kasakitan,” gigibuhon ni Jesus an paghusgar na ini bago mismo an Armagedon. (Mat. 24:21) Kun paanong isinusuway nin sarong pastor an mga karnero sa mga kanding, isusuway man ni Jesus an mga maimbod na nagsusuportar sa linahidan niyang mga parasunod duman sa mga dai nagsusuportar sa mga ini.

4. Uyon sa Isaias 11:​3, 4, taano ta makakasigurado kita na huhusgaran ni Jesus an mga tawo nin may katanusan? (Hilingon man an ritrato.)

⁴ Ipinapahiling kan propesiya sa Bibliya na bilang an Hukom na ninombrahan ni Jehova, maghuhusgar si Jesus nin may katanusan. (Basahon an Isaias 11:​3, 4.) Inoobserbaran niya an paggawi, sabuot, asin an mga sinasabi nin mga tawo—kaiba na an pagtratar ninda sa linahidan na mga tugang niya. (Mat. 12:​36, 37; 25:40) Maaaraman ni Jesus kun sairisay an nagsuportar sa linahidan niyang mga tugang asin sa saindang gibuhon.a An saro sa panginot na paagi na sinusuportaran kan arog-karnerong mga indibidwal an mga tugang ni Cristo iyo an pagtabang sa sainda sa gibuhon na paghuhulit. An mga naggigibo kaini huhusgaran bilang “mga matanos” asin magkakaigwa kan paglaom na ‘mabuhay nin daing katapusan’ digdi sa daga. (Mat. 25:46; Kap. 7:​16, 17) Magayunon nanggad na balos ini para sa mga pinagdadanay an saindang integridad! Paagi sa pagdanay na maimbod sa panahon kan dakulang kasakitan asin pagkatapos kaiyan, napagdadanay nindang nakasurat sa “libro nin buhay” an saindang pangaran.​—Kap. 20:15.

5. Ano an manunudan ta sa parabula manungod sa mga karnero asin sa mga kanding, asin sairisay an dapat na magtaong atensiyon diyan?

⁵ Patunayan mong maimbod ka. An parabula ni Jesus manungod sa mga karnero asin sa mga kanding panginot nang aplikado sa mga igwa kan paglaom na mabuhay digdi sa daga. Ipinapahiling ninda an saindang pagtubod bako sana paagi sa pagtabang sa mga tugang ni Cristo sa gibuhon na paghuhulit kundi pati man sa maimbod na pagsunod sa panginginot kan sadit na grupo nin linahidan na mga brother na pinili ni Jesus. (Mat. 24:45) Pero an mga may paglaom na mabuhay sa langit kaipuhan man na maghimati sa nagpapatanid na mensahe kan parabula. Taano? Huling inoobserbaran ni Jesus an saindang paggawi, sabuot, saka mga sinasabi. Kaipuhan man nindang patunayan na maimbod sinda. Sa katunayan, nagtao si Jesus nin duwang iba pang parabula na igwa nin espesipikong mga patanid para sa mga linahidan. Mahihiling ta man an mga parabulang ini sa Mateo kapitulo 25. Sunod tang pag-ulayan an parabula manungod sa mapagmansay asin sa mangmang na mga daraga.

AN MAPAGMANSAY ASIN AN MANGMANG NA MGA DARAGA

6. Paano pinatunayan kan limang daraga na mapagmansay sinda? (Mateo 25:​6-10)

⁶ Sa parabula manungod sa mga daraga, sinambit ni Jesus an mapadapit sa sampulong daraga na nagluwas tanganing sabaton an sarong nobyo. (Mat. 25:​1-4) Gabos sinda gustong ibanan an nobyo pasiring sa bangkete sa kasal niya. Ilinadawan ni Jesus na an lima sa sainda “mapagmansay” asin an limang iba pa “mangmang.” An mapagmansay na mga daraga andam saka alerto. Handa sindang maghalat sa nobyo sagkod sa kaipuhan, dawa kun mag-abot ining banggihon na. Kaya, nagdara sinda nin lampara para magtao sa sainda nin liwanag sa madiklom na banggi. Nagdara pa ngani sinda nin reserbang lana engkaso maatraso an pag-abot kan nobyo. Kaya andam sinda tanganing padagos na may laad an saindang mga lampara. (Basahon an Mateo 25:​6-10.) Kan mag-abot an nobyo, an mapagmansay na mga daraga naglaog kaiba niya sa bangkete sa kasal. Sa kaagid na paagi, an linahidan na mga Kristiyano na pinatunayan na sinda andam paagi sa pagdanay na alerto asin maimbod sagkod na mag-abot an Cristo huhusgaran na maninigo na umiba sa Nobyo, si Jesus, sa saiyang Kahadian sa langit.b (Kap. 7:​1-3) Kumusta man an limang mangmang na daraga?

7. Ano an nangyari sa limang mangmang na daraga, asin taano?

⁷ Bakong arog kan mapagmansay na mga daraga, an limang mangmang bakong andam kan mag-abot na an nobyo. Mapapalsok na an mga lampara ninda, asin mayo sindang darang reserbang lana. Kan maaraman nindang madali nang mag-abot an nobyo, kinaipuhan nindang maghali para magbakal nin lana. Dai pa sinda nakabalik kan mag-abot an nobyo. Kan oras na iyan, “an andam na mga daraga naglaog kaiba niya sa bangkete sa kasal. Dangan, isinara an pinto.” (Mat. 25:10) Tapos kan mag-arabot na an mangmang na mga daraga asin gusto nindang maglaog, sinabi sa sainda kan nobyo: “Dai ko kamo bisto.” (Mat. 25:​11, 12) An mga daragang idto bakong andam na maghalat sa nobyo sagkod sa kaipuhan. Ano an manunudan digdi kan mga linahidan?

8-9. Ano an manunudan kan mga linahidan sa parabula manungod sa mga daraga? (Hilingon man an ritrato.)

⁸ Patunayan mong andam ka saka alerto. Dai naghuhula si Jesus na magkakaigwa nin duwang grupo nin mga linahidan—saro na andam na maghalat sagkod sa katapusan kan sistemang ini nin mga bagay asin saro na bakong andam. Imbes, ipinapaliwanag niya an mangyayari sa mga linahidan kun bako sindang andam na magdanay na maimbod sagkod sa katapusan. Kun bako sindang andam, dai sinda mag-aako kan saindang balos. (Juan 14:​3, 4) Seryosong bagay nanggad iyan! Sa langit man o sa daga an satong paglaom, gabos kita dapat na isapuso an patanid kan parabula manungod sa mga daraga. An lambang saro sa sato dapat na padagos na magbantay asin magin andam—andam na magtagal sagkod sa katapusan.​—Mat. 24:13.

⁹ Pagkatapos na isaysay an parabula manungod sa mga daraga para iduon an pagigin andam saka alerto, sunod na isinaysay ni Jesus an parabula manungod sa mga talento. Idinuduon kan parabulang ini an manungod sa kahalagahan kan pagigin mahigos.

AN MGA TALENTO

10. Paano pinatunayan kan duwang uripon na maimbod sinda? (Mateo 25:​19-23)

¹⁰ Sa parabula manungod sa mga talento, sinambit ni Jesus an manungod sa duwang uripon na nagin maimbod sa saindang kagurangnan asin sarong uripon na dai nagin maimbod. (Mat. 25:​14-18) Pinatunayan kan duwang uripon na maimbod sinda paagi sa mahigos na pagtrabaho tanganing madagdagan an kuwarta kan saindang kagurangnan. Bago magbiyahe pasiring sa ibang nasyon, pinagkatiwalaan niya sinda nin mga talento—sarong dakulang kantidad nin kuwarta. An duwang maimbod na uripon nagin mahigos asin ginamit an kuwarta sa madunong na paagi. An resulta? Kan magbalik na an saindang kagurangnan, nadoble na ninda an kuwartang itinao sa sainda. Inumaw sinda kan saindang kagurangnan—‘nakipag-ugma sinda sa saindang kagurangnan.’ (Basahon an Mateo 25:​19-23.) Kumusta man an ikatulong uripon? Ano an ginibo niya sa kuwartang itinao sa saiya kan saiyang kagurangnan?

11. Ano an nangyari sa “hugakon” na uripon, asin taano?

¹¹ An ikatulong uripon tinawan nin sarong talento pero nagin “hugakon” siya. Inaasahan kan saiyang kagurangnan na madunong niyang gagamiton an talento. Imbes, itinalbong niya iyan sa daga. Kan magbalik an kagurangnan, an uripon na ini mayong ikakataong dagdag na kuwarta sa saiya. Bakong marahay an nagin sabuot kan uripon. Imbes na maghagad nin dispensa ta dai niya nadagdagan an kuwarta kan saiyang kagurangnan, bakong makatanusan niya pa ining inapod na “tawong istrikto.” Dai nakamtan kan uripon na iyan an pag-uyon kan saiyang kagurangnan. Urog pa diyan, kinua sa saiya an talento dangan pinalayas siya sa harong kan saiyang kagurangnan.​—Mat. 25:​24, 26-30.

12. Kairisay nagrerepresentar ngunyan an duwang maimbod na uripon?

¹² An duwang maimbod na uripon nagrerepresentar sa maimbod na linahidan na mga Kristiyano. An Kagurangnan, si Jesus, iniimbitaran sindang “makipag-ugma sa [saindang] kagurangnan.” Nakakamtan ninda an saindang langitnon na balos, an inot na pagkabuhay liwat. (Mat. 25:​21, 23; Kap. 20:5b) Sa ibong na lado, an maraot na halimbawa kan hugakon na uripon nagtataong patanid sa mga linahidan. Sa anong paagi?

13-14. Ano an manunudan kan mga linahidan sa parabula manungod sa mga talento? (Hilingon man an ritrato.)

¹³ Patunayan mong ika mahigos asin maigot. Sa parabula manungod sa mga talento, arog kan sa parabula manungod sa mga daraga, dai man ihinuhula ni Jesus na magigin hugakon an mga linahidan. Imbes, ipinapaliwanag niya kun ano an mangyayari engkaso mawara man an saindang kaigutan. Dai ninda magigibong “masiyertong mapagdanay . . . an pag-apod asin pagpili sa [sainda]” asin dai sinda tutugutan na lumaog sa Kahadian sa langit.​—2 Ped. 1:10.

¹⁴ Malinaw na idinuduon kan parabula ni Jesus manungod sa mga daraga asin sa mga talento na an gabos na linahidan na Kristiyano dapat na magin andam asin alerto saka magin mahigos asin maigot. Pero may iba pa daw na sinabi si Jesus na nagseserbing patanid para sa mga linahidan? Igwa! An sinabi ni Jesus na nasa Mateo 24:​40, 41 konektado man sa pangultimong paghusgar sa mga linahidan.

SAIRISAY AN “IIIBA”?

15-16. Paano idinuduon kan Mateo 24:​40, 41 na kaipuhan kan mga linahidan na magin mapagbantay?

¹⁵ Bago ni Jesus isinaysay an tulong parabula, ilinadawan niya an manungod sa sarong pangultimong paghusgar sa mga linahidan na diyan mahahayag kun sairisay an mga inuyunan. Sinambit niya an manungod sa duwang lalaki na nagtatrabaho sa uma asin an manungod sa duwang babayi na naggigiling sa gilingan. An duwang lalaki garo pareho man nin ginigibo asin an duwang babayi garo iyo man, pero sinabi ni Jesus na “an saro iiiba asin an saro iwawalat.” (Basahon an Mateo 24:​40, 41.) Dangan sinadol niya an saiyang mga parasunod: “Kaya, padagos kamong magbantay, huli ta dai nindo aram kun anong aldaw maabot an saindong Kagurangnan.” (Mat. 24:42) May sinabi man si Jesus na kaagid kaiyan pagkatapos niyang isaysay an parabula manungod sa mga daraga. (Mat. 25:13) Magkakonektar daw an mga ini? Garo minalataw na iyo. An mga tunay asin maimbod sanang linahidan an “iiiba,” dadarahon ni Jesus sa saiyang Kahadian sa langit.​—Juan 14:3.

¹⁶ Patunayan mong mapagbantay ka. An siisay man na linahidan na dai nagdadanay na alerto sa espirituwal dai iiiba sa titiripunon na “mga pinili.” (Mat. 24:31) Asin aplikado man iyan sa gabos na lingkod nin Diyos ano man an saindang paglaom. Dapat nindang mansayon an sinabi ni Jesus bilang patanid na padagos na magbantay asin magdanay na maimbod.

17. Taano ta dai niyato kukuwestiyunon an desisyon ni Jehova kun pinili niyang lahidan an nagkapirang maimbod na lingkod niya kan dai pa sana nahahaloy na mga taon?

¹⁷ Midbid na niyato si Jehova, kaya tiwala kita sa paghusgar niya. Dai ta kukuwestiyunon kun taano ta nagdesisyon si Jehova na lahidan an nagkapirang maimbod na lingkod niya kan dai pa sana nahahaloy na mga taon.c Magigirumduman ta diyan an sinabi ni Jesus manungod sa mga inagdang magtrabaho kan mga ika-11 oras sa ilustrasyon niya manungod sa ubasan. (Mat. 20:​1-16) An mga huring inagdang magtrabaho sa ubasan nakaresibi nin tangdan na kapareho kan mga mas amay na nagpuon na magtrabaho. Sa kaagid na paagi, nuarin man pinipili an mga linahidan, mag-aako sinda kan balos sa langit kun huhusgaran sindang maimbod.

MAGHIMATI SA MGA PATANID

18-19. Anong mga leksiyon saka mga patanid an pinag-ulayan niyato?

¹⁸ Ano na an mga napag-ulayan ta? Para sa mga may paglaom na mabuhay nin daing sagkod digdi sa daga, idinuduon kan parabula manungod sa mga karnero asin sa mga kanding na kaipuhan nindang magdanay na maimbod ki Jehova—ngunyan asin sa maabot na dakulang kasakitan. Sa maabot na panahon na iyan, an mga maimbod huhusgaran ni Jesus bilang maninigo na magkamit nin “buhay na daing katapusan.”​—Mat. 25:46.

¹⁹ Rinepaso ta man an duwang parabula na nagtatao nin mga patanid sa mga linahidan. Sa parabula ni Jesus manungod sa mapagmansay asin sa mangmang na mga daraga, lima sa sainda an pinatunayan na sinda madunong. Andam sinda asin alerto, handang maghalat sa nobyo sagkod sa kaipuhan. Pero an mangmang na mga daraga bakong andam. Kaya dai sinda pinalaog kan nobyo sa bangkete sa kasal niya. Kaipuhan ta man na magin andam na maghalat gurano man iyan kahaloy sagkod sa tapuson na ni Jesus an sistemang ini nin mga bagay. Sa parabula man ni Jesus manungod sa mga talento, pinag-ulayan ta an duwang maimbod na uripon na nagin mahigos asin maigot. Nagmaigot sinda para sa saindang kagurangnan asin nakua ninda an saiyang pag-uyon. Pero, an hugakon na uripon isinikwal. An leksiyon? Dapat kitang magdanay na sibot sa paglilingkod ki Jehova sagkod sa katapusan. Ultimo, pinag-ulayan niyato kun paano dapat na magdanay na mapagbantay an mga linahidan tanganing ‘iiba’ sinda ni Jesus asin kamtan an saindang balos sa langit. Hinahalat-halat na nindang marhay an ‘pagtipon sa sainda para makaibanan’ ni Jesus sa langit. Pagkatapos kan giyera nin Armagedon, sinda an magigin nobya ni Jesus sa kasal kan Kordero.​—2 Tes. 2:1; Kap. 19:9.

20. Ano an gigibuhon ni Jehova para sa mga naghihimati sa saiyang patanid?

²⁰ Dawa ngani marikas na naghaharani an paghusgar, mayo nin dahilan para matakot kita. Kun magdadanay kitang maimbod, an satong mamumuton na Ama sa langit tatawan kita kan “puwersa na urog kisa sa ordinaryo” tanganing “makatindog [kita] sa atubangan kan Aki nin tawo.” (2 Cor. 4:7; Luc. 21:36) Sa langit man o sa daga an satong paglaom, mapapaugma ta an satong Ama kun maghihimati kita sa mga patanid na nasa mga parabula ni Jesus. Asin huli sa daing kapantay na kabuutan ni Jehova, an satong pangaran mahihiling na “nakasurat sa libro” nin buhay.​—Dan. 12:1; Kap. 3:5.