Magin Alerto Asin Magin Utitok!

“Kun siring, magdanay kamong mapagbantay, huli ta dai nindo naaaraman an aldaw ni an oras.”—MATEO 25:13.

1. Ano an inaantisipar ni apostol Juan?

SA HURING pag-oolay sa Biblia, si Jesus nanuga: “Ako madatong sa madali.” An apostol niang si Juan nagsimbag: “Amen! Madia, Kagurangnan na Jesus.” An apostol daing pagduda na si Jesus madatong. Kabilang si Juan sa mga apostol na naghapot ki Jesus: “Noarin mangyayari an mga bagay na ini, asin ano an magigin tanda kan saimong presensia [Griego, pa·rou·siʹa] asin kan pagtatapos kan palakaw nin mga bagay?” Iyo, si Juan kompiadong nag-antisipar kan presensia ni Jesus sa ngapit.—Kapahayagan 22:20; Mateo 24:3.

2. Kun manongod sa presensia ni Jesus, ano an situwasyon sa mga iglesia?

² Bihira na ngonyan na mga aldaw an siring na kompiansa. Dakol na iglesia an may opisyal na doktrina manongod sa “pagdatong” ni Jesus, alagad pira sana sa mga miembro ninda an talagang naghahalat kaiyan. Sinda namumuhay oyon dian. An librong The Parousia in the New Testament nagkokomento: “Kakadikit kan positibong impluwensia kan paglaom sa Parousia sa buhay, opinyon asin gibohon kan iglesia. . . . An makosogon na pagkaapurado na maninigo na yaon sa iglesia sa paggibo kaiyan kan pagsolsol asin misyonerong pagbalangibog kan ebanghelyo, luminuya kun bakong biyo nang nawara.” Alagad bakong sa gabos!

3. (a) Ano an saboot nin tunay na mga Kristiano manongod sa pa·rou·siʹa? (b) Ano partikularmente an eestudyaran niato ngonyan?

³ An tunay na mga disipulo ni Jesus galagang hinahalat an katapusan kan presenteng maraot na palakaw nin mga bagay. Mantang maimbod na ginigibo iyan, kaipuhan na papagdanayon niato an tamang punto de vista sa gabos na kalabot sa presensia ni Jesus asin gumibo nin aksion oyon dian. Iyan mapangyari sa sato na ‘makatagal sagkod sa katapusan asin maligtas.’ (Mateo 24:13) Sa pagtao kan hula na manonompongan niato sa Mateo kapitulo 24 asin 25, si Jesus nagtao nin madonong na sadol na ikaaaplikar niato, sa nagdadanay na pakinabang niato. An kapitulo 25 may mga parabola na posibleng marhay na aram nindo, kaiba an saro manongod sa sampulong daraga (an madonong asin mangmang na mga daraga) asin an parabola kan mga talento. (Mateo 25:1-30) Paano kita makikinabang sa mga ilustrasyon na iyan?

Magin Alerto, Arog kan Limang Daraga!

4. Ano an pinakapunto kan parabola kan mga daraga?

⁴ Tibaad boot nindong basahon giraray an parabola kan mga daraga, na yaon sa Mateo 25:1-13. An eksena engrandeng kasal na Judio na dian an nobyo nagduman sa harong kan ama kan nobya tangani na ihatod an nobya sa harong kan nobyo (o kan saiyang ama). An siring na parada puedeng may kaibanan na mga musikero asin parakanta, asin dai aram nin eksakto an oras kan pag-abot kaiyan. Sa parabola, an sampulong daraga naghalat kan pag-abot kan nobyo sagkod na bumanggi. An lima may kamangmangan na dai nagdara nin igong lana sa ilawan asin sa siring kinaipuhan na humale saka bumakal nin dagdag pa. An lima pa madonong na nagdara nin sobrang lana sa mga lalagan tangani na kun kaipuhan mabugtakan giraray ninda an saindang mga ilawan sa panahon kan paghalat. An lima sanang ini an yaon saka andam kan umabot an nobyo. Huli kaini, sinda sana an pinalaog sa punsion. Kan bumalik an limang mangmang na daraga, huri na tangani na sinda makalaog.

5. Anong mga teksto an nagtataong liwanag sa piguratibong kahulogan kan parabola kan mga daraga?

⁵ An dakol na aspekto kan parabolang ini puedeng saboton na simboliko. Halimbawa, an Kasuratan inaapod si Jesus na nobyo. (Juan 3:28-30) Ibinaing ni Jesus an saiyang sadiri sa aki nin sarong hade na inandaman nin sarong punsion sa kasal. (Mateo 22:1-14) Asin si Cristo ibinabaing kan Biblia sa sarong agom na lalaki. (Efeso 5:23) Interesante nanggad, minsan ngani an linahidan na mga Kristiano irinerepresentar sa iba pang kabtang bilang an “nobya” ni Cristo, an parabola daing nasasambitan na nobya. (Juan 3:29; Kapahayagan 19:7; 21:2, 9) Pero, iyan nagtataram manongod sa sampulong daraga, asin sa iba pang kabtang an mga linahidan ibinabaing sa sarong daraga na katratong pakasal ki Cristo.—2 Corinto 11:2.a

6. Anong sadol an itinao ni Jesus kan tinatapos an parabola kan mga daraga?

⁶ Apuera sa siring na mga detalye asin sa ano man na makahulang aplikasyon, tunay nanggad na may marahay na mga prinsipyo na satong manonodan sa parabolang ini. Halimbawa, mangnoha na tinapos iyan ni Jesus kan mga tataramon na: “Kun siring, magdanay kamong mapagbantay, huli ta dai nindo naaaraman an aldaw ni an oras.” Kaya ipinahahayag kan parabola an pangangaipo na an lambang saro sa sato magin alerto, listo sa nagdadangadang na katapusan kan maraot na palakaw na ini. An katapusan na ini daing duda na madatong, dawa dai niato naaaraman nin eksakto an petsa. Mapadapit digdi, obserbare an mga aktitud na ipinaheling kan duwang grupo nin mga daraga.

7. Sa anong sentido na nagin mangmang an lima sa mga daraga sa parabola?

⁷ Sabi ni Jesus: “An lima sa sainda mangmang.” Idto daw huli ta dai sinda naniwala na madatong an nobyo? Sinda daw mayo ta naghahanap nin mga kasingawan? O nadaya daw sinda? An simbag dai. Sinabi ni Jesus na an limang ini “nagruluwas sa pagsabat sa nobyo.” Aram ninda na sia madatong, asin gusto nindang magin kalabot, makiiba pa ngani sa “punsion sa kasal.” Pero, sinda daw andam nin igo? Naghalat sinda sa saiya nin kadikit, sagkod sa ‘matangang banggi,’ alagad dai sinda andam para sa saiyang pag-abot noarin man iyan—baga man mas amay o mas huri sa enot nindang paglaom.

8. Paano nagin madonong an lima sa mga daraga sa parabola?

⁸ An lima pa—an mga inapod ni Jesus na madonong—nagluwas man na may darang maliwanag na ilawan, na naghahalat sa pag-abot kan nobyo. Sinda kaipuhan man na maghalat, alagad sinda “madonong.” An termino sa Griego na trinadusir na “madonong” puedeng magpahayag kan kahulogan na pagigin “marahay an paghusgar, makatanosan, madonong sa praktikal.” Pinatunayan kan limang ini na sinda madonong paagi sa pagdara nin mga lalagan na may sobrang lana tanganing mabugtakan giraray an saindang mga ilawan kun kaipuhan. Sa katunayan, konsentrado sindang marhay sa pagigin andam para sa nobyo kaya habo nindang ipanao an saindang lana. Dai napasala an siring na pagkaalerto, siring kan pinatutunayan kan saindang pagigin presente saka biyong andam pag-abot kan nobyo. An mga ini na “andam naglaog kaiba nia sa punsion sa kasal; asin pininto an tata.”

9, 10. Ano an punto kan parabola kan mga daraga, asin anong mga hapot an maninigo niatong ihapot sa satong sadiri?

⁹ Si Jesus dai nagtatao nin leksion sa marahay na ugale sa mga kasal, ni nagtatao man sia nin hatol manongod sa paghiras sa iba. An punto nia: “Kun siring, magdanay kamong mapagbantay, huli ta dai nindo naaaraman an aldaw ni an oras.” Hapota an saindong sadiri, ‘Totoo daw na ako alerto mapadapit sa presensia ni Jesus?’ Kita nagtutubod na si Jesus naghahade na ngonyan sa langit, alagad gurano kita kakonsentrado sa katunayan na ‘an Aki nin tawo madali nang dumatong sa mga panganoron nin langit na may kapangyarihan asin dakulang kamurawayan’? (Mateo 24:30) Kan “matanga na an banggi,” an pag-abot kan nobyo tunay nanggad na mas harani na kisa kaidtong enot na lumuwas an mga daraga sa pagsabat sa saiya. Kaagid kaiyan, an pag-abot kan Aki nin tawo sa paglaglag sa presenteng maraot na palakaw mas harani na kisa kaidtong ponan niatong antisiparon an saiyang pagdatong. (Roma 13:11-14) Pinapagdanay daw niato an satong pagkaalerto, na orog pa nganing nagigin alerto mantang naghaharani nin orog an panahon na iyan?

¹⁰ An pagkuyog sa pagboot na “magdanay kamong mapagbantay” naghahagad nin dayaday na pagkaalerto. An limang daraga pinabayaan na maubos an saindang lana asin naghale sa pagbakal nin dagdag pa. An sarong Kristiano ngonyan tibaad madisturbo man kaya sia bako nang biyong andam para sa madali nang pag-abot ni Jesus. Iyan nangyari sa nagkapirang Kristiano kan enot na siglo. Iyan puedeng mangyari sa nagkapira ngonyan. Kaya hapoton niato an satong sadiri, ‘Iyan daw nangyayari sa sako?’—1 Tesalonica 5:6-8; Hebreo 2:1; 3:12; 12:3; Kapahayagan 16:15.

Magin Utitok Mantang Naghaharani an Katapusan

11. Anong parabola an sunod na itinao ni Jesus, asin sa ano iyan nakaaagid?

¹¹ Sa sunod niang parabola, dai sana sinadol ni Jesus an saiyang mga parasunod na magin alerto. Pakasaysayan kan manongod sa madonong asin mangmang na mga daraga, isinaysay nia an ilustrasyon kan mga talento. (Basahon an Mateo 25:14-30.) Sa dakol na bagay ini kapareho kan naenot niang parabola kan mga mina, na itinao ni Jesus ta dakol an “naghohona na an kahadean nin Dios bigla na sanang mahahayag.”—Lucas 19:11-27.

12. Ano an pinakasumaryo kan parabola kan mga talento?

¹² Sa parabola kan mga talento, si Jesus nagsaysay manongod sa sarong tawo na, bago nagbiahe sa ibang daga, inapod an tolong oripon. Sa saro ipinaniwala nia an limang talento, sa saro duwa, asin sa huri saro sana—“sa lambang saro segun sa saiyang kakayanan.” Posibleng marhay, ini nangahulogan nin talentong pirak, sarong komporme sa pamantayan na kantidad na kaidto katimbang kan makukua nin sarong trabahador sa laog nin 14 taon—dakulang kantidad nin kuarta! Pagbuelta kan tawo, ipinakuenta nia sa saiyang mga oripon an ginibo ninda durante kan “haloy na panahon” na sia mayo. An enot na duwang oripon nadoble an halaga kan ipinagkatiwala sa sainda. Sabi nia, “Marahay na gibo,” pinanugaan nia an lambang saro nin dagdag na paninimbagan, asin nagkonklusyon sia: “Lumaog ka sa kagayagayahan kan saimong kagurangnan.” Sinasabi na an kagurangnan sobra kaestrikto, an oripon na may sarong talento dai ginamit sa ano man na may ganansia an talento. Itinago nia an kuarta, na dai ngani iyan idineposito sa bangko tanganing tumubo. Inapod sia kan kagurangnan na “maraot asin hugakon” ta sia dai naghingoa para sa interes kan saiyang kagurangnan. Bilang resulta, kinua sa saiya an talento, asin ibinugtak sia sa luwas na duman mangyayari “an saiyang pagtangis asin an pagragot kan saiyang mga ngipon.”

13. Paano si Jesus nagin arog kan kagurangnan sa parabola?

¹³ Sa giraray, an mga detalye kaini masasabotan sa sentidong simboliko. Halimbawa, si Jesus, na ilinaladawan kan tawong nagbiahe sa ibang daga, babayaan an saiyang mga disipulo, maduman sa langit, asin mahalat nin haloy na panahon sagkod na akoon nia an kapangyarihan nin hade.b (Salmo 110:1-4; Gibo 2:34-36; Roma 8:34; Hebreo 10:12, 13) Pero, sa giraray, may maririsa kitang mas mahiwas na leksion o prinsipyo na kaipuhan na iaplikar niato gabos sa satong buhay. Ano iyan?

14. An parabola kan mga talento nagdodoon nin anong mahalagang marhay na pangangaipo?

¹⁴ Baga man an paglaom niato inmortal na buhay sa langit o buhay na daing katapusan sa paraisong daga, malinaw sa parabola ni Jesus na kita maninigong maghingoa sa Kristianong mga aktibidad. Sa katunayan, an mensahe kan parabolang ini masusumaryo sa sarong termino: pagkautitok. An mga apostol an nagtao kan arogan poon kan Pentecostes 33 C.E. padagos. Mababasa niato: “Sa balakid pang tataramon [si Pedro] lubos na nagpatotoo asin padagos sindang pinakasasadol, na an sabi: ‘Paligtas kamo hale sa bikong kapag-arakian na ini.’” (Gibo 2:40-42) Asin abaa karahay na pakinabang an inako nia huli sa saiyang mga paghihingoa! Mantang an iba minaiba sa mga apostol sa Kristianong paghuhulit, sinda man utitok, na “nagtatalubo sa bilog na kinaban” an maogmang bareta.—Colosas 1:3-6, 23; 1 Corinto 3:5-9.

15. Sa anong espesyal na paagi na maninigo niatong iaplikar an pangenot na punto kan parabola kan mga talento?

¹⁵ Isaisip an konteksto kan parabolang ini—sarong hula manongod sa presensia ni Jesus. May bastante kitang pagkumpirma na an pa·rou·siʹa ni Jesus nangyayari na asin dai na mahahaloy maabot sa kulminasyon. Girumdoma an pagkonektar ni Jesus kan “katapusan” asin kan kaipuhan na gibohon nin mga Kristiano: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Nasa isip ini, arin na klaseng oripon an kapareho niato? Hapota an saindong sadiri: ‘May dahelan daw na ikonklusyon na kapareho ako kan oripon na itinago an ipinagkatiwala sa saiya, tibaad mantang inaasikaso nia an sadiri niang personal na mga interes? O malinaw daw na ako kapareho kan mga marahay asin fiel? Ako daw biyong dusay sa pagpaaumento kan intereses kan Kagurangnan sa lambang okasyon?’

Alerto Asin Utitok Durante kan Saiyang Presensia

16. Ano an mensahe para sa saindo kan duwang parabola na pinag-olayan niato?

¹⁶ Iyo, apuera sa piguratibo asin makahulang kahulogan kaiyan, an duwang parabolang ini nagtatao sa sato nin malinaw na pagparigon sa boot na gikan mismo sa ngoso ni Jesus. An mensahe nia iyo ini: Magin alerto; magin utitok, nangorogna kun naheheling na an tanda kan pa·rou·siʹa ni Cristo. Iyan ngonyan na. Kaya kita daw talagang nagigin alerto asin utitok?

17, 18. Ano an ihinatol kan disipulong si Santiago may labot sa presensia ni Jesus?

¹⁷ An tugang sa ina ni Jesus na si Santiago mayo sa Bukid nin mga Olibo tanganing madangog an hula ni Jesus; alagad sa huri iyan naaraman nia, asin malinaw na nasabotan nia an kahulogan kaiyan. Sia nagsurat: “Kun siring, magin mapasensia kamo, mga tugang, sagkod sa presensia kan Kagurangnan. Uya! An paraoma padagos na naghahalat kan mahalagang marhay na bunga kan daga, na nagpapasensia dian sagkod na maako nia an amay na oran asin an huring oran. Kamo man magin mapasensia; parigona an saindong puso, huli ta an presensia kan Kagurangnan harani na.”—Santiago 5:7, 8.

¹⁸ Pakatao nin garantiya na hohokoman nin Dios nin bakong paborable an mga inaabuso an saindang kayamanan, sinadol ni Santiago an mga Kristiano na dai malangkag mantang hinahalat si Jehova na gumibo nin aksion. An nalalangkag na Kristiano tibaad magin benggatibo, na garo baga kaipuhan na sia mismo an magtanos kan mga salang naginibo. Pero, iyan dai maninigo ta seguradong maabot an panahon nin paghokom. Iiniilustrar iyan kan halimbawa nin sarong paraoma, arog kan ipinaliwanag ni Santiago.

19. An paraomang Israelita puedeng magkaigwa nin anong klaseng pasensia?

¹⁹ An paraomang Israelita na nagsabwag nin banhi kaipuhan na maghalat, enot sa pagluwas kan dahon, dangan sa pagtubo kan tanom, asin sa katapustapusi sa pag-ani. (Lucas 8:5-8; Juan 4:35) Sa laog kan mga bulan na idto, may panahon asin tibaad dahelan na mahadit. Maabot daw asin magigin bastante an amay na oran? Kumusta man daw an huring oran? Gagadanon daw an mga tanom nin mga layug-layog o nin bagyo? (Ikomparar an Joel 1:4; 2:23-25.) Minsan siring, sa kabilogan an paraomang Israelita puedeng magtiwala ki Jehova asin sa natural na mga siklo na saiyang inestablisar. (Deuteronomio 11:14; Jeremias 5:24) An pasensia kan paraoma puede talagang magin kompiadong pag-antisipar. May pagtubod na aram nia na maabot an saiyang hinahalat. Iyan talagang maabot!

20. Paano kita makapaheheling nin pasensia kaoyon kan hatol ni Santiago?

²⁰ Minsan ngani an paraoma tibaad may aram sa kun noarin an pag-ani, dai makalkulo kan mga Kristiano kan enot na siglo kun noarin an presensia ni Jesus. Pero idto seguradong madatong. Isinurat ni Santiago: “An presensia [Griego, pa·rou·siʹa] kan Kagurangnan harani na.” Kan panahon na isurat ni Santiago an mga tataramon na idto, dai pa naheheling an dakula, o lakop sa globo, na tanda kan presensia ni Cristo. Alagad ngonyan iyo na! Kaya ano an maninigong magin saboot niato sa kapanahonan na ini? Naheheling na nin aktuwal an tanda. Naheheling niato iyan. Masasabi niato na may kasarigan, ‘Naheheling ko na naootob an tanda.’ Masasabi niato na may pagkompiar, ‘An presensia kan Kagurangnan uya na, asin an kulminasyon kaiyan harani na.’

21. Kita desidido nanggad na gibohon an ano?

²¹ Mantang siring, kita nangorognang may makosog na dahelan na isapuso asin iaplikar an pundamental na mga leksion kan duwang parabola ni Jesus na satong pinag-olayan. Sinabi nia: “Kun siring, magdanay kamong mapagbantay, huli ta dai nindo naaaraman an aldaw ni an oras.” (Mateo 25:13) Daing duda na ngonyan na an panahon na kita dapat na magin maigot sa satong Kristianong paglilingkod. Ipaheling niato sa satong buhay aroaldaw na nasasabotan niato an punto ni Jesus. Magin kitang alerto! Magin kitang utitok!

[Mga Nota sa Ibaba]

Nagigirumdoman daw Nindo?

◻ Anong importanteng marhay na mensahe an nakua nindo sa parabola kan madonong asin mangmang na mga daraga?

◻ Paagi sa parabola kan mga talento, anong pundamental na sadol an itinatao sa saindo ni Jesus?

◻ Sa anong sentido na an saindong pasensia na konektado sa pa·rou·siʹa kapareho kan sa paraomang Israelita?

◻ Taano ngonyan ta nangorognang nakaoogma asin masakit na panahon na mabuhayan?

[Mga retrato sa pahina 23]

Anong mga leksion an nanonodan nindo sa parabola kan mga daraga asin kan mga talento?